[1] Ль wәлетда, ль сәр wе хәлайа кӧ һена Бьраһимда бьбу, хәлайикә дьн бу, Исһаq чу Гераре щәм п'адше фьльстинийа Абимәләх.
[2] Хӧдан wива хӧйа бу у готе: «Бәржери Мьсьре нәбә, wи wәлатида бьминә, к'ижани әзе нишани тә кьм.
[3] Ви wәлатида хәрибийеда бьминә, әзе т'әви тә бьм у дӧа ль тә бькьм. Чьмки әзе т'әмамийа ван wәлата бьдьмә тә у зӧр'әта тә у wе сонда хwә, йа кӧ мьн баве тә Бьраһимр'а сонд хwарийә, биньмә сери.
[4] Әзе зӧр'әта тә wәкә стәйркед ә'змен зедә кьм у т'әмамийа ван wәлата бьдьмә зӧр'әта тә у бь зӧр'әта тә wе дӧа ль һ'әму мьләтед дьнйайе бьбә.
[5] Чьмки Бьраһим гӧһдарийа дәнге мьн кьр, фәрманед мьн, т'әмийед мьн, ә'рф-ә'дәтед мьн у һинкьрьнед мьн qәдандьн».
[6] Исһаq Герареда щи-wар бу.
[7] Бьнәлийед wи щийи кӧ пьрса жьна wи Р'евекайе же кьрьн, әwи гот: «Хушка мьн ә». Чьмки әw тьрсийа кӧ wи бьгота: «Жьна мьн ә», дьгот: «Нәбә р'уйе Р'евекайе да мьн бькӧжьн, чьмки Р'евека бәрбьч'ә'вә бәдәw бу».
[8] У гава әw wә'дәки дьреж ль wьр ма, п'адше фьльстинийа Абимәләх р'ожәке п'әнщәрер'а дина хwә дайе, wе Исһаq т'әви жьна хwә Р'евекайе к'еф-һ'әнәк дькьрьн.
[9] Һьнге Абимәләх гази Исһаq кьр у готе: «К'ьфш ә, кӧ әва жьна тә йә, тә чьма гот: ‹Әва хушка мьн ә›?» Исһаq ле вәгәр'анд у готе: «Мьн гот, кӧ нәбә р'уйе wеда әз бемә кӧштьне».
[10] Һьнге Абимәләх готе: «Әв тә чь дани ль сәре мә? Һьндьк мабу кӧ жь нава щьмә'те йәки дәст бавита жьна тә у гӧнә бьк'әта стуйе мә».
[11] Абимәләх т'әми да т'әмамийа щьмә'та хwә у гот: «К'е qәдьре ви мәрьви, йан жьна wи к'әвә, wе ә'сә бе кӧштьне».
[12] Исһаq wи wәлатида ә'рде хwә р'әшанд, Хӧдан сәрда баранд, әwи wе сале сәд щар бәр һьлда.
[13] Әви хwә р'ьнд гьрт, чьqас дьчу хwә дьгьрт у ӧса пешда дьчу, кӧ әwи готьна тә хwә гьрт.
[14] Бу хwәйе кәри у гар'анед пез-деwер у гәләк хӧламед wи һәбун, фьльстинийа һ'әвсудийа wи кьрьн.
[15] Һ'әму әw биред кӧ һена баве wида, хӧламед баве wи Бьраһим вәдабун, фьльстинийа хьтьмандьн, т'ьжи хwәли кьрьн.
[16] Абимәләх готә Исһаq: «Бьһелә жь мә дур к'әвә һәр'ә, чьмки тӧ жь мә дәрбазтьр буйи».
[17] Исһаq жь wьр к'оч' кьр чу, конед хwә дәшта Герареда данин у ль wьр ма.
[18] Исһаq диса әw бир вәдан, йед кӧ һена баве wи Бьраһимда һатьбунә вәдане, к'ижан кӧ пәй мьрьна Бьраһимр'а фьльстинийа т'ьжи кьрьбун, әwи диса әw навед баве хwә данинә ль сәр wан.
[19] Хӧламед Исһаq wе дәштеда вәдан, р'асти ава канийе һатьн.
[20] Шьванед Гераре т'әви шьванед Исһаq шәр' дькьрьн, дьготьн: «Әва ава мә йә». Ләма наве wе бире дани Ә'сеq , чьмки бона wе бире шәр' кьрьн.
[21] Бирәкә дьн вәдан, ль сәр wе жи шәр' кьрьн, наве wе дани Ситна .
[22] Әw жь wьр чу, бирәкә дьн вәда, ль сәр wе шәр' нәкьрьн, һьнге әwи наве wе дани Р'әһ'обот' у гот: «Чьмки Хӧдан әм дәрхьстьнә фьреqәтийе у әме ль сәр ви ә'рди зедә бьн».
[23] Жь wьр жи Исһаq һәвраз чу Бир-Шевайе.
[24] Wе шәве Хӧдан wива хӧйа бу у готә wи: «Әз Хwәдейе баве тә Бьраһим ьм, нәтьрсә, чьмки әз т'әви тә мә, бона хатьре хӧламе хwә Бьраһим, әзе дӧа ль тә бькьм у зӧр'әта та зедә кьм».
[25] Исһаq ль wьр горигәһәк чекьр, гази наве Хӧдан кьр. Коне хwә ль wьр вәгьрт, хӧламед wи ль wьр жи бирәк к'олан.
[26] Wи чахи, Абимәләх бь т'әви ширәтк'аре хwә Аһузат' у сәрәскәре хwә Пихол жь Гераре чунә щәм Исһаq.
[27] Исһаq готә wан: «Һун бона чь һатьнә щәм мьн, нә wә жәнандә мьн у бәри мьн да, әз жь хwә дур хьстьм?»
[28] Wана гот: «Әм баш дьбиньн кӧ Хӧдан т'әви тә йә, ләма мә гот: ‹Әм у тӧ дәсте һәвда сонд бьхwи у т'әви тә пәймане гьредьн,
[29] wәки тӧ хьрабийе ль мә нәки, чаwа кӧ мә дәст нәдайә тә, пештьри qәнщийе, ӧса жи мә тӧ сах-сьламәт вәр'екьр и, жь иро шунда тӧ бьмбарәке Хӧдан и›».
[30] Һьнге Исһаq wанр'а мәсрәфәк дани, wана хwар-вәхwар.
[31] Сьбәһе зу р'абун, дәсте һәвда сонд хwарьн, Исһаq әw вәр'екьрьн. Әwана бь дьле р'ьһ'әт жь щәм wи чун.
[32] Һәма wе р'оже жи, хӧламед Исһаq һатьн бона wе бира кӧ вәдьдан щаб дане у готьне: «Мә ав дит».
[33] Әwи наве wе Шива дани. Бона ве йәк жи наве wи бажари һ'әта ньһа Бир-Шева йә.
[34] Әсаw чьл сали бу, гава wи Йеһудита qиза Берийе һ'ити у Басмәт'а Ейлоне һ'ити стандьн.
[35] Әвана бунә кӧла дьле Исһаq у Р'евекайе.