[1] Хӧдан т'әви Муса хәбәрда у готе:
[2] «Бежә зар'ед Исраел кӧ һ'әдийе мьнр'а биньн, һ'әдийа мьн жь дәсте һәр мәрьви һьлдьн, йед кӧ бь р'әзәдьлийе тиньн.
[3] У әв ьн әw һ'әдийед кӧ һуне жь wан һьлдьн: Зер', зив у сьфьр,
[4] р'исе шин, ширк, соре гәвәз, к'ьтане зьрав у пьр'ч'а бьзьне,
[5] ч'әрмед бәранайә сор р'әнгкьри, ч'әрмед га-мә'сийа , даред дарщеwийе,
[6] бьзьре бона р'онайе, бьһарәтед бона р'уне р'ункьрьне у бона бьхура бинхwәш,
[7] кәвьред оникс у кәвьред qимәтә бона qашкьрьна ефод у р'әхтсинг .
[8] Бьра мьнр'а пирозгәһәке чекьн, кӧ әз нава wанда бьминьм.
[9] Чаwа мьн т'әрзе Коне Шә'дәтийе у һ'әму нав мала wева нишани тә кьр, хут ӧса гәрәке чекьн.
[10] Жь дара дарщеwийе сьндоqәке чекьн, дьрежайийа wе дӧ зәнд у нив, бәрайийа wе зәнд у нив, зәнд у нив жи бьльндайийа wе бә.
[11] Дәр у һьндӧр'е wе бь зер'е хальс зер' ки у дора лева wе т'оqәки зер'ин бавежейи.
[12] Бона wе чар хәлаqед зер'ин р'оки у һәр чар ньгава ки, wәки дӧ хәлаq аликива бьн, дӧ хәлаq жи алийе дьнва.
[13] Жь дара дарщеwийе дәстуйа чеки у wан зер' ки.
[14] Дәстуйа хәлаqед к'еләкед сьндоqер'а дәрбаз ки, кӧ бь wан сьндоq бе һьлдане.
[15] Бьра дәсту хәлаqед сьндоqеда бьминьн, нәйенә дәрхьстьне.
[16] У wе Шә'дәтийа кӧ әзе бьдьмә тә дайни һьндӧр'е сьндоqе.
[17] Qалп'ахе бахшандьне жь зер'е хальс чеки, дьрежайийа wе дӧ зәнд у нив бә, бәрайийа wе жи зәнд у нив.
[18] У сәр һәр дӧ сәрийед qалп'ахе бахшандьне пе зер' дӧ херубе к'оланди чеки.
[19] Херубәки сәрикива дәрхи, херубәки жи сәре дьнва, херуба жь qалп'ахе бахшандьне сәр һәр дӧ сәрийава дәрхи.
[20] Бьра п'әр'ед херуба бәрбь жор вәкьри бьн у бь п'әр'ед хwә qалп'ахе бахшандьне бьньхемьн. Бәре wан һәвдӧда бә у дина wан ль qалп'ахе бахшандьне бә.
[21] Qалп'ахе бахшандьне жорда бьди сәр сьндоqе у Шә'дәтийа кӧ әзе бьдьмә тә дайни һьндӧр'е сьндоqе.
[22] Әзе wьра р'асти тә бем т'әви тә хәбәр дьм, жь сәр qалп'ахе бахшандьне нава һәр дӧ херубед кӧ сәр Сьндоqа Шә'дәтийе нә, һ'әму т'әмийед бона зар'ед Исраел бьдьмә тә.
[23] Жь дара дарщеwийе т'әхтәки чеки, дьрежайийа wи дӧ зәнд, бәрайийа wи зәндәк у бьльндайийа wи зәнд у нив бә.
[24] Wи бь зер'е хальс зер' ки у дора wи т'оqәки зер'ин бавежейи.
[25] У дора wи бьльндайийа чар т'ьлийа кәвийе чеки, дора кәвийа wи жи т'оqәки зер'ин бавежейи.
[26] Бона wи чар хәлаqед зер'ин чеки у wан хәлаqа бәр һәр чар ньга сәр һәр чар ә'нишкава ки.
[27] Гәрәке хәлаq кәвийава бьн, wәки щийед дәстуйа һәбьн кӧ т'әхт бе һьлдане.
[28] Дәстуйа жь дара дарщеwийе чеки, wан зер' ки, бь wан гәрә т'әхт бе һьлдане.
[29] Бона т'әхт сьни у т'аса, щер' у к'аса жь зер'е хальс чеки, wәки бь wан дийарийа сәрдакьрьне бе дайине.
[30] У т'ьме ль сәр т'әхт нане Хwәдер'а дайи ль бәр мьн дайни.
[31] Жь п'арч'әки зер'е хальс шәмданәкә бь к'оландьне бе чекьрьн, бьнгәһа wе, стуна wе, т'аськ, гӧл у севькед wе һ'әму жь wе дәрк'әвьн.
[32] К'еләка wева шәш ч'ьqьл дәрен, се ч'ьqьл алики шәмданева бьн у се ч'ьqьл жи алийе шәмданейи дьнва бьн.
[33] Се т'аськед мина гӧлед бәһиве, севьк у гӧлава ль сәр ч'ьqьләки бьн. Се т'аськед мина гӧлед бәһиве, севьк у гӧлава жи сәр ч'ьqьла дьн бьн, һәр шәш ч'ьqьлед кӧ жь шәмдане дәртен аһа бьн.
[34] Чар т'аськед мина гӧлед бәһиве, севьк у гӧлава стуна шәмданева бьн.
[35] Севькәк бьн һәр дӧ ч'ьqьлед шәмданейә жерьнва, севькәк бьн һәр дӧ ч'ьqьлед навбәрева, севькәк жи бьн һәр дӧ ч'ьqьлед жорьнва бә. Бона һәр шәш ч'ьqьлед стуна шәмдане жи аһа бьн.
[36] Севьк у ч'ьqьлед wе гәрәке жь wе дәрен. Һ'әму жь п'арч'әки зер'е хальс бь к'оландьне бе чекьрьн.
[37] Һ'әфт ч'ьра бона wе чеки у ӧса дайни кӧ әw пешийа хwә р'онайи кьн.
[38] Бьра дәстьк у сьнийед wе жь зер'е хальс бьн.
[39] Шәмдан һ'әму һащәтед wева жьft тәлантәк зер'е хальс бе чекьрьне.
[40] Дина хwә бьде мьн чь т'әрз сәре ч'ийе нишани тә кьр, ӧса жи чеки.