[1] Хwәде әв һ'әму хәбәр готьн:
[2] «Әз Хӧдан Хwәдейе тә мә, йе кӧ тӧ жь wәлате Мьсьре, жь мала хӧламтийе дәрхьсти.
[3] Пештьри мьн хwәдейед тәйә майин т'ӧнә бьн.
[4] Т'ӧ п'ути мина дьлqе тьштәкида хwәр'а ченәки, нә жор ль ә'змен, нә жер ль сәр ә'рде, нә жи нава авед бьн ә'рдеда.
[5] Бәр т'ӧ п'ути та нәби у хӧламтийа wан нәки, чьмки әз Хӧдан Хwәдейе тә Хwәдеки к'ӧмр'әш ьм, кӧ бона нәһәqийед бава тиньмә сәре зар'а, һ'әта ньсьле сьсийа у чара кӧ дьжәньнә мьн,
[6] ле әwед кӧ мьн һ'ьз дькьн у т'әмийед мьн хwәй дькьн, әзе һ'әта һ'әзар ньсьли һьндава wанда һ'ӧба хwәйә амьн бьдьмә к'ьфше.
[7] Наве Хӧдан Хwәдейе хwә бадиһәwа нәди сәр заре хwә, чьмки Хӧдан wе йе кӧ наве wи бадиһәwа дьдә сәр заре хwә, бе щәза наһелә.
[8] Р'ожа шәмийе бинә бира хwә, wәки wе пироз хwәй ки.
[9] Шәш р'ожа бьхәбьтә у һ'әму шьхӧлед хwә бькә,
[10] ле р'ожа һ'әфта, шәмийа р'ьһ'әтийа бона Хӧдан Хwәдейе тә йә, т'ӧ шьхӧли нәки, нә тӧ, нә кӧр'е тә, нә qиза тә, нә хӧламе тә, нә щарийа тә, нә һ'әйwане тә, нә жи хәрибе нава тәда.
[11] Чьмки Хӧдан шәш р'ожада ә'рд у ә'зман, бә'р у һ'әмуйед нав wанда чекьрьн у р'ожа һ'әфта р'ьһ'әт бу, ләма Хӧдан дӧа р'ожа шәмийе кьр у әw пироз кьр.
[12] Qәдьре де у баве хwә бьгьри, wәки ә'мьре тә ль сәр ә'рде кӧ Хӧдан Хwәдейе тәйе бьдә тә дьреж бә.
[13] Нәкӧжи.
[14] Зьнийе нәки.
[15] Нәдьзи.
[16] Мьqабьли т'ӧ кәси шә'дәтийа дәрәw нәди.
[17] Дьлһавьжийа мала т'ӧ кәси нәки. Нә дьлһавьжийа к'ӧлфәта т'ӧ кәси, нә хӧламе wи, нә щарийа wи, нә гайе wи, нә к'әра wи, ӧса жи т'ӧ тьште т'ӧ кәси».
[18] Т'әмамийа щьмә'те qьр'ч'ин у дәнге бор'ийа стьруйе бьһистьн, бьрq вәдана бьруске у дуйе жь ч'ийе дәрдьк'әт дитьн, р'ьсасе щьмә'т гьрт у дур сәкьнин.
[19] Һьнге готьнә Муса: «Тӧ т'әви мә хәбәр дә у әме гӧһдарийа тә бькьн, ле бьра Хwәде т'әви мә хәбәр нәдә, кӧ әм нәмьрьн».
[20] Муса готә щьмә'те: «Нәтьрсьн, чьмки Хwәде һатийә wә бьщер'ьбинә, wәки хофа wи сәр wә бә кӧ һун гӧна нәкьн».
[21] Щьмә'т дур сәкьни, ле Муса чу незики wе тә'рийа шәвәр'әш бу, wе дәра кӧ Хwәде ле бу.
[22] Хӧдан готә Муса: «Аһа бежә зар'ед Исраел: ‹Wә хwәха дит кӧ мьн жь ә'змен т'әви wә хәбәрда.
[23] Сәр мьнр'а хwәдейед зивин ченәкьн, нә жи хwәдейед зер'ин чекьн бона хwә.
[24] Жь ахе горигәһәке мьнр'а чекә. Сәр wе дийарийед хwәйә т'әвайишәwате у йед һәләqәтийе, пәз у дәwаред хwә бьдә. Һәр щийе кӧ әз наве хwә бьдьмә биранине, әзе бемә щәм тә у дӧа тә бькьм.
[25] Һәгәр тӧ мьнр'а пе кәвьра горигәһе чеки, жь кәвьред т'әр'ьшанди ченәки, чьмки гава тӧ һащәт кәвьра хи, те wан бьһ'әр'ьмини.
[26] У пе п'епәлинга һьлнәк'ьши сәр горигәһа мьн, wәки тә'зибуна тә сәр wе вәнәбә›.