[1] Әw һәр дӧ мьлйак'әт бәре еваре чунә Содоме. Лут ль бәр дәргәһе Содоме р'уньштьбу. Лут кӧ ч'ә'в wан к'әт, р'абу чу пешийа wан у һ'әта ә'рде дәвәр'уйа чу
[2] гот: «Бәле хwәйед мьн! К'әрәм кьнә ль мала хӧламе хwә, шәва хwә дәрбаз кьн, ньгед хwә бьшон у сьбәһе зу р'абьн р'ийа хwәда һәр'ьн». Ле wан гот: «На, әме шәва хwә ль дәрва дәрбаз кьн».
[3] Лут бь лава-диләка зор ль wан кьр, әw ль сәр wида вәгәр'ийан чунә мала wи. Әwи сьфьрә wанр'а дани, нане шкәва лехьст у хwарьн.
[4] Ле һе нәк'әтьбунә нава щи-ньвина, меред бажер, аwа готи меред содомийа жь ч'ука һ'әта мәзьна, т'әмамийа щьмә'те һәр алийава дора мале гьртьн.
[5] Гази Лут кьрьн у готьне: «К'аненә әw меред кӧ ве еваре һатьнә мала тә? Wан дәрхә бьдә мә, кӧ әм дәст бавежьнә дохина wан».
[6] Лут дерива дәрк'әт у дәри ль пәй хwә гьрт,
[7] wанр'а гот: «Гәли бьра, һиви дькьм, нәһәqийе нәкьн.
[8] Ванә дӧ qизед мьнә бьк'ьр һәнә, әз wан дәрхьм бьдьмә wә, дьле wә чаwа дьхwазә ӧса т'әви wан дәрбаз кьн, ле т'әне дәст нәдьнә ван мәрьва, чьмки ван хwә данә ль бьн сийа бане мьн».
[9] Ле wана гот: «Бьщә'мә!» У готьн: «Һәла ви хәриби кӧ дьхwазә диwане жи бькә? Әме ньһа жь сәре ван хьрабтьр ль сәре тә бькьн». У һәвр'а-һәвр'а һатьнә ви мәрьви, аwа готи Лут. У кьрьн кӧ дери бьшкеньн.
[10] Ле wан мәрьвед меван дәст авитьнә Лут к'аши мале ль щәм хwә кьрьн у дәри гьртьн.
[11] Wана лехьст әw мәрьвед ль бәр дери сәкьни, жь ч'ука һ'әта мәзьна кор кьрьн, ӧса кӧ әwана һаqаси дәри гәр'ийан wәстийан.
[12] Һьнге wан мәрьва готьнә Лут: «Иди к'и тә ль вьр һәйә? Зә'вед тә бьн, кӧр'ед тә бьн, qизед тә бьн у бажерда к'и тә һәбә, һ'әмуйа жи жь ви щийи дәрхә.
[13] Әме ви щийи wеран кьн, чьмки qар'ә-qар'а хьрабийед wан ль сәр Хӧдан гьран бунә у Хӧдан әм шандьнә кӧ әм ве wеран кьн».
[14] Лут дәрк'әт чу зә'вед хwәр'а, аwа готи дәргистийед qизед хwәр'а гот: «Р'абьн жь ви щийи дәрен, чьмки Хӧдане ви бажари wеран кә». Ле зә'вед wи т'ьре әw һ'әнәка дькә.
[15] Гава сьбәһ зәлал бу, мьлйак'әта Лут ләз хьстьн у готьне: «Р'абә бьләзинә, жьна хwә у һәр дӧ qизед ль щәм хwә һьлдә, wәки т'әви нәһәqийа бажер ӧнда нәби».
[16] Лут кӧ ньгед хwә пашда давит, wан мәрьва дәсте Лут, жьне, qизава гьртьн, бь р'ә'ма Хӧданә кӧ ль wан кьр, әw жь бажер дәрхьстьнә дәр у һьштьн.
[17] У гава әw дәрхьстьнә дәр, йәки жь wан гот: «Бьр'әвә хwә хьлаз кә, ль пәй хwә нәньһер'и у ве дәштеда жи т'ӧ щийи нәсәкьни. Бьр'әвә сәре ч'ийа, нәбә кӧ ӧнда би!»
[18] Һьнге Лут готә wан: «На, хwәйе мьн! К'әрәмә бькә!
[19] Аwа кӧ хӧламе тә ль бәр ч'ә'вед тә к'әрәм дитийә у тә әw qәнщийа хwәйә мәзьн һьндава мьнда да к'ьфше, ә'мьре мьн хьлаз кьр. Ле әз нькарьм бьр'әвьмә ч'ийа, кӧ әw бәла нәгьһижә мьн у нәмьрьм.
[20] Ва йә әв гӧнде һан незик у бьч'ук ә. Бь изьна тә әз бьр'әвьмә wьр кӧ ә'мьре мьн хьлаз бә, чьмки әw гӧндәки бьч'ук ә».
[21] У Әwи готә wи: «Аwа әзе ве хwәстьна тә жи бькьм, әw гӧнде бона к'ижани тә гот, сәробьниһәв накьм.
[22] Дә бьләзинә бьр'әвә wьр, чьмки һ'әта кӧ тӧ нәгьһижи wьр, әз нькарьм тьштәки бькьм». Ләма жи наве wи гӧнди Соһар һатә данине.
[23] Тә'ве ль сәр ә'рде п'әнщ дьда, Лут хwә Соһарер'а гиһанд.
[24] Һьнге Хӧдан ль сәр Содом у Гоморайеда к'ьрк'ут у агьр жорда жь Хӧданда баранд,
[25] у әw бажар у т'әмамийа дор-бәред wан, һ'әму бьнәлийед wан бажара у тьштед ль сәр ә'рде шинбуйи qьр' кьр у сәробьниһәв кьр.
[26] Ле жьна Лут пьштева ль пәй хwә ньһер'и у бу һ'әйкәләки хwе.
[27] Бьраһим сьбәһе зу р'абу чу wи щийе кӧ ль бәр Хӧдан сәкьнибу.
[28] Әwи дина хwә да ль алийе Содом у Гоморайе у ль т'әмамийа дор-бәред wан ньһер'и, дит кӧ wе жь wи ә'рди дуки мина дуйе к'ура егьр дәрдьк'әт.
[29] У чахе кӧ Хwәде бажаред wе дәште wе wеран кьрана, Бьраһим һатә бира Хwәде. Гава wе әw бажаред кӧ Лут теда дьма wеран кьра, Лут жь wе хәзәбе хьлаз кьр.
[30] Лут тьрсийа кӧ Зоаре бьминә, әw т'әви һәр дӧ qизед хwә жь Соһаре дәрк'әтьн, р'абунә ч'ийе у ль шкәфтәкеда һеwьрин.
[31] Р'ожәке qиза мәзьн готә йа бьч'ук: «Баве мә кал буйә у ль ви ә'рди жи мер т'ӧнәнә кӧ мина ә'дәте дьне незики мә бьн.
[32] Wәрә әм баве хwә шәрабе бьдьнә вәхwарьне у сәре хwә wир'а дайньн, жь баве хwә бәдәна хwә шин кьн».
[33] Wе шәве баве хwә шәраб данә вәхwарьне, йа мәзьн чу сәре хwә баве хwәр'а дани, ле бав п'алдан-р'абуна wе пе нәһ'әсийа.
[34] Р'ожа дьн qиза мәзьн готә йа бьч'ук: «Ва йә мьн дӧһӧ сәре хwә баве хwәр'а данийә, wәрә ве шәве жи әм шәраве wи бьдьнә вәхwарьне, тӧ һәр'ә сәре хwә wир'а дайнә у әм жь баве хwә бәдәна хwә шин кьн».
[35] Wе шәве жи баве хwә шәраб данә вәхwарьне у qиза бьч'ук р'абу сәре хwә wир'а дани, ле бав п'алдан-р'абуна wе пе нәһ'әсийа.
[36] Бь ви аwайи һәр дӧ qизед Лут жь баве хwә пе ман.
[37] Qиза мәзьн кӧр'әк ани у наве wи Моwаб дани. Әва һ'әта иро жи баве моwабийа йә.
[38] Qиза бьч'ук жи кӧр'әк ани у наве wи Бән-Ә'мми дани. Әва һ'әта иро жи баве амонийа йә.