[1] Хәзуре Муса, Ит'ройе т'әреqе Мьдйане әв һ'әму бьһистьн, кӧ Хwәде бона Муса у щьмә'та хwә Исраел чь кьр у чаwа Хӧдан Исраел жь Мьсьре дәрхьст.
[2] Һьнге Ит'ройе хәзуре Муса, жьна Муса Сиппораһ, пәй пашдабьрьна wер'а һьлда,
[3] т'әви һәр дӧ кӧр'ед wе, наве йәки Гершом бу, чьмки әwи готьбу: «Wәлате хәрибда фьрари мә»
[4] у наве йе дьн Елийазер бу, чьмки әwи готьбу: «Хwәдейе баве мьн алик'аре мьн бу у әз жь шуре Фьрәwьн аза кьрьм».
[5] Хәзуре Муса Ит'ро т'әв һәр дӧ кӧр'ед wи у жьна wи һатә бәр'ийе щәм Муса, wе дәра кӧ әwи бәр ч'ийайе Хwәде зома хwә лехьстьбу.
[6] Әwи щаб да Муса у гот: «Әз хәзуре тә Ит'ро мә, т'әв һәр дӧ кӧр'ед тә у жьна тә темә щәм тә».
[7] Муса р'абу пешийа хәзуре хwәда чу, бәр wи та бу, әw р'амуса, һ'ал-һ'әwале һәв пьрсин у к'әтьнә кон.
[8] Муса әw һ'әму хәзуре хwәр'а гьликьрьн, чь кӧ Хӧдан бона Исраел анибун сәре Фьрәwьн у мьсьрийа, кӧ р'ева чьqас щәфа дитьбун у Хӧдан чаwа әw аза кьрьнә.
[9] Ит'ро ша бу бона wан кьред qәнщә кӧ Хӧдан Исраелр'а кьрьбун, гава әw жь дәсте мьсьрийа аза кьрьнә.
[10] У Ит'ро гот: «Бьмбарәк бә Хӧдан кӧ һун жь дәсте мьсьрийа у жь дәсте Фьрәwьн аза кьрьн, йе кӧ щьмә'та хwә жь бьндәстийа мьсьрийа аза кьр.
[11] Ньһа әз заньм кӧ Хӧдан жь һ'әму хwәдейа мәстьр ә, һәма wе йәкеда бь к'ижана әwана ль бәр исраелийа пе дьфьр'ин».
[12] У Ит'ройе хәзуре Муса дийарийа т'әвайишәwате у qӧрбан Хwәдер'а анин. Һарун у һ'әму р'успийед Исраел т'әв хәзуре Муса һатьн бәр Хwәде нан бьхwьн.
[13] Р'ожтьра дьне Муса р'уньшт кӧ һ'акьмтийе щьмә'те бькә, щьмә'т сәре сьбәһе һ'әта еваре щәм Муса сәкьни ма.
[14] Гава хәзуре Муса әв һ'әму дит кӧ әw чь ль щьмә'те дькә, гот: «Әв чь тьштә кӧ тӧ ль щьмә'те дьки? Чьма тӧ т'әне р'удьнейи у т'әмамийа щьмә'те сәре сьбәһе һ'әта еваре щәм тә дьсәкьнә?»
[15] Муса готә хәзуре хwә: «Чьмки щьмә'т те щәм мьн кӧ жь Хwәде бьпьрсә.
[16] Гава ль нав wанда тьштәк дьqәwьмә әw тенә щәм мьн у әз ль нав һәр дӧ мәрьвада һ'акьмтийе дькьм у әз qанун у һинкьрьнед Хwәде ль бәр wан вәдькьм».
[17] Һьнге хәзуре Муса готә wи: «Кьрьна тә нә тьштәки qәнщ ә,
[18] бь ве йәке һьн те бьһ'әли-бьмаши, һьн жи әв щьмә'та кӧ т'әви тәйә, чьмки әв шьхӧла бона тә гәләки гьран ә, тӧ т'әне нькари ве йәке бьки.
[19] Ньһа гӧһ бьдә готьна мьн, әзе ширәтәке бьдьмә тә у Хwәдейе т'әви тә бә. Бона щьмә'те тӧ һәр'ә ль бәр Хwәде у пьрсед wан дайнә ль бәр Хwәде.
[20] Qанун у һинкьрьна wан һин бькә у wе р'ийа кӧ әw гәрәке теда һәр'ьн бәр wан вәкә, ӧса жи wан кьред кӧ гәрәке бькьн.
[21] Ле тӧ, жь нава һ'әму щьмә'те, мәрьвед жеһати, Хwәдехоф, мәрьвед амьнә кӧ к'ара хwә нагәр'ьн бьбьжерә у жь ван, сәрһ'әзара, сәрсәда, сәрпенщийа у сәрдәһа сәр wан к'ьфш кә.
[22] Бьра һәр гав әвана һ'акьмтийе ль щьмә'те бькьн, һәр тьштед чәтьн тәр'а бежьн, ле йед сьвьк, бьра хwәха һ'акьмтийе бькьн, бь ви аwайи wе жь сәр тә сьвьк бә у wи бари т'әви тә һьлдьн.
[23] Һәгәр тӧ ве йәке бьки у Хwәде жи ӧса тәр'а бежә, һьнге те бькарьби тәйах ки у т'әмамийа ве щьмә'те жи wе хер у сьламәт һәр'ә бьгьһижә щийе хwә».
[24] Муса готьна хәзуре хwә qәбул кьр у әw һәр тьште кӧ wир'а гот кьр.
[25] У Муса жь нава т'әмамийа исраелийа мәрьвед жеһати бьжартьн у әw сәр щьмә'те сәрwер, аwа готи сәрһ'әзар, сәрсәд, сәрпенщи у сәрдәһә к'ьфш кьрьн.
[26] Һәр гав wана һ'акьмтийа щьмә'те дькьр, тьштед чәтьн дьгиһандьнә Муса, ле йед сьвьк хwәха һ'акьмти дькьрьн.
[27] Муса хәзуре хwә вәр'екьр у әw чу wәлате хwә.