[1] Ya Rabb ! Al-umam hajamo // ard warasatak wa najjaso beetak al-mukhaddas wa sawwo Madiinat al-Khudus koom hana turaab.
[2] Anto janaazaat abiidak le tuyuur al-sama wa jisas al-muʼminiin beek le haywaanaat al-kadaade.
[3] Wa daffago dammuhum hawaale Madiinat al-Khudus misil almi wa ma fi naadum al-yadfinhum.
[4] Daahu ligiina muʼyaar min jiiraanna wa chamaate wa hugra min al-muhawwigiinna.
[5] Ya Allah, le mata takhdab ? Ila l-abad ? Wa le mata khiirtak tahrig // misil al-naar ?
[6] Nazzil khadabak fi l-umam al-ma yaʼarfuuk wa didd al-mamaalik al-ma yinaadu usmak.
[7] Achaan humman kammalo // zurriiyit Yaakhuub wa kharrabo baladhum.
[8] Ma tizzakkar khata juduudna laakin khalli rahmatak taji ajala foogna achaan aniina diʼifna ziyaada.
[9] Afzaʼna, ya Rabb ! Inta bas munajjiina, afdaana be sabab usmak al-majiid ! Wa fi chaan usmak, akhfir zunuubna.
[10] Maala al-umam buguulu : «Ween Ilaahhum ?» Khalli al-umam dool yaʼarfu wa wassifhum giddaamna kadar tichiil taar fi chaan abiidak al-kataloohum.
[11] Khalli ganitiin al-masaajiin yalhagak wa be iidak al-gawiiye, najji al-gaaʼidiin fi khutuurat al-moot.
[12] Wa l-muʼyaar al-ayyarook leyah jiiraanna, gabbilah fi raashum sabʼa marraat, ya Rabb !
[13] Aniina chaʼabak wa khanamak al-tasrah beehum. Aniina nachkuruuk daayman wa nihajju be hamdak // min zurriiye le zurriiye.