Дәрк'әтьн 3
[1] Муса пәзе хәзуре хwә Ит'ройе т'әреqе Мьдйане дьч'еранд. Әwи кәри ажот чу бәр'ийе дәрк'әт у гьһиштә Һ'оребе , ч'ийайе Хwәде.
[2] Мьлйак'әте Хӧдан бь алава егьр нава дьр'ийеда wива хӧйа бу. Әwи дина хwә дайе wе алав дьр'ийе к'әтийә дьшьхӧлә, ле дьр'и нашәwьтә.
[3] Һьнге Муса гот: «Һәла вәгәр'ьм ве дитьна ә'щеб бьбиньм, к'а чьма дьр'и нашәwьтә?»
[4] Хӧдан дина хwә дайе, wәки әw вәгәр'ийа кӧ бьбинә, Хwәде жь нава дьр'ийе гази кьре у гот: «Муса, Муса!» Әwи гот: «Әз ва мә».
[5] Хwәде готе: «Незики вьр нәбә. Чарьхед ньгед хwә бехә, чьмки әw щийе кӧ тӧ ль сәр сәкьнийи ә'рде пироз ә».
[6] У гот: «Әз Хwәдейе баве тә, Хwәдейе Бьраһим, Хwәдейе Исһаq у Хwәдейе Аqуб ьм». Һьнге Муса р'уйе хwә ньхамт, чьмки тьрсийа кӧ Хwәде бьньһер'ә.
[7] Хӧдан гот: «Бәле мьн щәфе щьмә'та хwәйә Мьсьреда дит у qар'ә-qар'а wан жь дәст сәрк'аред wан бьһист, чьмки әз һаш жь тәнгасийа wан һәмә.
[8] Әз пәйа бум wана жь дәсте мьсьрийа аза кьм у wан жь әwи wәлати дәрхьмә wәлатәки р'ьнд у бәрфьрә, wәлате кӧ шир у һьнгьв же дьк'ьшә, wи щийе кәнанийа, һ'итийа, әморийа, пьриззийа, һ'иwийа у йәбусийа.
[9] У ньһа ва йә qар'ә-qар'а зар'ед Исраел гьһиштийә мьн у әw зордарийа кӧ мьсьри ль wан дькьн мьн дит.
[10] Ньһа wәрә, әз тә бьшиньмә щәм Фьрәwьн, кӧ тӧ щьмә'та мьн, зар'ед Исраел жь Мьсьре дәрхи».
[11] Һьнге Муса готә Хwәде: «Әз к'и мә кӧ һәр'ьмә щәм Фьрәwьн у зар'ед Исраел жь Мьсьре дәрхьм?»
[12] Хwәде готе: «Әзе т'әви тә бьм. Әве тәр'а бьбә нишана кӧ мьн тӧ шандийи: гава тӧ щьмә'те жь Мьсьре дәрхи, сәр ви ч'ийайи һуне Хwәдер'а хӧламтийе бькьн».
[13] Муса готә Хwәде: «Ва әз дьчьмә щәм зар'ед Исраел у бежьмә wан: ‹Хwәдейе кал-бавед wә әз шандьмә щәм wә›. Ле гава әw жь мьн бьпьрсьн: ‹Наве wи чь йә?› Әз чь wанр'а бежьм?»
[14] Хwәде готә Муса: «ӘЗ ЙЕ ҺӘМӘ. Ве йәке бежә зар'ед Исраел, бежә кӧ: ‹ӘЗ ҺӘМӘ әз шандьмә щәм wә›».
[15] Диса Хwәде готә Муса: «Аһа бежи зар'ед Исраел: ‹Хӧдан , Хwәдейе кал-бавед wә, Хwәдейе Бьраһим, Хwәдейе Исһаq у Хwәдейе Аqуб әз шандьм щәм wә›. Һ'әта-һ'әтайе наве мьн әв ә у һ'әму ньсьлада әзе аһа бемә биранине.
[16] Һәр'ә р'успийед Исраел т'оп кә у бежә wан: ‹Хӧдан, Хwәдейе кал-бавед wә, Хwәдейе Бьраһим, Исһаq у Аqуб мьнва хӧйа бу у гот: Әз сәр wәда һатьмә у мьн дит кӧ Мьсьреда чь һатийә сәре wә›.
[17] У гот: ‹Әзе wә жь щәфе Мьсьре дәрхьм у бьбьмә wәлате кәнанийа, һ'итийа, әморийа, пьриззийа, һ'иwийа у йәбусийа, wи wәлате кӧ шир у һьнгьв же дьк'ьшә›.
[18] Әwе гӧр'а тә бькьн һьнге тӧ т'әви р'успийед Исраел һәр'ә щәм п'адше Мьсьре у жер'а бежьн: ‹Хӧдан Хwәдейе ибранийа мәва хӧйа бу, ньһа изьна тә һәбә, әм р'ийа се р'ожа бәрбь бәр'ийе һәр'ьн, Хӧдан Хwәдейе хwәр'а qӧрбане бьдьн›.
[19] Бәле әз заньм, кӧ п'адше Мьсьре wе изьна wә нәдә кӧ һун һәр'ьн, һәгәр нә бь дәсте зор бә,
[20] ле әзе дәсте хwә дьреж кьм у бь wан һ'әму к'әрәмәтед хwә Мьсьре хьм, йед кӧ әзе нав wеда бькьм, паши һьнге әwе wә бәр'дә.
[21] У әзе ль бәр ч'ә'ве мьсьрийа ве щьмә'те ширьн кьм, wәки гава кӧ һун дәрк'әвьн, дәствала дәрнәк'әвьн.
[22] Ле бьра һәр к'ӧлфәт жь щинара хwә у жь к'ӧлфәта кӧ мала wеда дьминә, хьшьред зивин у хьшьред зер'ин, ӧса жи к'ьнща же бьхwазә у wан ль кӧр' у qизед хwәва кьн у мьсьрийа т'алан кьн».