Дәрк'әтьн 9
[1] Хӧдан готә Муса: «Һәр'ә щәм Фьрәwьн у бежә wи: ‹Хӧдан Хwәдейе ибранийа аһа дьбежә: «Щьмә'та мьн бәр'дә кӧ хӧламтийа мьн бькә»,
[2] ле һәгәр тӧ wана һе бьгьри у нәхwази бәр'ди,
[3] аwа дәсте Хӧдан wе ль сәр һ'әйwанед тәйә чоле: Һәспа, к'әра, дәва, пез у деwер бә у бь нәхwәшийа һ'алә мәзьн qьр'а wане бе.
[4] Ле Хӧдан wе һ'әйwанед Исраел жь һ'әйwанед Мьсьре башqә кә у жь һ'әйwанед зар'ед Исраел, qәт йәке һ'ьшк нәбә›».
[5] Хӧдан wә'дә к'ьфш кьр у гот: «Сьбе Хӧдане ве йәке сәр wәлет бькә».
[6] Р'ожа дьн Хӧдан әв йәк кьр у һ'әму һ'әйwанед мьсьрийа һ'ьшк бун, ле жь һ'әйwанед зар'ед Исраел qәт йәк һ'ьшк нәбу.
[7] Һьнге Фьрәwьн шанд у пе һ'әсийа ва йә жь һ'әйwанед Исраел qәт йәк жи һ'ьшк нәбуйә. Дьле Фьрәwьн һе бу кәвьр у щьмә'т бәр'нәда.
[8] Хӧдан готә Муса у Һарун: «К'ӧлмед хwә т'ьжи к'озийа фьр'не кьн. У бьра Муса wе ль бәр ч'ә'ве Фьрәwьн бьр'әшинә бәрбь ә'змен.
[9] Әwе ль сәр т'әмамийа wәлате Мьсьре бьбә т'оз, ль сәр һ'әму мәрьви у һ'әйwанед wәлате Мьсьреда кӧлед п'ьзька п'исе дәрен».
[10] Wана к'озийа фьр'не һьлда у ль бәр Фьрәwьн сәкьнин. Муса әw бәрбь ә'змен р'әшанд. Ль сәр мерьв у һ'әйwен кӧлед п'ьзька п'ис дәрк'әтьн.
[11] Һьнге сербаза нькарьбу жь дәст п'ьзька ль бәр Муса бьсәкьнийана, чьмки п'ьзьк ль сәр сербаз у һ'әму мьсьрийа жи дәрк'әтьбун.
[12] Хӧдан дьле Фьрәwьн кьрә кәвьр у әwи гӧр'а wан нәкьр, чаwа кӧ Хӧдан Мусар'а готьбу.
[13] Һьнге Хӧдан готә Муса: «Сәре сьбәһе зу р'абә һәр'ә ль бәр Фьрәwьн бьсәкьнә у wир'а бежә: ‹Хӧдан Хwәдейе ибранийа аһа дьбежә: Щьмә'та мьн бәр'дә кӧ хӧламтийа мьн бькә,
[14] чьмки ве щаре, әзе һ'әму щәзайед хwә бьдьмә сәр'а дьле тә, сәре хӧламед тә у щьмә'та тә, кӧ бьзаньби, ль сәр т'әмамийа дьнйайе йәки мина мьн т'ӧнә.
[15] Һәгәр мьн дәсте хwә дьреж кьра у бь нәхwәшийа һ'ал ль тә у щьмә'та тә хьста, те сәр дьне бьһатайи ӧндакьрьне.
[16] Ле бона ве йәке мьн тӧ хwәйкьри, wәки qәwата хwә нишани тә бькьм у ль сәр т'әмамийа дьнйайе наве мьн бе готьне.
[17] Тӧ һе мьqабьли щьмә'та мьн дьсәкьни кӧ wе бәр'нәди?
[18] Аwа әзе сьбе ви чахи, тәйрокәкә ӧса qайим бьбариньм кӧ мина wе, р'ожа чебуна Мьсьреда һ'әта ньһа, тьште ӧса нәqәwьмийә.
[19] Ньһа бьшинә һ'әйwанед хwә т'оп кә чи тә кӧ чоле һәйә бьбьнә һьндӧр'. Чьмки һәр мәрьв, йан һ'әйwанед кӧ чоле бә, һәгәр нәк'әвьнә һьндӧр' тәйроке сәр wанда бьбарә у wе qьр'а wан бе›».
[20] Жь хӧламед Фьрәwьн, к'ижан кӧ жь готьна Хӧдан дьтьрсийа, хӧламед хwә у һ'әйwанед хwә бьрьнә һьндӧр',
[21] ле к'е гӧһдарийа готьна Хӧдан нәкьр, хӧламед хwә у һ'әйwанед хwә чоле һьштьн.
[22] Хӧдан готә Муса: «Дәсте хwә дьрежи бәрбь ә'змен кә у wе т'әмамийа wәлате Мьсьреда, ль сәр мерьв у һ'әйwен, ль сәр т'әмамийа шинайа ә'рде Мьсьреда тәйроке бьбарә».
[23] Муса шьвдара хwә дьрежи бәрбь ә'змен кьр, Хӧдан qьр'ч'ини у тәйрок шанд у бьруске бьрq вәдьда ль сәр ә'рде. Хӧдан тәйрок ль сәр wәлате Мьсьреда баранд.
[24] Тәйрок бари у т'әв тәйроке жи бьруске бьрq дьда, ӧса qайим бу, кӧ т'әмамийа wәлате Мьсьреда, жь р'ожа пешда һатьна wи мьләтида тьште ӧса нәqәwьми бу.
[25] Тәйроке т'әмамийа wәлате Мьсьре хьст, һ'әму тьштед чь кӧ чоле бу, жь мерьв гьрти һ'әта һ'әйwен. Тәйроке т'әмамийа шинайийа чоле хьст у һ'әму даред дәште һурдәхwәши кьрьн.
[26] Т'әне т'опраха Гошәнеда тәйрок нәбари, к'идәре зар'ед Исраел дьман.
[27] Фьрәwьн шанд гази Муса у Һарун кьр у wанр'а гот: «Ве щаре мьн гӧнә кьр, Хӧдан р'аст ә, ле әз щьмә'та хwәва әм нәһәq ьн.
[28] Р'әща жь Хӧдан бькьн, бьра qьрч'ин у тәйрока Хwәде бенә бьр'ине у әзе wә бәр'дьм, һуне иди вьра нәминьн».
[29] Муса готә wи: «Чаwа кӧ әз жь бажер дәрк'әвьм, әзе дәстед хwә бәрбь Хӧдан дьреж кьм у qьр'ч'инийе бьсәqьр'ьн, тәйроке иди нәбарә кӧ тӧ бьзаньби, ә'рд ә'рде Хӧдан ә.
[30] Ле әз заньм, wәки тӧ у хӧламед хwә һәла һе жь Хӧдан Хwәде натьрсьн».
[31] К'ьтан у щәһә һатьнә ледане, чьмки щәһә сьмбьл дабу, к'ьтане жи гӧпьк дабу.
[32] Ле гәньм у ч'ади нәһатьнә ледане, чьмки әw дәрәнг дьгьһиштьн.
[33] У Муса жь щәм Фьрәwьн жь бажер дәрк'әт у дәстед хwә бәрбь Хӧдан бьльнд кьр, qьрч'ин у тәйрок сәqьр'ин у баран ль сәр ә'рде иди нә бари.
[34] Ле гава Фьрәwьн дит кӧ баран, тәйрок у qьр'ч'ини сәqьр'ин, диса гӧнә кьр у дьле хwә кьрә кәвьр, әwи жи хӧламед wи жи.
[35] Дьле Фьрәwьн бу кәвьр у зар'ед Исраел бәр'нәдан, чаwа кӧ Хӧдан Мусар'а готьбу.