[1] Хӧдан wәлате Мьсьреда т'әв Муса у Һарун хәбәр да у гот:
[2] «Әва мәһа ль нава мәһада wәр'а бьбә йа пешьн , әw ль нава мәһед саледа wәр'а бьбә йа пешьн.
[3] Һ'әму щьвина Исраелр'а хәбәр дьн у бежьн: ‹Дәһе ве мәһе, бьра һәр мәрьвәк бона мала хwә бәрхәки һьлдә, сәре һәр мале бәрхәк.
[4] Ле һәгәр нәфәре маләке һьндьк бьн, wе нькарьбьн бәрхәки бьхwьн, бьра т'әви wи щинаре незики мала хwә бьбә йәк, wи бәрхи һьлдә бавежә сәр һ'әсабе нәфәра, к'а һәр кәсе чьqаси бькарьбә бьхwә.
[5] Бәрхе wә бьра беqӧсур нер у йәксали бә, жь пез йан жи жь бьзьна һьлдьн.
[6] Wи хwәй кьн һ'әта чардәһе ве мәһе, паше т'әмамийа щьвина мьхӧлqәта Исраел, чахе р'о дьчә ава wе сәржекә.
[7] Бьра жь wе хуне һьлдьн, һәр дӧ рәхдәрийа у дәрәзунга дәре wе мале хьн, к'идәре wе wи бәрхи бьхwьн.
[8] Бьра wе шәве гоште wи бьхwьн, әwи сәр егьр бьпежьн, пе нане шкәва у п'ьнщар'а тә'л бьхwьн.
[9] Жь wи гошти, хав йан аведа к'әланди нәхwьн, ле сәр егьр пьжанди бә, т'әви сәр п'е у дьл һ'ьнава.
[10] Һ'әта сәре сьбәһе жь wи тьштәки нәһельн, ле чь жи бьминә һ'әта сьбәһе сәр егьр бьшәwьтиньн.
[11] Бь ви аwайи wи бьхwьн, бьра пьште wә гьредайи бьн чарьхед wә ньгед wәда бьн у шьв жи дәсте wәда бьн, һун wи зу бьхwьн. Әw Дәрбазбуна Хӧдан ә.
[12] Wе шәве әзе нава wәлате Мьсьрер'а дәрбаз бьм у һәр ньхӧрийе wәлате Мьсьре хьм, жь мерьв гьрти һ'әта һ'әйwен. Әзе диwана һ'әму хwәдейед Мьсьре бькьм. Әз Хӧдан ьм.
[13] Хуне бона wә бьбә нишан ль сәр малед к'идәре һун дьминьн. Гава әз wәлате Мьсьре хьм у wе хуне бьбиньм, һьнге әзе сәр wәр'а дәрбаз бьм у бәлайе сәр wәда нәйе кӧ wә ӧнда кә.
[14] Бьра әw wәр'а бьбә р'ожәкә биранине, wе бона Хӧдан хwәй кьн, бьра әва щәжьна нава ньсьлед wәда бьбә ә'рф-ә'дәте һ'әта-һ'әтайе.
[15] Һ'әфт р'ожа нане шкәва бьхwьн. Һәма р'ожа пешьнда һәвиртьр'шк жь мала хwә дәрхьн, чьмки жь р'ожа пешьнда һ'әта р'ожа һ'әфта к'е кӧ тьштед һәвиртьр'шккьри бьхwә, wе жь нав Исраел бе р'аqәтандьне.
[16] Бьра р'ожа пешьн wәр'а бьбә щьвина пироз у р'ожа һ'әфта жи щьвина пироз. Wан р'ожада т'ӧ шьхӧл нәйе кьрьне, пештьри хwарьнед хwә кӧ һәр кәс хwәр'а дькарә һазьр кә.
[17] Щәжьна Нане Шкәва хwәйи кьн, чьмки һәма wе р'ожеда мьн р'әфед wә жь wәлате Мьсьре дәрхьстьн, ӧса кӧ әве р'оже ль нав ньсьлед хwәда хwәйи кьн, чаwа ә'рф-ә'дәте һ'әта-һ'әтайе.
[18] Жь р'ожа чардәһе мәһа пешьн евареда, һун гәрәке нане шкәва бьхwьн һ'әта евара р'ожа бист йәке wе мәһе.
[19] Һ'әфт р'ожа һәвиртьр'шк малед wәда т'ӧнә бә, чьмки ки кӧ тьштед һәвиртьр'шккьри бьхwә, wе жь нав щьвина Исраел бе р'аqәтандьне, һәгәр хәриб бә йан бьнәли бә.
[20] Тьштәки һәвиртьр'шккьри нәхwьн. Wан һ'әму щийада к'идәре кӧ һун дьминьн нане шкәва бьхwьн›».
[21] Муса гази һ'әму р'успийед Исраел кьр у готә wан: «Анәгори сәре нәфәред хwә хwәр'а бәрхәки бьбьжерьн у Дәрбазбуне сәржекьн.
[22] Паше qәвр'әкә зоха һусопе һьлдьн хуна т'әштеда кьн у жь wе хуна т'әште дәрәзунге у һәр дӧ р'әхдәрийа хьн. Бьра жь wә т'ӧ кәс һ'әта сәре сьбәһе жь дәре мала хwә дәрнәк'әвә.
[23] Wе Хӧдане дәрбаз бә кӧ мьсьрийа хә, ле гава хуна дәрәзунге у һәр дӧ р'әхдәрийава бьбинә, һьнге Хӧдане сәр wи дәрийир'а дәрбаз бә у нәһелә кӧ мьлйак'әте бәладар бьк'әвә мала wә.
[24] У ве йәке чаwа qанун, бона хwә у зар'ед хwә һ'әта-һ'әтайе хwәйкьн.
[25] Гава һун һәр'ьнә wи wәлате кӧ Хӧдане бьдә wә, чаwа кӧ әwи wәр'а соз дайә, ве дәрәще бькьн.
[26] Ле гава зар'ед wә жь wә бьпьрсьн: ‹Әв чь дәрәщәйә кӧ һун дәрбаз дькьн?›
[27] һьнге бежьн: ‹Әва qӧрбана Дәрбазбуна Хӧдан ә кӧ Мьсьреда ль сәр малед зар'ед Исраелр'а дәрбаз бу, мьсьрийа хьст у малед мә хьлаз кьрьн›». Щьмә'т дәвәр'уйа чу у һ'әбанд.
[28] У зар'ед Исраел чун кьрьн, чаwа кӧ Хӧдан ә'мьри ль Муса у Һарун кьрьбу, ӧса жи кьрьн.
[29] У гава бу кӧ wәлате Мьсьреда Хӧдан ниве шәве һәр ньхӧрийи хьст, жь ньхӧрийе Фьрәwьни кӧ сәр т'әхте хwә р'уньшти, һ'әта ньхӧрийе гьртийе кәледа у ӧса жи һәр ньхӧрийе һ'әйwен.
[30] Wе шәве Фьрәwьн, һ'әму хӧламед wи у һ'әму мьсьри р'абун. Заринәкә к'ур к'әтьбу Мьсьре, чьмки мал т'ӧнәбу кӧ мьри теда т'ӧнәбуйа.
[31] Шәв гази Муса у Һарун кьр у гот: «Р'абьн жь нав щьмә'та мьн дәрк'әвьн һәр'ьн, һун жи зар'ед Исраел жи, һәр'ьн Хӧданр'а хӧламтийе бькьн чаwа wә гот.
[32] Пәз у дәwаред хwә жи һьлдьн һәр'ьн, чаwа wә гот у дӧа мьн жи бькьн».
[33] Мьсьрийа п'ейи ль сәр щьмә'те кьр, wәки wан зу жь wәлет дәрхьн, чьмки дьготьн: ‹Әме һ'әму бьмьрьн›.
[34] Һәвир һе һьлнәһати, щьмә'те һәвир шкәвава ль нав дәстәханада п'еч'ан у данә ль сәр мьле хwә.
[35] Чаwа Муса зар'ед Исраелр'а готьбу ӧса жи кьрьн, жь мьсьрийа хьшьред зив, хьшьред зер' у к'ьнщ хwәстьн.
[36] Хӧдан щьмә'т ль бәр ч'ә'ве мьсьрийа ширьн кьр. У чь кӧ хwәстьн мьсьрийа данә wан. У мьсьри т'алан кьрьн.
[37] Зар'ед Исраел жь Р'амсесе к'оч'кьрьн чунә Сукоте, пештьри жьн у зар'а шәсьд һ'әзар меред пәйа бун.
[38] Т'әви wан ә'лаләтәкә гьран жь гәләк мьләта жи һәвраз чун, пәз у дәwаред wан, кәре һ'әйwана гәләки зә'ф бун.
[39] Жь wи һәвире кӧ т'әви хwә жь Мьсьре анибун, тотьке шкәва пә'тьн, чьмки һе һьлнәһатьбу. Жь Мьсьре бәри wан дабун, wана нькарьбу хwә дәрәнги хьстана, һ'әта кӧ нане р'е жи хwәр'а һазьр нәкьрьн.
[40] Зар'ед Исраел чарсьд си сали Мьсьреда ман.
[41] Һәма wе р'ожа хьлазийа чарсьд си салийе һ'әму р'әфед Хӧдан жь Мьсьре дәрк'әтьн.
[42] Әва шәвәкә Хӧдан хwәйи дькә кӧ wан жь Мьсьре дәрхә. Әва әw шәвайә бона Хӧдан, к'ижан кӧ гәрәке нава зар'ед Исраелда qӧр'нә-qӧр'нә бе хwәйикьрьне.
[43] Хӧдан готә Муса у Һарун: «Әв ә ә'рф-ә'дәте Щәжьна Дәрбазбуне. Т'ӧ кәси хәриб гәрәке жь wе нәхwә.
[44] Ле һәр хӧламе кӧ п'әрәти һатийә к'ьр'ине, wи сьнәт ки, һьнге дькарә жь wе бьхwә.
[45] Йед хәриб у к'ьрекьри, гәрәке жь wе нәхwьн.
[46] Маләкеда гәрәке әw бе хwарьне, wи гошти жь мал дәрнәхи у qәт һәстуки wи жи нәшкеньн.
[47] Т'әмамийа щьвина Исраел бьра ве йәке бькә.
[48] Ле гава мәрьвәки хәриб щәм тә бьминә у бьхwазә Дәрбазбуна Хӧдан бькә, бьра һәр qьсьме wийи нерин бе сьнәткьрьне, һьнге дькарә незик бә ве дәрәще бькә у бьнәлийе wәлет бе һ'әсабе, ле т'ӧ мәрьве бесьнәт гәрәке жь wе нәхwә.
[49] У бьра бона бьнәли у хәрибе кӧ нав wәда дьминә qанунәк бә».
[50] Һ'әму зар'ед Исраел ӧса кьрьн, чаwа кӧ Хӧдан ә'мьри Муса у Һарун кьрьбу, wана ӧса жи кьр.
[51] У ӧса бу кӧ һәма wе р'оже Хӧдан зар'ед Исраел р'әфед wанва жь wәлате Мьсьре дәрхьстьн.