[1] Аqуб хәбәрдана кӧр'ед Лабан бьһистьн кӧ дьготьн: «Аqуб һ'әму һәбука баве мә бьр у жь һәбука баве мә һаqас һәбук т'оп кьр».
[2] У Аqуб ч'ә'в Лабан к'әт, дина хwә дайе кӧ Лабани һьндава wида нә йе бәре йә.
[3] Һьнге Хӧдан готә Аqуб: «Вәгәр'ә wәлате кал-бавед хwә, ль щи-мьск'әне хwә, әзе т'әви тә бьм».
[4] Аqуб чоле ль бәр пез бу, әwи шанд гази Р'аһеле у Леайе кьр
[5] у готә wан: «Әз дина хwә дьдьмә мьр'узе баве wә, әw һьндава мьнда нә йе бәре йә. Ле Хwәдейе баве мьн, т'әви мьн буйә.
[6] Wәва жи ә'йан ә, кӧ мьн бь т'әмамийа qәwата хwә баве wәр'а хӧламти кьрийә.
[7] Ле баве wә әз дьхапандьм, дәһә щара һәqе мьн гӧһаст, ле Хwәде нәһьшт кӧ әw зийанәке бьдә мьн.
[8] Гава wи дьгот: ‹Бьра йед дәq-дәqи бәр һәqе тәва бьн›, һьнге т'әмамийа пез, дьза дәq-дәqи данин. Ле гава wи дьгот: ‹Бьра йед шьв-шьви бәр һәqе тәва бьн›, һьнге т'әмамийа пез, дьза шьв-шьви данин.
[9] Бь ви аwайи Хwәде һ'әйwанед баве wә жь wи стандьн у данә мьн.
[10] Щарәке wәхте пез фә'ла бу, мьн сәре хwә бьльнд кьр у хәwнеда дина хwә дайе, ва йә кәри бь нерийед шьв-шьви, дәq-дәqи у бәләк дьһатьнә фә'ла.
[11] Һьнге мьлйак'әте Хwәде хәwнеда мьнр'а гот: ‹Аqуб!› У мьн гот: ‹Ләбе, әзи ва мә›.
[12] Әwи гот: ‹К'әрәма хwә, сәре хwә бьльнд кә у дина хwә бьде, ванә һ'әму нерийед кӧ пәз бь wан тенә фә'ла, шьв-шьви, дәq-дәqи у бәләк ьн, чьмки мьн дит һәр тьштед кӧ Лабан сәре тә кьрьн.
[13] Әз Хwәдейе Бет'-Еле мә, wе дәра кӧ тә һ'әйкәл р'ун кьр у ль wьр мьнр'а ад-qьрар кьр, ньһа р'абә жь ви wәлати дәре у вәгәр'ә ль щи-мьск'әне хwә›».
[14] Һьнге Р'аһеле у Леайе ле вәгәр'андьн у готьне: «Гәло иди мала баве мәда, п'ар у wартийа мә һәйә?
[15] Гәло бона wи әм һ'әсаб набьн мина хәриба? Чьмки әwи әм фьротьн у п'әре мә жи хwарьн.
[16] Ләма жи әw һ'әму һәбука кӧ Хwәде жь баве мә станд, йа мә у зар'окед мә йә, ньһа һәр тьштед кӧ Хwәде готийә, бькә».
[17] Аqуб р'абу, жьн у зар'ед хwә ль дәва сийар кьрьн.
[18] Әwи һ'әму һ'әйwанед хwә, һ'әму һәбука хwәйә кӧ qазьнщ кьрьбу у һ'әйwанед хwәйе кӧ ль Паддан-Арамеда qазьнщ кьрьбу, һьлдан р'ек'әт, кӧ һәр'ә щәм баве хwә Исһаq, wәлате Кәнане.
[19] Лабан чубу кӧ пәзе хwә бьбьр'ә, Р'аһел п'утед мала баве хwә дьзин.
[20] Аqуб жь Лабане арами хwә вәдьзи р'әви, чьмки wива ә'йан нәкьрьбу, кӧ wе һәр'ә.
[21] У бь ви аwайи әw бь һ'әму һәбука хwәва р'әви у р'абу жь ч'әме Фьрате дәрбаз бу у бәре хwә да алийе ч'ийайе Гилә'де.
[22] Р'ожа сьсийа щаб данә Лабан, кӧ Аqуб р'әвийә.
[23] Лабан бьратийа хwә жи т'әви хwә һьлда у һ'әфт р'ожа ль пәй wи к'әт. Ль алийе ч'ийайе Гилә'де хwә wир'а гиһанд.
[24] Хwәде шәв һатә хәwна Лабане арами у готә wи: «Мьqати хwә би, кӧ тьштәки qәнщ йан хьраб Аqубр'а нәбежи».
[25] Лабан хwә Аqубр'а гиһанд. Аqуб коне хwә ль ч'ийе вәгьртьбу. Лабан у бьратийа хwә жи конед хwә ль ч'ийайе Гилә'де вәгьртьн.
[26] У Лабан готә Аqуб: «Әв тә чь кьр? Чьма тә хwә жь мьн вәдьзи р'әвийи у тә qизед мьн чаwа һесиред бьн шур бьрьн?
[27] Тә чьма жь мьн вәшарт, дьзива р'әвийи у мьнр'а нә гот? Мьне тӧ бь дьле ша вәр'екьрайи, пе стьрана, дәфа у чәнге зис.
[28] Тә нәһьшт кӧ әз бьһатама р'уйе qизед хwә у нәбийед хwә. Тә бе аqьли кьр.
[29] Дәсте мьнда qәwат һәйә, кӧ хьрабийе ль wә бькьм. Ле Хwәдейе баве wә шәва дәрбазбуйи т'әви мьн хәбәрда у гот: ‹Мьqати хwә би, кӧ тьштәки qәнщ йан хьраб Аqубр'а нәбежи›.
[30] Ле бәле тӧ дьчи-дьчи, фә'мдарийә wәки тә гәләки бира мала баве хwә кьрийә, ле чьма хwәдейед мьн дьзин?»
[31] Аqуб ль Лабан вәгәр'анд у гот: «Чьмки әз тьрсийам, мьн гот бәлки те qизед хwә жь мьн бьстини.
[32] Ле хwәдейед хwә ль щәм к'е бьбини, бьра әw нәжи. Ньһа ль бәр бьратийа мә бьгәр'ә у чи тә ль щәм мьн һәбә һьлдә хwәр'а». Чьмки Аqуб ньзаньбу кӧ Р'аһеле әw дьзинә.
[33] Лабан к'әтә коне Аqуб, коне Леайе у коне һәр дӧ щарийа, ле әw нәдитьн. Жь коне Леайе дәрк'әт, к'әтә коне Р'аһеле.
[34] Р'аһеле әw п'ут һьлдан кьрьнә т'ер'а дәве у ль сәр wан р'уньшт. Лабан т'әмамийа кон ль һәв хьст гәр'ийа, ле әw нәдитьн.
[35] Р'аһеле готә баве хwә: «Бьра хwәйе мьн һерса хwә ль мьн р'анәкә, wәки әз нькарьм ль бәр р'абьм, чьмки әз нәхwәшийа к'ӧлфәтада мә». Лабан гәр'ийа ле п'ут нәдитьн.
[36] Һьнге Аqуб һерс к'әт у бәзи Лабан. Аqуб ль Лабан вәгәр'анд у готе: «Суще мьн чи йә, гӧне мьн чи йә, wәки тӧ пәй мьн к'әт йи?
[37] Тӧ ль нав т'әмамийа һур-муред мьнда гәр'ийайи, тә тьштәки жь мала хwә дит? Дәрхә дайнә ль бәр бьратийа мьн у бьратийа хwә, бьра әw ве пьрсе нава мә һәр дӧйада сафи кьн.
[38] Әва бист сал ә, кӧ әз ль щәм тә дьмам, ми у бьзьнед тә бәрнәавитьнә у мьн бәранед кәрийе тә жи нәхwарьнә.
[39] Йед дә'ва дьгьртьн, мьн нәдани ль щәм тә, зьрара wе мьн дьк'ьшанд, р'оже бьһата дьзин, шәве бьһата дьзин тә жь мьн дьхwәст.
[40] Р'оже жь гәрме, шәве жи жь сәрме дьһ'әлийам-дьмашийам. Хәw жь ч'ә'ве мьн дьт'әqьси.
[41] Бист сали һ'але мьн мала тәда аһа буйә. Мьн чардәһ сала бона һәр дӧ qизед тә тәр'а хӧламти кьр, шәш сала жи бона пәзе тә. Ле тә дәһә щара һәqе мьн гӧһаст.
[42] Һәгәр Хwәдейе баве мьн, Хwәдейе Бьраһим у Хофа Исһаq нә т'әви мьн буйа, тәйе ньһа әз р'аст дәствала вәр'екьрама. Хwәде зәлулийа мьн у хәбат дәсте мьн дит у шәва дәрбазбуйи ль тә һьлат».
[43] Лабан ль Аqуб вәгәр'анд у готе: «Әв qиз qизед мьн ьн, әв зар' зар'ед мьн ьн, әв кәри кәрийед мьн ьн у һәр тьштед кӧ тӧ дьбини, әв т'әв йед мьн ьн. Әз иро чь дькарьм ль qизед хwә бькьм, йан жи ль зар'ед кӧ жь wан бунә?
[44] Ньһа wәрә әз у тӧ пәймане гьредьн у бьра нава мьн у тәда бьбә шә'дәти».
[45] Аqуб кәвьрәк һьлда у әw һ'әйкәл да сәкьнандьне.
[46] Аqуб готә бьратийа хwә: «Кәвьра т'оп кьн». Wан кәвьр анин qуч' кьрьн у ль wьр щәм qуч'е нан хwарьн.
[47] Лабан наве wе qуч'е дани Йьгар-Саһадут'а . Аqуб наве wе дани Галед .
[48] Һьнге Лабан гот: «Әва qуч'а иро нава мьн у тәда шә'дә йә». Ләма наве wе Галед һатә данине,
[49] ӧса жи Миспаһ чьмки wи гот: «Хӧдан ль сәр мьн у тәда бьньһер'ә, гава р'уйе мә һәв дӧ нәк'әвә.
[50] Һәгәр тӧ дьле qизе мьн бешини, йан жи жьнед башqә сәр qизед мьнр'а бьстини, кәс нава мәда т'ӧнә, ле Хwәде нава мьн у тәда шә'дә йә».
[51] Лабан сәрда зедә кьр у готә Аqуб: «Ва йә әв qуч'а у әв һ'әйкәле кӧ мьн нава хwә у тәда да сәкьнандьне.
[52] Әва qуч'а шә'дә йә, әва һ'әйкәла шә'дә йә, кӧ әз жь ве qуч'е дәрбаз нәбьм, тӧ жи жь ве qуч'е у һ'әйкәли дәрбаз нәби бона хьрабийе.
[53] Бьра Хwәдейе Бьраһим у хwәдейе Нәһор (хwәдейе баве wан) нава мәда һ'акьм бьн ». Аqуб пе Хофа баве хwә Исһаq ад-qьрар кьр.
[54] Аqуб ль сәре wи ч'ийайи qӧрбан да у гази бьратийа хwә ль сәр нан кьр. Нан хwарьн у wе шәве манә ль ч'ийе.
[55] Лабан сьбәһе зу р'абу, чу р'уйед нәвийед хwә у qизед хwә у дӧа ль wан кьр, Лабан вәгәр'ийа чу щийе хwә.