[1] Чахе Абрам нод нәһә сали бу, Хӧдан Абрамва хӧйа бу у готе: «Әз Хwәдейе Һәри Зор ьм, р'ийа мьнда һәр'ә у беләк'ә бә.
[2] Әзе пәймана хwә нава хwә у тәда дайньм у гәләки беһ'әсаб тә ль һәв зедә кьм».
[3] Абрам дәвәр'уйа чу. Хwәде хәбәрда у гот:
[4] «Ва йә пәймана мьн т'әви тә йә: Те бьби баве гәләк мьләта.
[5] Иро шунда наве тә нә Абрам бә, ле Бьраһим , чьмки әз тә дькьмә баве гәләк мьләта.
[6] Әзе тә гәләки ль һәв зедә кьм у жь тә мьләта пешда биньм, жь нава тәда жи п'адшайе дәрен.
[7] У Әзе пәймана хwә нава хwә у тәда у пәй тәр'а жи нава зӧр'әта тә у qӧр'нед wанда дайньм, чаwа пәймана һ'әта-һ'әтайе, әзе Хwәдейе тә бьм у пәй тәр'а жи Хwәдейе зӧр'әта тә бьм.
[8] әзе ви wәлате кӧ тӧ теда хәрибийеда йи бьдьмә тә у пәй тәр'а жи бьдьмә зӧр'әта тә, т'әмамийа wәлате Кәнане чаwа мьлк'е һ'әта-һ'әтайе у бьбьмә Хwәдейе wан».
[9] У Хwәде готә Бьраһим: «Ле тӧ пәймана мьн хwәй кә, тӧ у зӧр'әта тәйә ль пәй тәр'а жи qӧр'нед хwәда пәймана мьн хwәй кьн.
[10] Әв ә әw пәймана Мьн, к'ижане кӧ һун гәрәке нава мьн у хwәда у пәй тәр'а жи нава зӧр'әта тәда бе хwәйкьрьне: Һәр зар'е wәйи нерин бе сьнәткьрьне.
[11] Һун жь qальбе хwәйи бесьнәт wәрьнә сьнәткьрьне, әве бьбә нишана пәймана нава мьн у wәда.
[12] Бьра һәр зар'е нерини нава wәда qӧр'нед хwәда, һ'әйштр'ожийеда бе сьнәткьрьне, һәгәр әw жь хӧламе мала тә буйи бә, йан жь һ'әму мьләтед хәрибә нә жь зӧр'әта тә бь п'әра к'ьр'и бә.
[13] Әwе жь хӧламе мала тә буйи у йе кӧ тә бь п'әре хwә к'ьр'и, ә'сә гәрәке бенә сьнәткьрьне у ль сәр qальбе wә әв пәймана мьн бьбә пәймана һ'әта-һ'әтайе.
[14] Һәр зар'е нерини бесьнәт, к'ижан кӧ нәйе сьнәткьрьне, гәрәке әw жь нава щьмә'та хwә бе һьлатьне, чьмки әwи пәймана мьн т'әр'ьбанд».
[15] Пәй ве готьнер'а Хwәде готә Бьраһим: «К'ӧлфәта хwә Сарайер'а нәбежи Сарай, ле наве wе Сәрайи бә.
[16] Әзе дӧа ль wе бькьм у жь wе жи кӧр'әки бьдьмә тә, дӧайе мьне ль wе бә у мьләте жь wе пешда бен у п'адшед мьләта жи wе же дәрен».
[17] Бьраһим дәвәр'уйа чу ә'рде, к'әнийа у дьле хwәда гот: «Гәло зар'е пәй мере сәд сали к'әвә? У Сәрайе нод салийеда зар'а бинә?»
[18] Һьнге Бьраһим готә Хwәде: «Ах хwәзи һәма Исмайил ль бәр ч'ә'ве тә ә'мьр кьра!»
[19] У Хwәде готе: «Бәле! Һәма хут жьна тә Сәрайе кӧр'әки тәр'а бинә у те наве wи Исһаq дайни, әзе т'әви wи у пәй wир'а жи т'әви зӧр'әта wи пәймане гьредьм, пәймана һ'әта-һ'әтайе.
[20] Бона Исмайил жи мьн дәнге тә бьһист. Ва әз дӧа wи жи дькьм у әзе wи шин кьм у гәләки ль һәв зедә кьм. Wе донздәһ мире жь wи дәрен у әзе wи бькьмә мьләтәки мәзьн.
[21] Ле пәймана хwә әзе т'әви Исһаqе кӧ Сәрайе тәр'а бинә гьредьм саләкә дьн ви чахи».
[22] Хwәде кӧ хәбәрдана хwәйә т'әви Бьраһим хьлаз кьр, жь щәм wи һьлатә жор.
[23] Бьраһим һьлда кӧр'е хwә Исмайил у һ'әмуйед кӧ мала wида дьне к'әтьбун у йед кӧ п'әрәти һатьбунә к'ьр'ине, һәма wе р'оже, чаwа кӧ Хwәде готьбуйе, һ'әму qьсьме нерини мала хwәда йә бесьнәт, сьнәт кьрьн.
[24] Гава Бьраһим жь нәсьнәтийа хwә һатә сьнәткьрьне, әw һьнге нод нәһә сали бу.
[25] Исмайиле кӧр'е wи сездәһ сали бу, гава әw жь нәсьнәтийа хwә һатә сьнәткьрьне.
[26] Бьраһим у кӧр'е хwә Исмайилва һәма wе р'оже һатьнә сьнәткьрьне.
[27] Һ'әму qьсьмед нерини мала wида, йед кӧ мала wида дьне к'әтьбун у йед кӧ п'әрәти жь хәриба һатьбунә к'ьр'ине, т'әви wи һатьнә сьнәткьрьне.