[1] Жь дара дарщеwийе горигәһе чеки, дьрежайийа wе пенщ зәнд, бәрайи пенщ зәнд, бьра горигәһ чар гошә бә, бьльндайийа wе се зәнд бә.
[2] Сәр һәр чар ә'нишкед wе стьруйа дәрхи, ӧса кӧ стьруйед wе жь wе бьн, wе сьфьр ки.
[3] Т'әбахед бона к'озир'етьна wе, мәр'ькед wе, т'әштед wе, гоштгьр у сьнийед wе чеки, һ'әму һащәтед wе жь сьфьр чеки.
[4] У бона wе жь сьфьр читәкә мина т'ор'а чеки у чар хәлаqед сьфьр сәр һәр чар ә'нишкед читва ки.
[5] У wе жерева дайни бьн кәвийа горигәһе, ӧса кӧ чит ниве горигәһеда бә.
[6] Бона горигәһе дәстуйа чеки, дәсту жь дара дарщеwийе бьн у wан сьфьр ки.
[7] Гәрә дәстуйед wе ль нав хәлаqар'а дәрбаз бьн, әw дәсту гәрә һәр дӧ к'еләкед горигәһева бьн, бона һьлдана wе.
[8] Wе жь т'әхта чеки у һьндӧр' вала, чаwа кӧ сәр ч'ийе тәр'а һатә нишандайине, ӧса жи чеки.
[9] Алийе башуре һ'әwша Коне Шә'дәтийе чеки у п'әр'дед wе жь к'ьтане зьрав-бадайи бә, дьрежайийа алики сәд зәнд бә.
[10] Бист стунед wе бьн т'әви бист бьнгәһед жь сьфьр, ле чәнгәлед стуна у шишед wе жь зив бьн.
[11] Ӧса жи бона һ'әwша алийе бакӧре, дьрежайийа п'әр'де бьра сәд зәнд бә у бист стуне wе бьн, т'әви бист бьнгәһед жь сьфьр, чәнгәлед стуна т'әви п'әвгьрека жи жь зив бьн.
[12] Бона бәрайийа һ'әwше, п'әр'дед алийе р'оавайе пенщи зәнд бә, дәһә стунед wан у дәһә бьнгәһед wан бьн.
[13] Бәрайийа пешийа һ'әwше кӧ wе бьк'әвә алийе р'оһьлате пенщи зәнд бә.
[14] П'әр'дед алики дери панздәһ зәнд бә, стунед wан сьсе у бьнгәһед wан сьсе бьн,
[15] п'әр'дед алийе дьн панздәһ зәнд бә, стунед wан сьсе у бьнгәһед wан сьсе.
[16] Бона дәре һ'әwше жь р'исе шин, ширк, соре гәвәз у к'ьтане зьрав-бадайи, п'әр'дәкә бист-зәнди бь хәбата нәqьшандитийе чеки. Чар стун у чар бьнгәһед wе гәрә һәбьн.
[17] Һ'әму стунед дора һ'әwше гәрә бь шишед зивин һәвва гьредайи бьн. Чәнгәлед wан зив у бьнгәһед wан сьфьр бьн.
[18] Дьрежайийа һ'әwше сәд зәнд бә, бәрайи пенщи зәнд бә у бьльндайийа п'әр'дед доре пенщ зәнд бә. Әw гәрә жь к'ьтане зьрав-бадайи бьн, бьнгәһед стуна жь сьфьр бьн.
[19] Һәр һащәте бона һәр шьхӧле Коне Шә'дәтийе, һ'әму сьнгед wе у һ'әму сьнгед һ'әwше жь сьфьр бьн.
[20] Тӧ т'әмийе бьдә зар'ед Исраел, wәки тәр'а бона р'онайе р'уне зәйт'унейи зәлал к'ьшанди биньн, кӧ ч'ьра һәр т'ьм бьшхӧлә.
[21] Һарун зар'ед хwәва Коне Щьвинеда , ви алийе п'әр'да бәр Шә'дәтийе, ль бәр Хӧдан еваре һ'әта сьбәһе хәме шьхӧландьне һьлдьнә ль сәр хwә. Әв йәк алийе зар'ед Исраелда нав ньсьлед wанда бьбә ә'рф-ә'дәте һ'әта-һ'әтайе.