[1] Бона qӧльхкьрьна Щийе Пирозда, к'ьнщед хьзмәтк'арийе, жь р'исе шин, ширк у соре гәвәз чекьрьн, ӧса жи бона Һарун к'ьнщед пироз чекьрьн, чаwа кӧ Хӧдан т'әми дабу Муса,
[2] Ефод жь зер', р'исе шин, ширк, соре гәвәз у к'ьтане зьрав-бадайи чекьр.
[3] Зер' зьрав пә'н кьрьн у әw мина р'ис бьр'ин, wәки хәбата ньтьрандьнеда т'әви р'исе шин, ширк, соре гәвәз у к'ьтане зьрав бьдьнә хәбате.
[4] Сәрмьлкед һәввабуне жер'а чекьрьн, кӧ әw һәр дӧ сәрийава дьһатьнә һәввакьрьне.
[5] Бәнпьшта ль сәр ефод жи мина ефод һунанди-ньтьранди, жь зер', р'исе шин, ширк, соре гәвәз у к'ьтане зьрав-бадайи wева һатьбу чекьрьне, чаwа кӧ Хӧдан т'әми дабу Муса.
[6] Кәвьред оникс һазьр кьрьн, нава qавед зер'инда qаш кьрьн у ль сәр wан чаwа мор те к'оландьне, ӧса навед зар'ед Исраел һатьнә к'оландьне.
[7] У әw ль сәр сәрмьлке ефодва кьрьн, кӧ зар'ед Исраелр'а бьбьнә кәвьред биранине, чаwа кӧ Хӧдан т'әми дабу Муса.
[8] Р'әхтсинг ньтьранди wи щур'е чекьрьна ефодда чекьрьн. Әw жь зер', р'исе шин, ширк, соре гәвәз у жь к'ьтане зьрав-бадайи чекьрьн.
[9] Р'әхтсинг дӧ та qаткьри чаргошә бу, дьрежайа wе бьһӧстәк у бәрайа wе жи бьһӧстәк, дӧ та qаткьри.
[10] Ль сәр wе чар щергә кәвьр qаш кьрьн. Щерга ә'wльн: Сардийон, топаз у зьмруд,
[11] щерга дӧда: Карбункул, сафир у алмас,
[12] щерга сьсийа: Йахонит, агат у аместис,
[13] щерга чара: Хризолит, оникс у йаспис, әвана qаве зер'да qашкьри бун.
[14] Әв кәвьр донздәһ һ'әб бун, анәгори навед зар'ед Исраел, мина море к'олайи сәр һәр кәвьри навәки wан һатьбу к'оландьне бона донздәһ qәбила.
[15] Сәр р'әхтсинг зьнщиред бадайи чекьрьн, әw вәгьрти жь зер'е хальс бун.
[16] Дӧ qавед зер' у дӧ хәлаqед зер' чекьрьн у әw һәр дӧ хәлаq, сәр һәр дӧ сәре р'әхтсингва кьрьн.
[17] Әw һәр дӧ зьнщиред зер', һәр дӧ хәлаqед сәр р'әхтсингва кьрьн.
[18] У һәр дӧ сәрийед зьнщирайә дьн һәр дӧ qавава кьрьн, паше алийе пешийева сәрмьлке ефодва кьрьн.
[19] Дӧ хәлаqед зер'инә дьн чекьрьн әw бьн р'әхтсингва һәр дӧ ньч'ед жерьнва алийе ефодва кьрьн.
[20] Дӧ хәлаqед зер'инә дьн жи чекьрьн, әw бьн һәр дӧ ньч'ед сәрмьлкед ефодва кьрьн. Алийе пешийева бәр щийе певакьрива сәр бәнпьшта ефодва кьрьн.
[21] Бь qәйт'ана шин хәлаqед р'әхтсинг хәлаqед ефодва кьрьн, кӧ әw сәр бәнпьшта ефод бә у р'әхтсинг жь ефод нәqәтә, чаwа кӧ Хӧдан т'әми дабу Муса.
[22] Чӧхе ефод хӧр'у бь р'әнге шин һунандьн.
[23] Нава wи вәкьри бу мина бәрстуйе еләкзьрьһ', дора wи дьрути бу кӧ жь бәр һәв нәчә.
[24] П'еша чӧх жь р'исе шин, ширк, соре гәвәзи бадайи һ'ьнар р'иши кьрьн.
[25] Жь зер'е хальс зәнгьл чекьрьн, әw зәнгьл ль навбәра һәр һ'ьнареда, ль сәр п'еша чӧхва кьрьн.
[26] Ль сәр п'еша чӧхе хьзмәтк'арийе, навбәра һәр һ'ьнареда зәнгьләк һәбу. Чаwа кӧ Хӧдан т'әми дабу Муса.
[27] Бона Һарун у кӧр'ед wи бь хәбата һунандитийе жь к'ьтане зьрав кьрас чекьрьн.
[28] Ӧса жи жь к'ьтане зьрав п'ап'ах, к'олоз чекьрьн у жь к'ьтане зьрав-бадайи к'ьнщед бьни чекьрьн.
[29] Бәнпьшт жи жь к'ьтане зьрав-бадайи, жь р'исе шин, ширк, соре гәвәз, бь хәбата нәqьшандитийе чекьр, чаwа кӧ Хӧдан т'әми дабу Муса.
[30] Бәрә'нийа к'офийа пироз жь зер'е хальс чекьрьн у сәр wе мина мор к'оландьне ньвисин: «Пироз Хӧданр'а».
[31] Әw авитьнә ль сәр qәйт'ана шин, wәки жорва ль сәр п'ап'ахва бе гьредане, чаwа кӧ Хӧдан т'әми дабу Муса.
[32] Бь ви щур'әйи һ'әму шьхӧлед ль сәр Коне Шә'дәтийе, аwа готи Коне Щьвине һатә сери. Зар'ед Исраел һәр тьшт, чаwа кӧ Хӧдан т'әми дабу Муса, ӧса жи кьрьн.
[33] У Коне Шә'дәтийе анинә щәм Муса, аwа готи: Кон у һ'әму навмала wе, qәмьтокед wе у читед wе, дәстуйед wе, стун у бьнгәһед wе,
[34] сәргьртьна жь ч'әрмед бәранайә сор р'әнгкьри у сәрк'еша жь ч'әрмед га-мә'си у п'әр'да навбьр'ийе,
[35] Сьндоqа Шә'дәтийе у дәстуйед wе, qалп'ахе бахшандьне,
[36] т'әхт у һ'әму дәрданед wе у нане Хwәдер'а дайи,
[37] шәмдана жь зер'е хальс ч'ьрайед сәрә щи бь щи р'ез кьри, һ'әму һащәтед хwәва у бьзьре р'онайе,
[38] горигәһа зер'ин, р'уне р'ункьрьне, бьхура бинхwәш, п'әр'да бәр дәре кон,
[39] горигәһа сьфьр у чита wейә сьфьр, дәстуйед wе у һ'әму һащәтед wе, т'әшт у бьнгәһа wе,
[40] п'әр'дед һ'әwше, стунед wе, бьнгәһед wе, п'әр'да бәр дәре һ'әwше, һәбьнед wе у сьнгед wе, һ'әму һащәтед хьзмәтк'арийе, бона Коне Шә'дәтийе, аwа готи Коне Щьвине,
[41] к'ьнщед qӧльхкьрьнейә бона хьзмәтк'арийа Щийе Пирозда, к'ьнщед пироз к'аһин Һарунр'а, ӧса жи к'ьнща кӧр'ед wир'а кӧ к'аһинтийе бькьн.
[42] Зар'ед Исраел һәр тьшт чаwа Хӧдан т'әми дабу Муса, ӧса жи кьрьн.
[43] Муса дина хwә да һ'әму тьште чекьри, кӧ ва йә чаwа кӧ Хӧдан т'әми дабу wана, ӧса жи кьрьнә. Муса дӧа wан кьр.