[1] Һәгәр йәк га йан пәзәке бьдьзә, сәржекә йан бьфьрошә, бьра жь бәр гайәкива пенщ га у жь бәр пәзәкева жи чар пәза бьдә.
[2] Һәгәр дьз сәр дьзийе бе гьртьне у лехьн бькӧжьн, һьнге бона wи хун нәйе р'етьне.
[3] Ле һәгәр тә'ве дайә сәр wи, бьра хуна wи сәре wи бә. Жь бәр дьзийева гәрәке бе дайине, ле һәгәр тьштәки wи т'ӧнә, һьнге бьра wи бьфьрошьн жь бәр дьзийа wива.
[4] Ле һәгәр дьзийа wи дәсте wида сах бе гьртьне, һәгәр га бә, к'әр бә йан пәз, гәрәке дӧбарә бьдә.
[5] Һәгәр йәк һ'әйwанед хwә ә'рдәки йан р'әзе тьрийада бьч'еринә паше һ'әйwанед wи бьк'әвә ә'рде хәлqе, һьнге бьра жь дәрәмәта ә'рде у р'әзе тьрийе хwәйи һәрә qәнщ жь бәрва бьдә.
[6] Һәгәр агьр стьрийа к'әвә у бавежә гӧр'зед лодкьри йан зәвийа нәдьруйи йан дәште бьшәwьтинә, бьра йе агьр авитийе щьрме бьк'ьшинә.
[7] Һәгәр йәк п'әра йан тьштәки qимәт бьдә йәки дьн кӧ хwәйи кә у жь мала wи бе дьзине, һәгәр дьз бе гьртьне бьра дӧбарә бьдә.
[8] Һәгәр дьз нәйе гьртьне, бьра хwәйе мале бьбьнә бәр һ'акьма , гәло р'аст дәсте wи һәбука wи мәрьви нә к'әтийә.
[9] Бона һәр нәһәqийе, бона га, йан к'әре, йан пез, йан к'ьнща у бона һәр тьштед ӧндабуйи, һәгәр йәк бежә: ‹Әw йа мьн ә›, шьхӧле һәр дӧйа жи һәр'ә бәр һ'акьма , һ'акьм* к'е кӧ нәһәq бьбинә, бьра әw дӧбарә бьдә wи мәрьви.
[10] Һәгәр йәк к'әре йан га, йан пәз, йан жи һ'әйwанәкә дьн бьдә йәки дьн кӧ хwәйи кә у әw һ'ьшк бә, йан зьрарәк ле бьбә, йан бе дьзине у кәсәки нәдитьбә,
[11] һьнге бьра ль бәр Хӧдан сонд бьхwә, кӧ дәсте wи һәбука wи мәрьви нәк'әтийә у хwәйе һәбуке гәрәке баwәр бькә у йед дьн щьрме нәдә.
[12] Ле һәгәр жь щәм wи һатийә дьзине, һьнге бьра һәqе wе бьдә хwәйе wи.
[13] Ле һәгәр һатийә дьр'андьне бьра бәрәт'е бинә у жь бәр wева нәдә.
[14] Һәгәр йәк жь йәки дьн һ'әйwен дәйни һьлдә у зьрарәк ле бьбә йан һ'ьшк бә, хwәйе wе нә wьр бә, гәрәке әw ә'сә щьрме бьдә.
[15] Һәгәр хwәйе wи ль wьр буйә, һьнге әw щьрме надә һәгәр әw бь к'ьре һьлдабу әwе бьк'әвә нава һәqе к'ьре.
[16] Һәгәр йәк qиза бьк'ьр бьхапинә у wе р'ур'әш кә, гәрәке ә'сә qәләне wе бьде у wе жи бьстинә.
[17] Һәгәр баве wе qәт нәхwазә qиза хwә бьдә wи, әw гәрәке wәкә qәләне qиза бьдә.
[18] К'оч'әке сах нәһелә.
[19] К'е сәре хwә һ'әйwенр'а дайнә, гәрәке ә'сә бе кӧштьн.
[20] Пештьри Хӧдан к'е хwәдейед майинр'а qӧрбане бьдә әw бе ӧндакьрьне.
[21] Хәриба нәешинә у wан нәдә щәфе, чьмки һун жи wәлате Мьсьреда хәрибийеда бунә.
[22] Сеwи у жьнәбийе т'ӧ щар нәдә щәфе.
[23] Һәгәр wан бьди щәфе у әw газьне хwә ль мьн бькьн, әзе заринийа wан ә'сә бьбьһем
[24] у һерса хwә р'акьм, бь шур wә бькӧжьм, жьнед wәйе би бьминьн у зар'ед wә жи сеwи.
[25] Һәгәр п'әра дәйни бьди к'әсибәки жь щьмә'та мьнә щәм хwә, мина сәләфдара wи нәхәньqини у сәләфа нәди ль сәр wи.
[26] Һәгәр тӧ к'ьнща йәки дьн бьһе һьлди, һ'әта р'очуйина ава ле вәгәр'ини,
[27] чьмки т'әне әw ә сьт'ара wи у к'ьнща щане wи, әwе чьда р'азе? Нәбә кӧ әw һәwара хwә ль мьн дайнә у әз бьбьһем, чьмки әз р'ә'м ьм.
[28] Һ'акьма беһӧрмәт нәкә у ньфьр'а сәрwере щьмә'та хwә нәкә.
[29] Һ'әдийа бедәре у дәрәмәта хwәйә һ'ьнщьр'андьне дәрәнги нәйехи. Ньхӧрийе кӧр'ед хwә бьдә мьн.
[30] Ӧса жи бона га у пәзе хwә бькә. Һ'әфт р'ожа бьра бәр маке бә у р'ожа һ'әйшта wе бьдә мьн.
[31] Һуне бона мьн мәрьвед пироз бьн, гоште чолейи кӧ һатийә дьр'андьне нәхwьн, бавежьнә бәр са.