[1] Тӧ жь нав зар'ед Исраелда Һаруне бьре хwә у кӧр'ед Һарун: Надаб, Абиһу, Елазар у Ит'амар, бинә щәм хwә, wәки мьнр'а к'аһинтийе бькьн.
[2] Һаруне бьре хwәр'а к'ьнщед пироз бьдьруйи, бона qәдьр у р'умәте.
[3] Тӧ бежә һ'әму хwәйифьрасәта, йед кӧ мьн бь р'ӧһ'е занәбунева дагьртьнә, кӧ бона Һарун к'ьнща бьдьрун, бона бӧһӧрти-жьбарәбуна wи, кӧ мьнр'а к'аһинтийе бькә.
[4] Әв ьн әw к'ьнщед кӧ wе бьдьрун: Р'әхтсинг, ефод, чӧх у кьрасе нәqьшанди, п'ап'ах у бәнпьшт. Бьра бьре тә Һарун у кӧр'ед wир'а к'ьнщед пироз бьдьрун, кӧ мьнр'а к'аһинтийе бькьн.
[5] Бьра әw зер', р'исе шин, ширк, соре гәвәз у к'ьтане зьрав һьлдьн.
[6] Ефод жь зер', р'исе шин, ширк, соре гәвәз у к'ьтане зьрав-бадайи, бь хәбата ньтьрандьне чекьн.
[7] Гәрәке сәр һәр дӧ сәрмьлка п'әвгьрек һәбьн кӧ бенә һәввакьрьне.
[8] Бәнпьшта ль сәр ефод жи мина ефод жь wан тьшта һунанди-ньтьранди, жь зер', р'исе шин, ширк, соре гәвәз у к'ьтане зьрав-бадайи бе чекьрьне.
[9] Дӧ кәвьред оникс һьлди у навед зар'ед Исраел ль сәр wан бьк'оли бьньвиси,
[10] шәш нава ль сәр кәвьрәки у шәш нава жи ль сәр кәвьрәки, анәгори пәйһәвбуйина wан.
[11] Мина һостатийа кәвьрк'ол чаwа кӧ море дьк'олә, ӧса жи тӧ навед зар'ед Исраел сәр һәр дӧ кәвьра бьк'оли у wан нава qавед зер'инда qаш ки.
[12] Wан һәр дӧ кәвьра сәр сәрмьлке ефодва ки, кӧ зар'ед Исраелр'а бьбьнә кәвьред биранине. У Һарун навед wан бона биранине ль бәр Хӧдан һьлдә сәр һәр дӧ мьлед хwә.
[13] Qашед зер'ин чеки
[14] у жь зер'ед хальс дӧ зьнщиред бадайи вәгьрти чеки у wан зьнщиред вәгьрти бавежи qаша.
[15] Р'әхтсинге һ'акьмтийе ньтьранди wи щур'е чекьрьна ефодда чеки. Wи жь зер', р'исе шин, ширк, соре гәвәз у жь к'ьтане зьрав-бадайи чеки.
[16] Бьра әw дӧ та qаткьри чаргошә бә, дьрежайийа wи бьһӧстәк у бәрайийа wи жи бьһӧстәк.
[17] У ль сәр wи чар щергә кәвьр qаш ки. Щерга ә'wльн: Сардийон, топаз у зьмруд,
[18] щерга дӧда: Карбункул, сафир у алмас,
[19] щерга сьсийа: Йахонит, агат у аместис
[20] у щерга чара жи: Хризолит, оникс у йаспис, әвана гәрә нава qавед зер'да бенә qашкьрьне.
[21] Әw кәвьр гәрә донздәһ һ'әб бьн, анәгори навед кӧр'ед Исраел, мина море к'олайи сәр һәр кәвьри навәки wан бе к'оландьне бона донздәһ qәбила.
[22] Сәр р'әхтсинг зьнщиред бадайи чеки, әw вәгьрти жь зер'е хальс бә.
[23] Р'әхтсингр'а дӧ хәлаqед зер'ин чеки у wан һәр дӧ хәлаqа сәр һәр дӧ ньч'ед рәхтсингва ки.
[24] Wан һәр дӧ зьнщиред зер'ин, хәлаqед ньч'ед р'әхтсингва ки
[25] у һәр дӧ сәрийед зьнщирайә дьн һәр дӧ qавед сәрмьлке ефодва ки, пешийева сәр ефод бә.
[26] Дӧ хәлаqед зер'инә дьн чеки wан бьн р'әхтсингва һәр дӧ ньч'ед жерьнва алийе ефодва ки.
[27] Дӧ хәлаqед зер'инә дьн жи чеки, вана бьне һәр дӧ ньч'ед сәрмьлкед ефодва ки. Алийе пешийева бәр щийе һәввабунева сәр бәнпьшта ефодва ки.
[28] У бь qәйт'ана шин хәлаqед р'әхтсинг хәлаqед ефодва кьн, кӧ әw сәр бәнпьшта ефодва бьн у р'әхтсинг жь ефод нәqәтә.
[29] Һарун наве кӧр'ед Исраелә ль сәр р'әхтсинге һ'акьмтийе, т'ьме бьдә ль сәр дьле хwә, гава бьк'әвә Щийе Пироз, бона биранина wан ль бәр Хӧдан.
[30] Урим у Тумим бькә р'әхтсинге һ'акьмтийе. Бьра әw сәр дьле Һарун бьн, гава әw һәр'ә бәр Хӧдан. Һарун һәр т'ьм һ'акьмтийа кӧр'ед Исраел ль бәр Хӧдан бьдә ль сәр дьле хwә.
[31] Чӧхе ефод хӧр'у бь р'әнге шин чеки.
[32] Наведа бәрстуйа wи вәки кӧ сәри тер'а дәрбаз бә, дора wи щийе вәкьри мина бәрстуйа еләкзьрьһ' һунанди бәрсту ки, кӧ жь бәр һәв нәчә.
[33] Дора п'еша чӧх жь р'исе шин, ширк у соре гәвәз һ'ьнара чеки, нава жь wан һәр йәкида жи зәнгьлед зер'ин һәбә.
[34] Дора п'еша чӧхва бьра навбәра һәр зәнгьләки зер'ин һ'ьнарәк бә у зәнгьләки зер'ин һ'ьнарәк бә.
[35] Wә'де qӧльхкьрьне гәрәке чӧх сәр Һарун бә у гава әw бьк'әвә Щийе Пироз ль бәр Хӧдан у дәрк'әвә дәнге чӧх бе бьһистьне кӧ әw нәмьрә.
[36] Бәрә'нике жь зер'е хальс р'о ки у бь щур'е морк'оландьне сәр wе бьк'оли: «Пироз Хӧданр'а».
[37] Wе бавежи сәр qәйт'анәкә шин п'ап'ахва ки, кӧ жорва сәр нә'тька п'ап'ахва бә.
[38] Бьра әw ль сәр ә'нийа Һарун бә, wәки һәр кемасийе һ'әдийед зар'ед Исраелә пироз кӧ тенә дайине, Һарун һьлдә ль сәр хwә. Гәрәке һәр т'ьм әw ль сәр ә'нийа Һарун бә, кӧ әw ль бәр Хӧдан бенә qәбулкьрьне.
[39] Кьрас бь к'ьтане зьрав бьһуньни, п'ап'ах бь к'ьтане зьрав чеки, бәнпьште жи бь хәбата нәqьшандитийе чеки.
[40] Кӧр'ед Һарунр'а, бона qәдьр у р'умәта wан, кьраса, бәнпьшта у к'олоза чеки.
[41] Вана ль бьре хwә Һарун у кӧр'ед wийә т'әви wи ки. Wан р'ун ки, хьзмәтк'арийа wанда wан qәwин-qәдим ки у бӧһӧрти-жьбарә ки кӧ мьнр'а к'аһинтийе бькьн.
[42] Wанр'а бь к'ьтан к'ьнщед бьни бьдьруйи, wәки qальбед хwә бьньхемьн, әw бьра жь навк'елке һ'әта чока дьреж бьн.
[43] Гава Һарун у кӧр'ед хwәва һәр'ьнә Коне Щьвине, йан незики горигәһе бьн бона qӧльхкьрьна Щийе Пирозда, бьра wан ль хwә кьн, кӧ нәбә әw нәһәqийе бькьн у бьмьрьн. Бьра әw wир'а у зӧр'әта wийә пәй wир'а бьбә ә'рф-ә'дәте һ'әта-һ'әтайе.