[1] Һьнге әв стьрана Муса у зар'ед Исраел Хӧданр'а стьран у готьн: «Хӧданр'а дьстьрем, чьмки әw хwәйе р'умәта мәзьн ә, һәсп у сийари авитьнә бә'ре.
[2] Хӧдан ә qәwата мьн у р'успитийа мьн. Әw мьнр'а бу хьлазбун. Әw ә Хwәдейе мьн у әзе шькьрийе бьдьмә wи. Әw ә Хwәдейе баве мьн у әзе wи бьльнд кьм.
[3] Хӧдан шәр'к'ар ә, наве wи Хӧдан ә.
[4] Ә'рәбед шер' у ордийа Фьрәwьн авитьнә бә'ре, сәрәскәред wийә жьбарә нӧqи Бә'ра Сор бун.
[5] Бебьнийа әw ньхамтьн, мина кәвьр к'әтьнә к'урайе.
[6] Дәсте тәйи р'асте, йа Хӧдан, qӧдрәтева р'умәткьри йә, дәсте тәйи р'асте, йа Хӧдан, дьжмьн һурдәхwәши дькә.
[7] Тӧ бь мәзьнайийа р'умәта хwә, мьqабьлед хwә дәвәр'у дьки, тӧ һерса хwә дьшини, мина хозане wан дьшәwьтинә.
[8] Ав жь һәwа позе тә лод бун, лейи мина диwер сәкьнин, бебьни дьле бә'реда мәwьщин.
[9] Дьжмьн гот: ‹Пәй к'әвьм хwә пер'а бьгьһиньм, т'ален п'арәвәкьм у нәфса мьне пе wан т'ер бә әзе шуре хwә к'аш кьм у дәсте мьне qьр'а wан бинә›.
[10] Ле тә байе хwә р'акьр, бә'ре әw ньхамтьн, ава qәwинда, мина гӧле к'әтьнә бьни.
[11] К'и йә мина тә нав хwәдейада, йа Хӧдан? К'ижан ә мина тә пирозийеда хwәйир'умәт, хwәйипәсьн-qӧдрәт у к'әрәмәткьр?
[12] Дәсте хwәйи р'асте тә дьреж кьр, ә'рде әw даqӧртандьн.
[13] Тӧ бь һ'ӧба хwәйә амьн р'ебәрийа ве щьмә'те дьки, йа кӧ тә хьлаз кьрийә. Тӧ бь qәwата хwә wан дьби хана хwәйә пироз.
[14] Мьләта бьһист у дьләрьзьн, тьрс к'әтә сәр бьнәлийед Фьләсәте.
[15] Һьнге саw к'әтә сәр миред Әдоме, сәрwеред Моwабе ләрьзин у т'әмамийа бьнәлийед Кәнане һ'әлийан.
[16] Хоф у тьрс к'әтә сәр wан, жь мәзьнайийа зәнда тә, wе мина кәвьра сар бьн, һ'әта кӧ дәрбаз бә щьмә'та тә, йа Хӧдан, һ'әта кӧ дәрбаз бә әв щьмә'та, йа кӧ тә станд.
[17] Те wан бини ль ч'ийайе мьлк'е хwә дач'ькини, wи щийи, йа Хӧдан, кӧ тә бона майина хwә чекьр. Wе пирозгәһеда, Хwәйе мьн, кӧ дәстед тә чекьрьн.
[18] Хӧдане һ'әта-һ'әтайе п'адшатийе бькә».
[19] Гава һәспед Фьрәwьн у ә'рәбед wи сийарийава к'әтьнә бә'ре, Хӧдан ава бә'ре сәр wанда вәгәр'анд, ле зар'ед Исраел, ль нав бә'ре сәр зьһайер'а чун.
[20] Мәрйәма хушка Һарунә п'ехәмбәр дәф гьртә дәсте хwә, һ'әму к'ӧлфәт жи дәф дәстада бь р'әqасе ль пәй wе дәрк'әтьн.
[21] У Мәрйәме ль wан вәдьгәр'анд: «Хӧданр'а бьстьрен, чьмки әw хwәйе р'умәта мәзьн ә, һәсп у сийари авитьнә бә'ре».
[22] Муса зар'ед Исраел жь Бә'ра Сор бьрьн, чун гьһиштьнә бәр'ийа Шуре, се р'ожа бәр'ийева чун у р'асти аве нәһатьн.
[23] Гава гьһиштьнә Мараһе, нькарьбун ава Мараһе вәхwарана, чьмки тә'л бу, ләма наве wе Мараһ һатә данине.
[24] Һьнге щьмә'те бина хwә ль Муса тәнг кьр у готе: «Әм чь вәхwьн?»
[25] Һьнге Муса гази Хӧдан кьр, Хӧдан жи дарәк нишани wи да, әwи авитә нава аве у ав хwәш бу. Wе дәре Хӧдан qанун у т'әми данә wан, ль wе дәре әw щер'ьбандьн
[26] у гот: «Р'аст һәгәр тӧ гӧр'а Хӧдан Хwәдейе хwә бьки у әw тьште кӧ wи хwәш тен бьки, гӧһ бьди т'әмийед wи у һ'әму qанунед wи хwәй ки, әзе жь wан нәхwәшийа qәт йәке нәйньмә сәре тә, чь кӧ мьн ани сәре мьсьрийа, чьмки әз Хӧдан ьм, һ'әкиме тә».
[27] Пәй ван йәкар'а әwана гьһиштьнә Елиме, wе дәре донздәһ канийед ава у һ'әфте даред хӧрма һәбун, wе дәре щәм аве конед хwә вәгьртьн.