<Дәрк'әтьн 1

[1] Наве кӧр'ед Исраелә кӧ һәр кәс мала хwәва т'әви Аqуб һатьнә Мьсьре, әв ьн.

[2] Р'убен, Шьмһ'ун, Леwи у Щьһуда,

[3] Исахар, Зәбулон у Бьнйамин,

[4] Дан у Нәфтәли, Гад у Ашер.

[5] Һ'әму нәфсед кӧ жь бәдәна Аqуб бьбун, һ'әфте нәфс бун, Усьв жи ль Мьсьре бу.

[6] Усьв һ'әму бьрайед хwәва у һ'әмуйед wи ньсьлида т'әмам пева мьрьн.

[7] Зар'ед Исраел шин бун, беһ'әсаб ль һәв зедә бун, гәләки qәwат гьртьн у әw wәлат бь wанва т'ьжи бу.

[8] Һьнге сәр Мьсьре йәки ну бу п'адша, кӧ дәрһәqа Усьвда тьштәк ньзаньбу.

[9] Әwи готә щьмә'та хwә: «Ва йә щьмә'та зар'ед Исраел жь мә гәләктьр у qәwаттьр ә.

[10] Wәрьн әм һьндава wанда һ'ьләк'арийе бькьн, кӧ нәбә әw зедә бьн у һәгәр шәр'әк бьqәwьмә, әw жи т'әви дьжмьнед мә бьбьнә йәк у мьqабьли мә шәр' кьн у жь ви wәлати дәрк'әвьн һәр'ьн».

[11] Һьнге сәрк'ар сәр wан к'ьфш кьрьн, wәки бь шьхӧлед гьран wан бьчәрчьриньн. Фьрәwьнр'а бажаред ә'мбара, Пит'ом у Р'амсес чекьрьн.

[12] Ле чьqас әw дьчәрчьрандьн, әw һе гәләк дьбун у ль һәв зедә дьбун, ӧса кӧ мьсьри жь зар'ед Исраел дьтьрсийан.

[13] мьсьрийа беисафи зар'ед Исраел дьданә хәбате.

[14] Ә'мьре wан бь шьхӧле гьран бь һ'әр'ийе у к'әлпич'а, ӧса жи бь һәр шьхӧлед чолева тә'л дькьрьн, һәр хәбата кӧ бьдана кьрьне беисафи дьданә кьрьне.

[15] П'адше Мьсьре т'әви пирәдәргушед ибранийа хәбәрда кӧ наве жь wан йәке Шипраһ у наве йәке жи Пуһаһ бу.

[16] У гот: «Гава к'ӧлфәтед ибранийа бәр зар'ада бьн, һьнге һун ль сәр т'әхт дина хwә бьдьне, һәгәр кӧр' бә бькӧжьн, ле һәгәр qиз бә бьра сах бьминә».

[17] Ле пирәдәргуш жь Хwәде тьрсийан. Чаwа п'адше Мьсьре wанр'а готьбу нәкьрьн, ле йед кӧр'ин жи сах дьһьштьн.

[18] П'адше Мьсьре гази пирәдәргуша кьр у готә wан: «Wә чьма әв йәк аһа кьрийә, кӧ зар'е кӧр'ин жи сах һьштьнә?»

[19] Һьнге пирәдәргуша готә Фьрәwьн: «Чьмки к'ӧлфәтед ибранийа нә мина к'ӧлфәтед мьсьрийа нә, әwә сәрхwә нә, пирәдәргуш һ'әта хwә wанр'а дьгьһиньн әwана иди же хьлаз дьбьн».

[20] Ләма Хwәде пирәдәргушар'а кьрә qәнщи, щьмә'т ль һәв зедә бу у гәләки qәwат станд.

[21] Пирәдәргуш кӧ жь Хwәде тьрсийан, әwи жи малед wан ава кьрьн.

[22] Һьнге Фьрәwьн ә'мьри сәр т'әмамийа щьмә'та хwә кьр у гот: «Һәр зар'әкә кӧр'ини жь дийа хwә буйи бавежьнә ч'әме Ниле у һәр зар'а qизин сах бьһельн».