Дәрк'әтьн 4
[1] Муса ле вәгәр'анд у гот: «Ле әwе мьн баwәр нәкьн у нә жи wе дәнге мьн бьбьһен, чьмки wе бежьн, Хwәде тәва хӧйа нәбу йә».
[2] Һьнге Хwәде готә Муса: «Әw чи йә дәсте тәда?» Әwи гот: «Шьвдар ә».
[3] Хwәде готе: «Wе бавежә ә'рде». Әwи авитә ә'рде, бу мә'р у Муса же р'әви.
[4] Хӧдан готә Муса: «Дәсте хwә дьреж ке поч'е бьгьрә». Әwи жи дәсте хwә дьреж кьре әw гьрт у әw дәсте wида бу шьвдар.
[5] «Бь ве йәке wе баwәр бькьн, wәки Хӧдан Хwәдейе кал-бавед wан, Хwәдейе Бьраһим, Хwәдейе Исһаq у Хwәдейе Аqуб тәва хӧйа буйә».
[6] Хӧдан диса готә Муса: «Ньһа дәсте хwә текә п'ашьла хwә». Әwи дәсте хwә кьрә п'ашьла хwә дәрхьст у ва йә, дәсте wи бу мина бәрфа к'ӧни-к'ӧни буйи.
[7] Хwәде готе: «Дәсте хwә диса текә п'ашьла хwә». Әwи диса дәсте хwә кьрә п'ашьла хwә дәрхьст у ва йә, әw диса бу мина qальбе wи.
[8] «Һәгәр тә баwәр нәкьн у гӧһ нәдьнә нишана пешьн, wе баwәрийа хwә нишана дӧда биньн.
[9] Ле һәгәр ван һәр дӧ нишана жи баwәр нәкьн у гӧһ нәдьнә дәнге тә, һьнге жь ч'әме Ниле аве һьлдә у бьр'ежә сәр ә'рде. Әw ава кӧ тә жь Ниле һьлда wе сәр ә'рде бьбә хун».
[10] Муса готә Хӧдан: «Хwәйе мьн, һиви дькьм! Әзи хәбәрданеда нә сәрхwә мә, нә дӧһӧ нә жи пер у нә жи пәй ве хәбәрданер'а кӧ тә т'әв хӧламе хwә хәбәрда, ле әз йәки дәвqәр'ьми у зьменда гьран ьм».
[11] Һьнге Хӧдан готә wи: «К'е дәв да мерьв, йан к'е кәр' у лал чекьрьн, йан йе кӧ дьбинә, йан йе кор? Әз Хӧдан ниньм?
[12] Аwа ньһа тӧ һәр'ә әзе т'әви дәве тә бьм у тә һин кьм, чь кӧ тӧ гәрәке бежи».
[13] Әwи готе: «Хwәйе мьн, һиви дькьм! К'әрәма хwә йәки дьне бьшинә».
[14] Һьнге һерса Хӧдан ль Муса р'абу у готе: «Һаруне леwи нә бьре тә йә? Әз заньм кӧ әwи хәбәрданеда сәрхwә йә, ва йә әwе пешийа тәда бе у гава әw тә бьбинә wе гәләки ша бә.
[15] Тӧ т'әви wи хәбәр дә у хәбәра бькә дәве wи, әзе дәве тә у дәве wир'а бьм, әзе wә һин кьм кӧ һуне чь бькьн.
[16] Бьра әw дәwса тә щьмә'тер'а хәбәр дә у әw тәр'а бьбә дәwса дәв у тӧ жи wир'а дәwса Хwәде.
[17] У wе шьвдаре бьгьрә дәсте хwә, wәки бь wе нишана бьки».
[18] Муса вәгәр'ийа чу щәм хәзуре хwә Ит'ро у жер'а гот: «Изьна тә һәбә әз вәгәр'ьмә щәм бьратийа хwәйә Мьсьреда бьбиньм, к'а әw һәнә йан т'ӧнәнә». Ит'ро готә Муса: «Һәр'ә тәр'а охьр бә».
[19] Хӧдан Мьдйанеда Мусар'а гот: «Һәр'ә вәгәр'ә Мьсьре, чьмки әw мәрьвед кӧ пәй ә'мьре тә к'әтьбун һ'әму жи мьрьнә».
[20] Муса р'абу жьна хwә, кӧр'ед хwә ль к'әре сийар кьрьн у вәгәр'ийа wәлате Мьсьре. Муса шьвдара Хwәде гьртә дәсте хwә.
[21] Һьнге Хӧдан готә Муса: «Гава тӧ вәгәр'и һәр'и Мьсьре, бьки кӧ тӧ wан һ'әму нишанед кӧ мьн данә дәсте тә, ль бәр Фьрәwьн бьки, ле әзе дьле wи бькьмә кәвьр у әwе щьмә'те бәр'нәдә.
[22] У бежә Фьрәwьн: ‹Хӧдан аһа дьбежә: Исраел кӧр'е мьни ньхӧри йә.
[23] Әз тәр'а дьбежьм: Кӧр'е мьн бәр'дә кӧ әw хӧламтийа мьн бькә, ле һәгәр тӧ нәхwази wи бәр'ди, ва йә әзе кӧр'е тәйи ньхӧри бькӧжьм›».
[24] У ӧса qәwьми кӧ р'ева щики шәвбери кьрьн, Хӧдан р'асти Муса һат у хwәст кӧ wи бькӧжә.
[25] Һьнге Сиппораһе кәвьрәки туж һьлда, кӧр'е хwәйи нәсьнәткьри сьнәт кьр, п'ийед Муса хьст у готе: «Р'аст тӧ бона мьн мере хуне йи».
[26] У бь ви аwайи Хӧдан әw һьшт. Wи чахи бона сьнәтийе әwе гот: «Мере хуне».
[27] Хӧдан готә Һарун: «Һәр'ә бәр'ийе пешийа Мусада». Әw жи чу бәр ч'ийайе Хwәде р'асти wи һат у чу р'уйе wи.
[28] Муса һ'әму готьнед Хӧдан Һарунр'а гьли кьрьн кӧ әwи әw шандийә у т'әмийа wан һ'әму нишана дайә.
[29] Муса у Һарун чун һ'әму р'усьпийед зар'ед Исраел т'оп кьрьн.
[30] У Һарун әw һ'әму готьнед Хӧданә кӧ Мусар'а готьбу гьли кьрьн у ль бәр ч'ә'ве щьмә'те әw нишан кьрьн.
[31] Щьмә'те баwәр кьр. У гава бьһистьн кӧ Хӧдан сәр зар'ед Исраелда һатийә у дина хwә дайә әw зәлулийа wан, та бун у һ'әбандьн.