[1] Ya Allah, inta al-Ilaah al-tichiil al-taar ! Ya Ilaah al-tichiil al-taar, // bayyin nafsak !
[2] Gumm, ya gaadi al-ard, // didd al-mustakbiriin. Aakhibhum al-ikhaab // al-waajib leehum.
[3] Lahaddi mata, ya Allah ? Lahaddi mata al-aasiyiin yinbastu ?
[4] Kalaam hana istikbaar yamrug min khuchuumhum, humman wa kulla l-fasliin dool yifaachuru.
[5] Ya Allah, humman yitaʼʼubu chaʼabak wa yidaayugu naasak // al-misil warasatak.
[6] Yaktulu al-armala wa l-ajnabi wa yikammulu al-ataama.
[7] Wa yuguulu : «Allah ma yichiif cheyy ! Aywa, Ilaah Yaakhuub ma yaʼarif.»
[8] Ya l-mukhaffaliin fi ust al-chaʼab, fakkuru adiil. Mata tafhamo, intu al-mataamiis ?
[9] Al-khalag al-udne // ma yasmaʼ walla ? Wa l-sawwa al-uyuun // ma yichiif walla ?
[10] Wa l-yiʼaddib al-umam // ma yuluumhum walla ? Hu bas yiʼallim al-maʼrafa le l-insaan.
[11] Allah yaʼarif afkaar al-insaan achaan humman zaayliin.
[12] Ya Allah, mabruuk le l-naadum // al-inta tiʼaddibah wa tiʼallimah Tawraatak.
[13] Tantiih al-raaha fi ayyaam al-fasaala lahaddi yahfuru khabur le l-aasiyiin.
[14] Allah ma yikhalli chaʼabah wa ma yaaba naasah // al-misil warasatah.
[15] Al-chariiʼa tingatiʼ hasab al-adaala wa kulla l-naas al-galibhum adiil yitaabuʼuuha.
[16] Yaatu al-yugumm didd al-yisawwu leyi al-fasaala ? Wa yaatu al-yagiif didd al-yisawwu leyi al-zulum ?
[17] Kan Allah ma fazaʼni, nafsi taskun fi l-khubuur.
[18] Wa wakit nuguul : «Nittartaʼ», rahmatak talzamni, ya Allah.
[19] Wa wakit nihimm ziyaada, ana nafrah achaan inta tisabbirni.
[20] Hal al-haakim al-mudammir yichtarik maʼaak walla ? Hal al-mudaayig be gawaaniinah yindamma leek walla ?
[21] Yugummu didd al-saalih wa yathamo al-bari be dimme.
[22] Wa laakin Allah bigi maskani al-gawi wa Ilaahi hu jabali al-yahmiini.
[23] Hu rama leehum zunuubhum fi raashum wa be fasaalithum bas, sakkataahum marra waahid ! Aywa, Allah Ilaahna bas sakkataahum.