[1] Хӧдан готә Муса: «Бәлаке жи әзе биньм сәр Фьрәwьн у Мьсьре, паше wе wә жь вьр бәр'дә, гава һун бәр'дан wе бәри wә дә жь вьр дәрхә.
[2] Ньһа щьмә'тер'а бежә, бьра һәр мерәк жь щинаре хwә у һәр к'ӧлфәтәк жь щинара хwә хьшьред зив у зер'ин бьхwазә».
[3] Хӧдан ль бәр ч'ә'ве мьсьрийа, щьмә'т ширьн кьр. Муса жи wәлате Мьсьреда бәр хӧламед Фьрәwьн у бәр щьмә'те, мәрьвәки гәләки хwәйиqәдьр бу.
[4] Муса готә Фьрәwьн: «Хӧдан аһа дьбежә: ‹Незикийа ниве шәве әзе нава Мьсьрер'а дәрбаз бьм.
[5] Wәлате Мьсьреда һәр ньхӧрийе бьмьрә, жь ньхӧрийе Фьрәwьни кӧ сәр т'әхт р'уньштийә, һ'әта ньхӧрийе щарийа кӧ сәр дәстер' ә у ӧса жи һәр ньхӧрийе һ'әйwен.
[6] У wе зариникә к'ур бьк'әвә т'әмамийа wәлате Мьсьре, кӧ тьште ӧса нә qәwьмийә у нә жи wе бьqәwьмә.
[7] Ле һьндава зар'ед Исраелда, жь мәрьва гьрти һ'әта һ'әйwен, сәке жи зьмане хwә нәльпьтинә. Һьнге һуне бьзаньбьн, кӧ Хӧдан ль нав Мьсьре у Исраелда фьрqийе датинә.
[8] У әв һ'әму хӧламед тә wе бәржер бенә щәм мьн, бәр мьн табьн у бежьн: «Тӧ у т'әмамийа щьмә'та кӧ пәй тә те дәрк'әвә». Пәй ве йәкер'а әзе дәрк'әвьм›». У Муса гәләки һерс жь щәм Фьрәwьн дәрк'әт.
[9] Хӧдан готьбу Муса: «Фьрәwьне гӧр'а wә нәкә, wәки wәлате Мьсьреда нишанед мьн бенә зедәкьрьне».
[10] Муса у Һарун әв һ'әму нишан ль бәр ч'ә'ве Фьрәwьн кьрьн, ле Хӧдан дьле Фьрәwьн кьрә кәвьр у әwи зар'ед Исраел жь wәлате хwә бәр'нәдан.