[1] Усьв һат Фьрәwьнр'а гьли кьр у гот: «Бав у бьрайед мьн, пәз у дәwаред хwә у һ'әму һәбука хwәва жь wәлате Кәнане һатьнә, әwә ньһа ль т'опрахед Гошәне нә».
[2] Әwи жь нав бьрайед хwәда, пенщ мәри бьрьн дәрхьстьнә диwана Фьрәwьн.
[3] Фьрәwьн жь бьрайед wи пьрси: «Һун хwәйе чь п'ешәйи нә?» Wана готә Фьрәwьн: «Әм, хӧламед тә шьван ьн, әм жи кал-бавед мә жи».
[4] У готьнә Фьрәwьн: «Әм һатьнә кӧ ви wәлатида фьрари бьминьн, чьмки ч'ерә бона һ'әйwанед хӧламед тә т'ӧнә, жь дәст хәлайа гьранә wәлате Кәнанеда, изьна тә һәбә хӧламед тә т'опрахед Гошәнеда бьминьн».
[5] Һьнге Фьрәwьн готә Усьв: «Бав у бьрайед тә һатьнә щәм тә,
[6] wәлате Мьсьре ль бәр тә йә, бав у бьрайед хwә wәлатда щийе һәри qәнщда щиwар кә, бьра әw т'опрахед Гошәнеда бьминьн, ле һәгәр тӧ зани нава wанда йед сәрхwә һәнә, wан бькә сәрwеред һ'әйwанед мьн».
[7] Усьв баве хwә Аqуб ани дәрхьстә диwана Фьрәwьн у Аqуб дӧа ль Фьрәwьн кьр.
[8] Фьрәwьн жь Аqуб пьрси: «Тӧ чәнд сали йи?»
[9] Аqуб ль Фьрәwьн вәгәр'анд у гот: «Салед мьнә фьрари сәд си сал ьн. Салед ә'мре мьн һьндьк у бехер бун у нәгьһиштьнә салед ә'мре кал-бавед мьнә нава р'ожед фьрарийа wанда».
[10] Аqуб дӧа ль Фьрәwьн кьр у жь диwана Фьрәwьн дәрк'әт.
[11] Усьв чаwа Фьрәwьн фәрман кьрьбу, бав у бьрайед хwә wәлате Мьсьреда, щийе һәри qәнщда, жь т'опрахе Р'амсесе, мьлк'әк да wан у әw щиwар кьрьн.
[12] Усьв баве хwә, бьрайед хwә у т'әмамийа мала баве хwә, нәфәред wанва нан дькьрьн.
[13] Т'әмамийа wәлетда нан т'ӧнәбу, чьмки хәлайе гәләки зор дьда у жь дәст бьр'чибуне һ'але wәлате Мьсьре у Кәнане т'ӧнәбу.
[14] Усьв жь йед кӧ гәньм дьк'ьр'ин, һ'әму п'әред кӧ ль wәлате Мьсьре у Кәнанеда һәбун т'оп кьр. Усьв п'әрә анинә мала Фьрәwьн.
[15] Гава п'әре wәлате Мьсьре у Кәнане хьлаз бун, һ'әму мьсьри һатьнә щәм Усьв у готьне: «Нан бьдә мә! Чьма әм ль бәр ч'ә'ве тә бьмьрьн, wәки п'әре мә хьлаз бунә?»
[16] Һьнге Усьв гот: «Һәгәр п'әрә хьлаз бунә, һ'әйwанед хwә биньн, әзе бәр һ'әйwанед wәва хӧрәк бьдьмә wә».
[17] У wана һ'әйwанед хwә анинә щәм Усьв, Усьв бәр һәспед wанва, пәзед wанва, дәwаред wанва, к'әред wанва нан да wан, у wе сале әwи бәр һ'әму һ'әйwанед wанва нан да wан.
[18] Әw сал дәрбаз бу, сала дьн һатьнә щәм wи у готьне: «Әм жь хwәйе хwә вәнашерьн кӧ һ'әму п'әре мә хьлаз бунә, у һ'әйwанед мә жи бунә йед хwәйе мә, иди тьштәки мә бона хwәйе мә нәмайә пештьри бәдәнед мә у ә'рдед мә.
[19] Чьма әм у ә'рдед хwәва ль бәр тә бьмьрьн? Мә у ә'рдед мә жи бь нан бьк'ьр'ә, әм у ә'рдед хwәва бьбьнә хӧламед Фьрәwьн, у т'охьм бьдә мә, кӧ әм бьжин у нәмьрьн, wәки ә'рд вьки-вала нәбә».
[20] Һьнге Усьв т'әмамийа ә'рде Мьсьре Фьрәwьнр'а к'ьр'и, чьмки хәлайе зор дьда wан, мьсьрийа һәр йәки зәвийе хwә дьфьрот. Ә'рде Мьсьре бу йе Фьрәwьн.
[21] Әwи жь сәрики Мьсьре һ'әта сәре дьн, т'әмамийа щьмә'те кьрә хӧлам .
[22] Т'әне ә'рде т'әреqа нә к'ьр'и, чьмки жь алийе Фьрәwьнда п'арәк т'әреqар'а дьк'әт у wана жь wе п'ара кӧ Фьрәwьн дьда wан дьжит, ләма жи ә'рдед хwә нәфьротьн.
[23] Һьнге Усьв готә щьмә'те: «Ва йә мьн һун у ә'рдед wә Фьрәwьнр'а к'ьр'ин, һане wәр'а т'охьм у ә'рде бьчиньн.
[24] Һун гәрәке нандьрунеда жь пенщ п'ара п'арәке бьдьнә Фьрәwьн, ле чар п'аре wәр'а бьминә, бона ә'рде бьчиньн у хwарьна хwә, йед мала хwәда у бона зар'окед хwә».
[25] Wана гот: «Тә әм хьлаз кьрьн! Бьра әм к'әрәме ль бәр ч'ә'ве хwәйе хwә бьбиньн у әм Фьрәwьнр'а бьбьнә хӧлам».
[26] Усьв әв йәк Мьсьреда кьрә qанун, һ'әта р'ожа иро жи жь пенща йәк йа Фьрәwьн ә, пештьри ә'рде т'әреqа, кӧ нәбу йе Фьрәwьн.
[27] Исраел ль wәлате Мьсьре, т'опрахед Гошәнеда дьма, ль wьр бу хwәйимьлк', шин бун у гәләки ль һәв зедә бун.
[28] Аqуб wәлате Мьсьреда һ'ьвдәһ сала сах ма. Т'әмамийа ә'мьре хwә Аqуб сәд чьл у һ'әфт сал бун.
[29] Гава р'ожед мьрьна Исраел незик бун, әwи гази кӧр'е хwә Усьв кьр у готә wи: «Һәгәр мьн ль бәр ч'ә'ве тә к'әрәм дитийә, һиви дькьм, дәсте хwә бькә ль бьн р'ә'не һета мьн . К'әрәма хwә, бьди хатьре һ'ӧб у амьнийе, мьн Мьсьреда дәфьн нәки.
[30] Ле бьра әз т'әви кал-бавед хwә бьһеньжьм, тӧ мьн жь Мьсьре һьлди бьби нав т'ьрбед wанда дәфьн ки». Усьв гот: «Әзе wәкә готьна тә бькьм».
[31] У әwи гот: «Дә мьнр'а сонд бьхwә». Усьв wир'а сонд хwар. Һьнге Исраел сәре хwә ль сәрп'ийа ньвине дани .