<Дәстпебун 9

[1] Хwәде дӧа Нӧһ у кӧр'ед wи кьр гот: «Шин бьн, зедә бьн у ә'рде т'ьжи кьн.

[2] Саw у тьрса wә жи ль сәр һ'әму тәрәwьлед ә'рде у һ'әму тәйрәдед ә'змен бә. Әвана бь т'әви wан һ'әмуйед ль сәр ә'рдейә дьшулькьн у һ'әму мә'сийед бә'рева данә дәсте wә.

[3] Һәр һ'әйwанед кӧ дьһ'әжьн хӧрәке wә бә, мина п'ьнщар'а шин гьшки дьдьмә wә.

[4] Т'әне гошт сахийеда, аwа готи хунева нәхwьн.

[5] Ле әзе ә'сә дә'wа хуна жийина wә бькьм, жь һәр тәрәwьли бьхwазьм. Әзе жийина мерьв, жь дәсте мерьв у жь дәсте бьре wи бьхwазьм.

[6] К'и кӧ хуна мерьв бьр'ежә, хуна wи жи бь дәсте мерьв бьр'ьжә, чьмки мәрьв дьлqе Хwәдеда хӧльqандийи йә.

[7] Һун шин бьн, зедә бьн, ль сәр ә'рде бәла бьн у ль сәр wе ль һәв зедә бьн».

[8] Хwәде готә Нӧһ у кӧр'ед wийә кӧ т'әви wи бун:

[9] «Ва әзе т'әви wә у пәй wәр'а жи т'әви зӧр'әта wә пәймана хwә гьредьм,

[10] ӧса жи т'әви wан һ'әму һ'әйwанед бинбәрә т'әви wә: Т'әви тәйрәда, һ'әйwанед к'әди у һ'әму тәрәwьлед ә'рдейә т'әви wә, т'әви һ'әмуйед жь гәмийе дәрк'әти у һ'әму һ'әйwанед ә'рде.

[11] Әзе пәймана хwә т'әви wә гьредьм, wәки иди т'ӧ бәдән бь ава тофане нәйе һьлатьне у нә жи иди тофан р'абә кӧ ә'рде wеран кә».

[12] Хwәде гот: «Нишана пәймана нава Мьн у wәда у нава һ'әму һ'әйwанед бинбәрә т'әви wә, бона һ'әму дәwра гьредайи, wе әв бә.

[13] Әзе к'әскәсора хwә ә'wрава дәрхьм у әве бьбә нишана пәймана нава Мьн у дьнйайеда.

[14] Гава әз ль сәр дьнйайе ә'wрайи кьм, к'әскәсор ә'wрава хӧйа бә,

[15] һьнге әзе wе пәймана хwәйә нава мьн у wәда у нава һ'әму һ'әйwанед бинбәрә жь һәр бәдәнида бир биньм у аве иди нәбьнә тофан у һәр бәдәни ӧнда нәкьн.

[16] Әw к'әскәсоре нава ә'wрада бә, әзе wе бьбиньм у бир биньм wе пәймана Хwәдейә һ'әта-һ'әтайейә, нава һәр һ'әйwанед бинбәрә жь һәр бәдәни кӧ ль сәр ә'рде йә».

[17] Хӧдан Хwәде Нӧһр'а гот: «Әв ә нишана wе пәймане, йа кӧ мьн нава хwә у һәр бәдәни ль сәр ә'рде гьреда».

[18] Кӧр'ед Нӧһә кӧ жь гәмийе дәрк'әтьн әв бун: Сам, Һам, Йәфәт. У Һам баве Кәнан бу.

[19] Әв һәр се кӧр'ед Нӧһ бун у жь ван ль сәр т'әмамийа р'уйе ә'рде т'ьжи бун.

[20] Нӧһ кӧ ә'рдбещәркьр бу, әw йе ә'wльн бу кӧ р'әзе тьрийа авит.

[21] У паше шәраба wе вәхwар, хwә ӧнда кьр у коне хwәда хwә тә'зи кьр.

[22] Һаме баве Кәнан, кӧ баве хwә тә'зи дит, дәрк'әтә дәрва у готә һәр дӧ бьрайед хwә.

[23] Һьнге Сам у Йәфәт к'ьнщ һьлдан авитьнә ль сәр мьле хwә у пашопе чун тә'зитийа баве хwә ньхамтьн. Пьшта wан кӧ баве wанда бу, wан тә'зитийа баве хwә нәдит.

[24] Гава Нӧһ жь бьн хәwа шәраве дәрк'әт, пе һ'әсийа кӧ кӧр'е wийи бьч'ук чь ль сәре wи кьрьбу,

[25] һьнге гот: «Ньфьр' ль Кәнан бә, әw бьбә хӧламе хӧламед бьре хwә».

[26] Диса гот: «Шькьр жь Хӧдан, Хwәдейе Сам, Кәнан жер'а бьбә хӧлам.

[27] Бьра Хwәде т'ур'а Йәфәт дьреж кә, конед Самда бьминә у Кәнан жи жер'а бьбә хӧлам».

[28] Пәй тофанер'а Нӧһ сесьд пенщи сали ә'мьр кьр.

[29] Т'әмамийа ә'мьре Нӧһ бу нәсьд пенщи сали у мьр.