[1] Хӧдан Абрамр'а гот: «Жь wәлате хwә, жь пьсмамед хwә у жь мала баве хwә бьqәтә р'абә һәр'ә wи ә'рде кӧ әзе нишани тә кьм.
[2] Әзе тә бькьмә мьләтәки мәзьн, дӧа ль тә бькьм, наве тә мәзьн кьм у те бьмбарәккьри би.
[3] Йед кӧ дӧа ль тә бькьн, әзе дӧа ль wан бькьм у йәки кӧ тә беһӧрмәт кә, әзе ньфьр'а ль wи бькьм. Бь тә дӧайе ль һ'әму бәрәкед дьнйайе бьбә».
[4] Чаwа кӧ Хӧдан готә Абрам әw р'абу р'ек'әт, Лут жи т'әви wи р'абу чу. Гава Абрам жь Һ'аране дәрк'әт, әw һ'әфте пенщ сали бу.
[5] Абрам р'абу жьна хwә Сарайи, бьразийе хwә Лут, һ'әму һәбука хwәйә qазьнщкьри у һ'әму нәфсед хwәйә Һ'аранеда һьлдан кӧ һәр'ә wәлате Кәнане. У әw чунә wәлате Кәнане.
[6] Абрам wи wәлатир'а дәрбаз бу, чу һ'әта Шьхәме, һ'әта дара мә'зейә Морәһ. Һьнге кәнани ль wи wәлатида дьман.
[7] Ле һьнге Хӧдан Абрамва хӧйа бу у готе: «Әзе ви wәлати бьдьмә зӧр'әта тә». Һьнге Абрам, ль wи щийе кӧ Хӧдан wива хӧйа бу, горигәһәк чекьр.
[8] Абрам жь wьр чу ч'ийайе алийе р'оһьлата Бет'-Еле, коне хwә ӧса лехьст, кӧ Бет'-Ел к'әтә р'оавайе, ле Ә'й к'әтьбу р'оһьлате. У ль wьр Хӧданр'а горигәһәк чекьр у гази наве Хӧдан кьр.
[9] Абрам бәрә-бәрә хwә ль Нәщәфе дьгьрт дьчу.
[10] У ль wи wәлатида бу хәлайи, Абрам бәржери Мьсьре бу, кӧ ль wьр фьрари бьминә, чьмки ль wи wәлатида хәлайикә зор бу.
[11] Гава әw незики Мьсьре бу, жьна хwә Сарайир'а гот: «Ва йә, әз заньм кӧ тӧ жьнәкә бәрбьч'ә'вә бәдәw и,
[12] гава мьсьри тә бьбиньн, wе бежьн: ‹Әва жьна wи йә›, wе мьн бькӧжьн у тә сах бьһельн.
[13] Wәрә ве qәнщийе бькә, бежә кӧ тӧ хушка мьн и, wәки бона хатьре тә мьнр'а qәнщи же бе у пе тә әз сах бьминьм».
[14] Гава Абрам к'әтә Мьсьре, мьсьрийа дитьн кӧ әw к'ӧлфәта чьqаси бәдәw бу.
[15] Wәзир-wәк'илед Фьрәwьн жи әw дитьн у пәсьне wе бәр Фьрәwьн дан у Сарайи бьрьнә мала Фьрәwьн.
[16] Әwи бона хатьре Сәрайийе qәнщи ль Абрам кьр у Абрам бу хwәйе пез, деwер, к'әр, хӧлам, щари, к'әред ме у дәва.
[17] Ле бона жьна Абрам Сарайе, Хӧдан qәзиед гьран анинә сәре Фьрәwьн у мала wи.
[18] Һьнге Фьрәwьн гази Абрам кьр у готе: «Әв тә чь ани ль сәре мьн? Тә чьма мьнр'а нәгот, кӧ әва к'ӧлфәта тә йә?
[19] Тә бона чь гот: ‹Әва хушка мьн ә?› Мьн иди әw хwәр'а чаwа жьн дьстанд. Ле ньһа р'абә жьна хwә һьлдә у һәр'ә!»
[20] Һьнге Фьрәwьн т'әмийа wи да мәрьвед хwә, wана Абрам у жьна wи, һәбука wанва вәр'екьрьн.