[1] Бьраһим иди кал бьбу у р'ожед хwә дәрбаз кьрьбун. Хӧдан һәр алийада сәр Бьраһимда барандьбу.
[2] Һьнге Бьраһим готә хӧламе мала хwәдайи мәзьн, кӧ wәк'иле һ'әму һәбука wи бу: «Һиви дькьм, дәсте хwә бькә ль бьн р'ә'не һета мьн ,
[3] әз тә бь Хӧдан дьдьмә сонде, кӧ Хwәдейе ә'рде у Хwәдейе ә'змен ә, wәки те кӧр'е мьнр'а жь qизед кәнанийа нәхwәзи, нава к'ижанада әз дьминьм.
[4] Ле һәр'и wәлате мьн, жь нава пьсмамтийа мьн qизәке кӧр'е мьн Исһаqр'а бини».
[5] Хӧлам готе: «Бәлки qизьк нахwазә ль пәй мьн бе ви wәлати, тӧ дьхwази кӧ әз кӧр'е тә вәгәр'иньмә wи wәлате кӧ тӧ же дәрк'әти?»
[6] Бьраһим готә wи: «Һ'әвза хwә бьки кӧ кӧр'е мьн вәнәгәр'ини wьр.
[7] Хӧдан, Хwәдейе ә'змен, йе кӧ әз жь мала баве мьн у жь wи wәлате әз теда бьбум дәрхьст ьм у т'әви мьн хәбәрда у мьнр'а сонд хwар гот: ‹Әзе ви wәлати бьдьмә зӧр'әта тә›, әwе мьлйак'әте хwә пешийа тәва бьшинә у те жь wьр qизе кӧр'е мьнр'а бини.
[8] Ле һәгәр qизьк нахwазә кӧ ль пәй тә бе, тӧ жь ве сонда мьн аза йи, т'әне кӧр'е мьн вәнәгәр'ини wьр».
[9] Һьнге хӧлам дәсте хwә кьрә бьн р'ә'не һета ахайе хwә Бьраһим у жь бәр wе йәкева сонд хwар.
[10] Хӧлем жь дәвәйед ахе хwә дәһә дәвә бар кьрьн. Чьмки һ'әму хер-хьзна ахайе wи дәсте wида бу. Әw р'абу чу Арам-Наһараиме , wи бажаре кӧ Нәһор дьма.
[11] Әwи бәре еваре, wи wәхте кӧ qиз у бук дәрдьк'әтьн ав дьк'ьшандьн, дәвә жь бажер дәр бәр бирәке данә мәхәле,
[12] у гот: «Йа Хӧдан, Хwәдейе ахайе мьн Бьраһим! Әз р'әща дькьм, те иро р'ийа мьн р'аст ки, ахайе мьн Бьраһимр'а һ'ӧба хwәйә амьн бьдә к'ьфше.
[13] Әзе ва ль сәр канийа аве бьсәкьньм у qиз-букед бьнәлийед ви бажари wе бенә аве,
[14] әз к'ижан qизер'а бежьм: ‹К'әрәма хwә, щер'е хwә дайнә әз аве вәхwьм› у гава әw бежә: ‹К'әрәм кә вәхwә у әз дәвәйед тә жи авдьм›, бьра һәма әw жи бьбә әw qиза кӧ тә бона хӧламе хwә Исһаq к'ьфшкьри йә. У бь ве йәке әз бьзаньбьм, кӧ тә ахайе мьнр'а һ'ӧба хwәйә амьн да к'ьфше».
[15] Әwи һәла һе хәбәрдана хwә к'ӧта нәкьрьбу, Р'евека qиза Бәт'уеле кӧр'е Милк'а жьна Нәһоре бьрайе Бьраһим щер' ль сәр мьла һат.
[16] Qизьк йәкә гәләки бәдәw у бьк'ьр бу, дәсте мера һе ле нәк'әтьбу. Әwа бәржери сәр канийе бу, щер'е хwә дагьрт у һәвраз һьлк'ьшийа.
[17] Хӧлам бь ләз чу пешийа wе у готе: «К'әрәма хwә, авәке жь щер'е хwә нади әз вәхwьм?»
[18] Әwе гот: «Вәхwә, хwәйе мьн». У ләзә-ләз щер' жь сәр мьле хwә дани у дайе кӧ вәхwә.
[19] Гава әwи ав т'ер вәхwар, кәч'ьке готе: «Әз аве дәвәйед тәр'а жи бьк'ьшиньм, wан жи т'ер авдьм».
[20] У пер'а-пер'а ава щер'да валайи к'ӧр'н кьр, диса бәзи чу жь бире аве бьк'ьшинә, әwе бона һ'әму дәвәйед wи ав к'ьшанд.
[21] Әв мәрьва ль сәр wе ә'щебмайи мабу, qәт дәнг нәдькьр, дьфькьри дьгот: гәло р'аст Хӧдан р'ийа wи р'аст кьрийә, йан на.
[22] У гава һ'әму дәва ава хwә вәхwарьн, һьнге wи мәрьви qәрәфиләкә зер'инә гьранийа нив шекьли у дӧ базьнед зер'инә гьранийа дәһә шекьли* бона зәнде wе данә wе
[23] у же пьрси: «Бь к'әрәма хwә бәжә, тӧ qиза к'е йи? Гәло мала баве тәда щи һәйә, кӧ әм шәва хwә дәрбаз кьн?»
[24] Әwе готә wи: «Әз qиза Бәт'уеле кӧр'е Милк'айа жьна Нәһор ьм».
[25] Ӧса жи готе: «Шькьр ка у гиһайе мә гәләк ә у щийе шәвмайина wә жи һәйә».
[26] Һьнге әw мәрьва дәвәр'уйа чу у шькьри да Хӧдан
[27] у гот: «Шькьр жь Хӧдан, Хwәдейе Бьраһиме ахайе мьн, кӧ әwи т'ела ахайе мьн жь һ'ӧб у амьнийа хwә нәбьр'и! Гава әзи р'еда бум, Хӧдан бәре мьн да мала бьрайед ахайе мьн».
[28] Qизьк р'әви чу у әв йәка мала дийа хwәда гьли кьр.
[29] Бьраки Р'евекайе һәбу наве wи Лабан. Лабан хwә ль канийе гьрт, бәзи чу щәм wи мәрьви,
[30] чьмки әwи qәрәфил у әw базьнед дәстед хушка хwәда дитьбун, ӧса жи әw гьликьрьна хушка хwә Р'евекайе бьһистьбу кӧ готьбу: ‹Әwи мәрьви т'әви мьн аһа хәбәр дайә›, хwә wи мәрьвир'а гиһанд. Дина хwә дайе ва йә әw дәвәйед хwәва wе һе ль сәр канийе йә.
[31] У готә wи: «К'әрәм кә wәрә, бьмбарәке Хӧдан! Тӧ чьма ль дәрва сәкьни йи? Мьн бона тә мал һазьр кьрийә у щи жи бона дәвәйед тә».
[32] Әw мәрьва чу һьндӧр', Лабан баре дәва данин, ка у гиһа кьрә бәр wан, ав жи да кӧ ньгед wи у йед т'әви wи бенә шуштьн.
[33] Паше нан данин ль бәр wи, ле әwи гот: «Һ'әта әз нет-мәрәме хwә гьли нәкьм, әз нен нахwьм». Готьне: «К'әрәм кә бежә».
[34] Һьнге әwи гот: «Әз хӧламе Бьраһим ьм.
[35] Хӧдан гәләки ль сәр ахайе мьнда баранди йә, әw буйә йәки дәwләмәнд, Хӧдан гәләк пәз у дәwар, зер' у зив, хӧлам у щари, дәвә у к'әр данә wи.
[36] Сәрайа жьна ахайе мьн, пиртийа хwәда ахайе мьнр'а кӧр'әк ани, әwи һ'әму һәбука хwә да wи кӧр'и.
[37] Ахайе мьн әз дамә сонде гот: ‹Нәби-нәби кӧ тӧ жь qизед кәнанийа, wәлате к'ижанада әз дьминьм кӧр'е мьнр'а бьхwази.
[38] Ле һәр'и нава олк'а мала баве мьн у пьсмамед мьн, qизе кӧр'е мьнр'а бьхwази›.
[39] Һьнге мьн готә ахайе хwә: ‹Бәлки qизьк нәхwазә т'әви мьн бе›
[40] Әwи готә мьн: ‹Әw Хӧдане ль бәр ч'ә'ве к'ижани кӧ әз р'ийа wида р'аст дьчьм, wе мьлйак'әте хwә т'әви тә р'е дайнә у әwе р'ийа тә р'аст кә, те кӧр'е мьнр'а жь нава пьсмамтийа мьн у олк'а мала баве мьн qизе бьхwази,
[41] wи чахи те жь wи сонде кӧ мьн тӧ дайи сонде аза би, ле гава тӧ һәр'и нава пьсмамтийа мьн у әw qизе нәдьнә тә, тӧ иди жь wи сонде хwә аза йи›.
[42] Әз иро һатьмә ль сәр канийе у мьн гот: ‹Йа Хӧдан, Хwәдейе ахайе мьн Бьраһиме! Һәгәр әв р'ийа кӧ әз ньһа теда дьчьм тӧ р'аст дьки,
[43] әзе ва ль сәр канийа аве бьсәкьньм у гава qизәк бе аве бьк'ьшинә у әз wер'а бежьм: «К'әрәма хwә, жь wи щер'е хwә һьнәк ав бьдә әз вәхwьм»,
[44] у к'ижан кӧ бежә: «Тӧ вәхwә у әз аве дәвәйед тәр'а жи бьк'ьшиньм», бьра һәма әw жи бьбә әw qиза кӧ Хӧдан бона кӧр'е ахайе мьн к'ьфш кьрийә›.
[45] Хәбәрдан һе дәве мьнда бу, ньшкева Р'евека щер' ль сәр мьла һат, бәржер чу канийе ав к'ьшанд, һьнге мьн готе: ‹К'әрәма хwә авәке нади мьн?›
[46] Әwе ләзә-ләз щер' жь сәр мьле хwә дани у гот: ‹Вәхwә у әз дәвәйе тә жи авдьм›, аwа мьн вәхwар у әwе дәвәйед мьн жи авдан.
[47] Һьнге мьн же пьрси: ‹Тӧ qиза к'е йи?› Әwе гот: ‹Әз qиза Бәт'уеле кӧр'е Милк'а жьна Нәһор ьм›, мьн дәрхьст qәрәфил кьрә поза у базьн жи кьрьнә дәста.
[48] Wи чахи әз та бум у дәвәр'уйа чум бәр Хӧдан, шькьри да Хӧдан Хwәдейе ахайе хwә Бьраһим, wәки р'ийа мьн р'аст кьр, кӧ әз нәбийа бьрайе ахайе хwә кӧр'е wир'а бьхwазьм.
[49] Ньһа мьнр'а бежьн: ‹Тәме wә һәйә кӧ һун һ'ӧб у амьнийе ахайе мьнр'а бьдьнә к'ьфше, йан на?› Һәгәр на, мьнр'а бежьн кӧ әз йан р'аст һәр'ьм, йан жи ч'әп».
[50] Лабан у Бәт'уел ле вәгәр'андьн у готьне: «Әв йәк жь Хӧдан ә, әм нә qәнщ дькарьн бежьн, нә хьраб.
[51] Ва йә Р'евека ль бәр тә йә, р'абә һьлдә у һәр'ә, бьра wәкә готьна Хӧдан, әw бьбә жьна кӧр'е ахайе тә».
[52] Гава хӧламе Бьраһим хәбәрдана wан бьһист, һ'әта ә'рде дәвәр'уйа чу, сәре хwә ль бәр Хӧдан дани.
[53] Паше хӧлем хьшьред зер', зив у к'ьнщ дәрхьстьн данә Р'евекайе, хәлатед qимәтә бьһа жи данә бьре у дийа wе.
[54] Һьнге хӧлем т'әви wан мәрьвед кӧ пер'а һатьбун, хwарьн вәхwарьн у шәва хwә ль wьр дәрбаз кьрьн. Сьбәһе зу р'абун, хӧлем гот: «Мьн вәр'екьнә щәм ахайе мьн».
[55] Бьре у дийа кәч'ьке готьне: «Бьра кәч'ьк чәндәки, һәма дәһә р'ожа ль щәм мә бьминә, паше һәр'ьн».
[56] Ле хӧлем готә wан: «Мьн дәрәнги нәехьн, Хӧдан кӧ р'ийа мьн р'аст кьрийә, бьһельн әз һәр'ьм бьгьһижьмә ахайе хwә».
[57] Wана гот: «Әм гази кәч'ьке кьн у хәбәра дәве wе бьзаньбьн».
[58] Һьнге гази Р'евекайе кьрьн у готьне: «Те т'әви ви мәрьви һәр'и?» Әwе гот: «Бәле».
[59] Әвана хушка хwә Р'евека, хwәйкьрийа wе, хӧламе Бьраһим у мәрьвед wи вәр'екьрьн.
[60] Дӧа ль Р'евекайе кьрьн у готьне: «Хушка мә, тӧ бьби дийа һ'әзар-һ'әзара у зӧр'әта тә бажаред нәйаред хwә зәфти хwә кьн».
[61] Р'евека у щарийед wе р'абун, ль дәва сийар бун у ль пәй wи мәрьви чун. Хӧлем Р'евека һьлда у чу.
[62] Исһаq жь Бир-Лаһай-Рои вәгәр'ийабу дьһат, чьмки әw ль Нәщәфе дьма.
[63] Исһаq бәре еваре дәрк'әтьбу чоле к'әтьбу нава мьтала, сәре хwә бьльнд кьр, дина хwә дайе, ва йә дәвә тен.
[64] Р'евекайе кӧ сәре хwә бьльнд кьр Исһаq дит, жь дәве пәйа бу.
[65] У жь хӧлем пьрси: «Әw мәрьве дәштедайи кӧ бәр бь мә те, әw к'и йә?» Хӧлем готе: «Ахайе мьн ә» У әwе хелийа хwә һьлда авитә ль сәр хwә.
[66] Хӧлем һәр тьштед кӧ wи кьрьбун Исһаqр'а гьли кьрьн.
[67] Исһаq Р'евека бьрә коне дийа хwә Сәрайе, әw станд у әw бу кәванийа wи. Әwи әw һ'ьз кьр. У барьстани к'әтә дьла, ль пәй мьрьна дийа wир'а.