[1] Хӧдан готә Муса: «Р'абә жь вьра тӧ у әw щьмә'та кӧ тә жь wәлате Мьсьре дәрхьст һәвраз ани, һьлдә һәр'ә wи ә'рде бона к'ижани мьн Бьраһим, Исһаq у Аqубр'а сонд хwар у гот: ‹Әзе wи бьдьмә зӧр'әта тә›.
[2] Әзе пешийа тәва мьлйак'әтәки бьшиньм у әwе кәнанийа, әморийа, һ'итийа, пьриззийа, һ'иwийа у йәбусийа р'аqәтинә.
[3] Те һәр'и ә'рде шир у һьнгьв же дьк'ьшә, ле әзе хwәха т'әви тә һәвраз нәйем, чьмки тӧ мьләтәки сәрһ'ьшки кӧ нәбә әз р'ева qьр'а тә биньм».
[4] Гава щьмә'те әв готьна гьран бьһист, шин кьрьн у qәт кәсәки хьшьре хwә хава нәкьр.
[5] Чьмки Хӧдан готьбу Муса: «Бежә зар'ед Исраел, һун мьләтәки сәрһ'ьшк ьн, һәгәр әз дәqәке т'әви тә һәвраз бем әзе qьр'а тә биньм. Ле ньһа хьшьред ль сәр хwә дәрхьн, кӧ әз дина хwә бьдьме к'а әз wә чаwа бькьм».
[6] Зар'ед Исраел хьшьред хwә һьнда ч'ийайе Һ'оребе жь сәр хwә дәрхьстьн.
[7] Муса Кон һьлда, жь зоме дәр һьнәки жь зоме дур вәгьрт у наве wи дани Коне Щьвине. У һәр кәсе кӧ гази Хӧдан дькьр, жь зоме дәрдьк'әт дьчу Коне Щьвине, кӧ жь зоме дәр бу.
[8] Гава Муса дәрдьк'әт дьчу бәрбь Кон, һьнге һ'әму щьмә'т р'адьбу у һәр йәк ль бәр дәре коне хwә дьсәкьни у дина хwә дьданә Муса, һ'әта кӧ әw бьк'әта Кон.
[9] Чаwа кӧ Муса дьк'әтә Кон, стуна ә'wр пәйа дьбу ль бәр дәре Кон дьсәкьни у Хӧдан т'әви Муса хәбәр дьда.
[10] Гава т'әмамийа щьмә'те стуна ә'wрә ль бәр дәре Кон сәкьни дьдит, т'әмамийа щьмә'те р'адьбу у һәр йәк ль бәр дәре коне хwә дәвәр'уйа дьчу.
[11] Хӧдан р'у бь р'у т'әви Муса хәбәр дьда, чаwа кӧ мәрьвәк т'әви һәвале хwә хәбәр дьдә. Муса вәдьгәр'ийа зоме, ле хорте бәрдәстийе wи Йешуйе кӧр'е Нун жь Кон дур нәдьк'әт.
[12] Муса готә Хӧдан: «Бәле тә готә мьн: ‹Ве щьмә'те дәрхә›, ле бәле тә мьнва ә'йан нәкьр, те к'е т'әви мьн бьшини, тә гот: ‹Әз тә пе наве тә нас дькьм у тә ль бәр ч'ә'вед мьн к'әрәм дит›.
[13] Ле ньһа һиви дькьм, һәгәр мьн ль бәр ч'ә'вед тә к'әрәм дитийә, р'ийед хwә ль бәр мьн вәкә wәки әз тә нас бькьм у ль бәр тә к'әрәме бьбиньм, дина хwә бьде кӧ әв мьләт щьмә'та тә йә».
[14] У Хwәде гот: «Әзе т'әв тә бем у тә бьбьмә р'ьһ'әтийе».
[15] Муса готә wи: «Һәгәр тӧ нәйейи, мә жь вьра дәрнәхә.
[16] Wе чаwа бе к'ьфше wәки мьн у щьмә'та тә ль бәр ч'ә'вед тә к'әрәм дитийә, һәгәр тӧ т'әви мә нәйейи? Бь ви аwайи әз у щьмә'та тәйе ль р'убари дьне жь һ'әму мьләта бенә башqәкьрьне».
[17] Хӧдан готә Муса: «Әзе ве йәке жи бькьм кӧ тә гот, чьмки тә ль бәр ч'ә'ве мьн к'әрәм дит у әз тә пе наве тә нас дькьм».
[18] Муса гот: «Һиви дькьм диндара хwә мьнва ә'йан кә».
[19] Һьнге Хwәде готе: «Әзе һ'әму qәнщийа хwә ль бәр тәва дәрбаз кьм у наве хwә Хӧдан ль бәр тә бьдьмә ә'ламкьрьне, әз к'ижани бемә р'ә'ме, әзе бемә р'ә'ме у дьле мьн сәр к'е бьшәwьтә, wе бьшәwьтә».
[20] Гот: «Тӧ р'уйе мьн нькари бьбини, чьмки мәрьв нькарә мьн бьбинә у сах бьминә».
[21] У Хӧдан гот: «Ва йә щәм мьн щик һәйә, ль сәр wи qәйайи бьсәкьнә,
[22] гава диндара мьн дәрбаз бә, әзе тә бькьмә qәльштока qәйе у бь дәсте хwә тә бьньхемьм, һ'әта кӧ әз дәрбаз бьм.
[23] Паше әзе дәсте хwә һьлдьм у те пьштева мьн бьбини, ле р'уйе мьн wе тәва нәйе дитьне».