[1] Хӧдан т'әв Муса хәбәр да у гот:
[2] «Бежә зар'ед Исраел кӧ вәгәр'ьнә пешбәри Пи-Һаһирот'е, ль навбәра Мигдоле у бә'ре, пешбәри Баә'л-Сьпоне, незики бә'ре зома хwә лехьн.
[3] Һьнге Фьрәwьне бона зар'ед Исраел бежә: ‹Әwана wәлетда хальфинә у бәр'ийе дора wан гьрти йә›.
[4] Әзе дьле Фьрәwьн бькьмә кәвьр, wе пәй wан к'әвә у әзе сәр Фьрәwьн у сәр т'әмамийа ордийа wи р'умәта хwә бьдьмә к'ьфше, һьнге мьсьрийе бьзаньбьн кӧ әз Хӧдан ьм». Wана ӧса жи кьр.
[5] Щаб данә п'адше Мьсьре кӧ щьмә'т р'әвийә. Дьле Фьрәwьн у хӧламед wи һьндава щьмә'теда һатьнә гӧһастьне у готьн: «Мә чь кьр? Чьма изьна Исраел да кӧ әw жь хӧламтийа мә дәрк'әтьн?»
[6] Фьрәwьн ә'рәба хwә һазьр кьр, щьмә'та хwә жи т'әви хwә һьлда.
[7] Шәсьд ә'рәбед шер'ә жьбарә һьлдан у ӧса жи һ'әму ә'рәбед шер'ә Мьсьре, сәр wан һ'әмуйа жи сәрәскәр данин.
[8] Хӧдан дьле Фьрәwьн п'адше Мьсьре кьрә кәвьр у әw пәй зар'ед Исраел к'әт. Ле зар'ед Исраел бь мерк'ими дәрк'әтьбун.
[9] мьсьри пәй wан к'әтьн, һ'әму һәсп у ә'рәбед Фьрәwьн, сийари у әскәред wи хwә wанр'а гиһандьн, Исраел жи пешбәри Баә'л-Сьпоне щәм Пи-Һаһирот'е незики бә'ре зома хwә лехьстьбу.
[10] Фьрәwьн кӧ незик бу зар'ед Исраел дина хwә дане, ва йә мьсьри пәй wан к'әтьнә, һьнге зар'ед Исраел гәләки тьрсийан у гази Хӧдан кьрьн.
[11] Готьнә Муса: «Гәло Мьсьреда т'ьрб т'ӧнәбун кӧ тә әм анин бәр'ийеда бьмьрьн? Тә әв чь ани сәре мә кӧ әм жь Мьсьре дәрхьстьн?
[12] Wәлате Мьсьреда мә әв йәк тәр'а нәдьгот: ‹Бьһелә әм хӧламтийе мьсьрийар'а бькьн›? Чьмки һе р'ьнд бу мә Мьсьреда хӧламти бькьра, нә кӧ бәр'ийеда бьмьрьн».
[13] Һьнге Муса готә щьмә'те: «Нәтьрсьн, бьсәкьньн һуне бьбиньн хьлазкьрьна Хӧдан, к'ижан кӧ бона wә әwе иро бькә! Чьмки wан мьсьрийед кӧ һун иро дьбиньн, иди һуне т'ӧ щар нәбиньн.
[14] Хӧдане дәwса wә шәр' кә, һун кәр' бьн».
[15] Хӧдан готә Муса: «Тӧ чьма гази мьн дьки? Бежә зар'ед Исраел бьра р'ек'әвьн.
[16] Тӧ жи шьвдара хwә һьлдә у дәсте хwә дьрежи сәр бә'ре кә у бә'ре бьqәлешә кӧ зар'ед Исраел ль нава бә'ре, сәр зьһайер'а һәр'ьн.
[17] Ва йә әзе дьле мьсьрийа бькьмә кәвьр у wе пәй wан һәр'ьн у әзе сәр Фьрәwьн, һ'әму ордийа wи, ә'рәбед wи, сийарийед wи бемә р'умәткьрьне.
[18] Һьнге мьсьрийе бьзаньбьн кӧ әз Хӧдан ьм, гава әз сәр Фьрәwьн, ә'рәбед wи у сийаред wи бемә р'умәткьрьне».
[19] Мьлйак'әте Хwәде кӧ пешийа зома исраелийава дьчу, һатә пашийа wан у стуна ә'wре пешийа wан жи һатә пашийа wан сәкьни.
[20] У хwә да нава зома мьсьрийа у зома исраелийа, һьнге бона мьсьрийа ә'wрайи у шәвәр'әш бу, ле бона исраелийа шәв р'онайи дьда у т'әмамийа шәве әw незики һәв нәбун.
[21] Муса дәсте хwә дьрежи сәр бә'ре кьр, Хӧдан т'әмамийа шәве бь байе р'оһьлатейи qайим бә'р ажот у бә'р зьһа кьр. Ав һатә qәлаштьне
[22] у зар'ед Исраел, ль нава бә'ре сәр зьһайер'а чун, ав алийе wани ч'әп у р'астева бу диwар.
[23] мьсьри пәй wан к'әтьн у һ'әму һәспед Фьрәwьн, ә'рәбед wи, сийарийед wи чунә нава бә'ре.
[24] У дәсте бәрбанге, Хӧдан жь стуна агьри у ә'wри дина хwә да ордийа мьсьрийа у т'әвиһәвбун кьрә ль нав wан.
[25] Т'әкәрәкед ә'рәбед wан һатьнә дәрхьстьне ӧса кӧ әw бь зоре пешда дьчун, һьнге мьсьрийа гот: «Әм бьр'әвьн жь исраелийа, чьмки Хӧдан дәwса wан мьсьрийар'а шәр' дькә».
[26] Хӧдан готә Муса: «Дәсте хwә дьрежи сәр бә'ре кә, wәки ав ль сәр мьсьрийа, ә'рәбед wан у сийарийед wанда вәгәр'ә».
[27] Муса дәсте хwә дьрежи сәр бә'ре кьр, сәре сьбәһе бә'р вәгәр'ийа сәр qьрара хwә, мьсьри дьр'әвийан бәрбь wе у Хӧдан мьсьри кәwки бә'ре кьрьн.
[28] Ав вәгәр'ийа у ә'рәбә, сийари у т'әмамийа ордийа Фьрәwьн ньхамт, әwед кӧ пәй wан к'әтьбунә бә'ре qәт йәк жь wан нәма.
[29] Ле зар'ед Исраел, бә'реда сәр зьһайер'а чубун, ав ль алийе wани ч'әп у р'астева wанр'а бьбу диwар.
[30] У wе р'оже Хӧдан исраели жь дәсте мьсьрийа хьлаз кьрьн. исраелийа дәве бә'ре мьсьри мьри дитьн.
[31] Исраел qәwата wи дәсти дит, к'ижан кӧ Хӧдан сәр мьсьрийа да к'ьфше. Щьмә'т жь Хӧдан тьрсийа у баwәрийа хwә Хӧдан у хӧламе wи Муса анин.