[1] Гава щьмә'те дина хwә дайе кӧ Муса дәрәнги дьк'әвә жь сәр ч'ийе найе харе, һьнге щьмә'т т'опи щәм Һарун бу у готә wи: «Р'абә мәр'а хwәдейа чекә, кӧ пешийа мә к'әвьн, чьмки әw Мусайе мәрьв, йе кӧ әм жь wәлате Мьсьре дәрхьстьн, әм ньзаньн чь һатә сәре wи».
[2] Һарун готә wан: «Гӧһаред зер'ә кӧ гӧһед жьнед wә, кӧр'ед wә у qизед wәда нә, дәрхьн у биньнә щәм мьн».
[3] У т'әмамийа щьмә'те гӧһаред гӧһед хwәда йә зер' дәрхьстьн у анинә щәм Һарун.
[4] Һарун әw жь дәсте wан һьлдан, qав к'оланд щур'ә дайе у голькәк р'о кьр. Готьн: «Әв ә хwәдейе тә Исраел! Йе кӧ тӧ жь wәлате Мьсьре дәрхьсти».
[5] Гава Һарун әв йәк дит, бәр wи горигәһәк чекьр. Һарун кьрә гази у гот: «Сьбе щәжьна Хӧдан ә».
[6] Р'ожа дьн сәре сьбәһе зу р'абун дийарийед т'әвайишәwате дан у дийарийед һәләqәтийе анин, щьмә'те р'уньшт хwар, вәхwар у р'абун намуса һәвр'а листьн.
[7] Һьнге Хӧдан готә Муса: «Пәйа бә һәр'ә, чьмки щьмә'та тәйә кӧ тә жь wәлате Мьсьре дәрхьст жь р'е шьһ'ьти.
[8] Әвана ӧса зу жь wе р'ийе шьһ'ьтин, йа кӧ мьн т'әми дабу wан. Бона хwә голькәк р'о кьрьн, әw һ'әбандьн, wир'а qӧрбан дан у готьн: ‹Әв ә хwәде тә Исраел! Йе кӧ тӧ жь wәлате Мьсьре дәрхьсти›».
[9] Хӧдан готә Муса: «Мьн дина хwә да ве щьмә'те, ва йә әw щьмә'тәкә сәрһ'ьшк ә.
[10] Ньһа бьһелә кӧ әз һерса хwә ль сәр ванда бьр'ежьм, qьр'а ван биньм. Ле әз тә бькьмә мьләтәки мәзьн».
[11] Ле Муса хwә авитә Хӧдан Хwәдейе хwә у гот: «Йа Хӧдан чьма һерса тә ль сәр щьмә'та тә р'абә, йа кӧ тә жь wәлате Мьсьре бь qәwата мәзьн у бь дәсте зор дәрхьст?
[12] Чьма мьсьри бькьн гьли у бежьн: ‹Бона хьрабийе әw дәрхьстьн, кӧ сәре ч'ийа wан бькӧжә у р'убәри дьне wан нәһелә›? Жь алава һерса хwә вәгәр'ә у ве бәлайе жь сәр щьмә'та хwә пашда һьлдә.
[13] Хӧламед хwә Бьраһим, Исһаq у Исраел бир бинә, к'ижанар'а тә пе нәфса хwә сонд хwар у готә wан: ‹Әзе зӧр'әта wә qаси стәйркед ә'зман ль һәв зедә кьм у т'әмамийа ви ә'рди, бона к'ижани мьн гот әзе бьдьмә зӧр'әтед wә у әwе wанр'а бьбә мьлк'е һ'әта-һ'әтайе›».
[14] Һьнге Хӧдан готьна хwә гӧһаст у бәла кӧ готьбу нәани сәре щьмә'та хwә.
[15] Муса вәгәр'ийа у жь ч'ийе һатә харе, һәр дӧ сәлед Шә'дәтийе жи дәстед wида бун. Сәр һәр дӧ алийа жи ньвисар бун, һьн ви алийи һьн жи wи алийи ньвисар бун.
[16] Сәл шьхӧле дәсте Хwәде бун у ньвисара сәр жи ньвисара Хwәде бу ль сәр сәла к'оланди.
[17] Гава Йешу дәнге qар'ә-qар'а щьмә'те бьһист, готә Муса: « Дәнге шер' жь зоме те».
[18] Муса готе: «Әв нә дәнге qар'ә-qар'а сәрк'әтийа йә, нә жи дәнге qар'ә-qар'а йед данә дәр, ле әз дәнге һәвр'а листьне дьбьһем».
[19] Гава Муса незики зоме бу, ч'ә'в гольке у р'әqасе к'әт, һерса wи р'абу, әw сәлед дәстед хwәда авитьн у бьнат'ара ч'ийеда һурдәхwәши кьрьн.
[20] Голька wанә чекьри һьлда агьрда һ'әланд, һур-һури кьр кьрә т'оз р'әшандә сәр аве у зар'ед Исраел данә вәхwарьне.
[21] Муса готә Һарун: «Әве щьмә'те чь тә кьр, кӧ тә әв гӧнәйе мәзьн ани сәр wан?»
[22] Һарун готе: «Бьра хwәйе мьн һерс нәк'әвә. Тӧ ве щьмә'те нас дьки, әw хьрабийер'а һазьр ьн.
[23] Готьнә мьн: ‹Мәр'а хwәдейа чекә кӧ пешийа мә к'әвьн, чьмки әw Мусайе мәрьв кӧ әм жь wәлате Мьсьре дәрхьстьн, әм ньзаньн чь һатә сәре wи›.
[24] Мьн жи готә wан: ‹Зер'е к'е һәйә бьра дәрхә›. Wан данә мьн, мьн жи әw авитьнә ль нав егьр әв голька дәрк'әт».
[25] Муса дина хwә дайе кӧ щьмә'те һ'әwла хwә жь дәwле авитийә, wе ль бәр дьжмьнед хwә бьбьнә р'обәт, (чьмки Һарун изьн дабу кӧ wана һ'әwла хwә жь дәwле авитьбун).
[26] Һьнге Муса бәр дәргәһе зоме сәкьни у гот: «К'е алийе Хӧдан ә, бьра бе щәм мьн!» Һ'әму зар'ед Леwи щьвийанә щәм wи.
[27] У готә wан: «Хӧдан Хwәдейе Исраел аһа дьбежә: ‹Бьра һәр мәрьв шуре хwә гьредә, зомеда жь дәргәһ һ'әта дәргәһ һәр'ьн wәрьн, һәр мәрьв бьре хwә, һәр мәрьв һәвале хwә, һәр мәрьв щинаре хwә бькӧжә›».
[28] Зар'ед Леwи wәкә готьна Муса кьрьн, wе р'оже жь щьмә'те се һ'әзар мәрьв к'әтьн.
[29] Муса гот: «Иро wә бона хьзмәтк'арийа Хӧдан хwә бь кӧштьна кӧр'е хwә у бьре хwә бӧһӧрти-жьбарә кьр. Ләма иро дӧайе ль сәр wәда бе».
[30] Р'ожа дьне Муса готә щьмә'те: «Wә гӧнәки мәзьн кьрийә. Ва йә әзе һьлк'ьшьмә щәм Хӧдан, бәлки бькарьбьм к'әwандьне жь бәр гӧнед wәва бьдьм кьрьне».
[31] Муса вәгәр'ийа щәм Хӧдан у готе: «Бәле! Әве щьмә'те гӧнәки мәзьн кьр хwәр'а хwәдеки зер'ин чекьр.
[32] Ньһа әз р'әща дькьм гӧне wан бьбахшинә! Ле һәгәр на, һиви дькьм наве мьн жь к'ьтеба хwәйә ньвисар р'әсит кә».
[33] Хӧдан готә Муса: «К'е ль бәр мьн гӧнә кьрийә, әзе wи жь к'ьтеба хwә р'әсит кьм.
[34] Ле ньһа тӧ һәр'ә щьмә'те бьбә wи щийе кӧ мьн тәр'а гот. Ва йә мьлйак'әте мьне пешийа тәва һәр'ә, ле р'ожа щәза әзе бона гӧне wан, wан щәза кьм».
[35] У Хӧдан щьмә'те хьст бона wе голька wанә чекьри, йа кӧ Һарун чекьр.