[1] Afraho be l-Rabb, ya kulla sukkaan al-ard !
[2] Ahmudu usmah al-majiid wa azzumuuh be khineeku.
[3] Guulu le l-Rabb : «Aʼmaalak mukhiifiin ! Wa be sabab gudurtak al-kabiire, udwaanak yilmaskano giddaamak.
[4] Kulla sukkaan al-ard yasjudu giddaamak wa yikhannu leek // wa yahmudu usmak.» Wagfa.
[5] Taʼaalu chiifu amal al-Rabb. Be ajaaybah, yikhawwif al-insaan.
[6] Hu yabbas al-bahar wa sawwa derib fi l-turaab yaabis wa l-chaʼabah gataʼo be rijleehum. Wa fi chaan da bas, aniina nafraho beyah.
[7] Be gudurtah yahkim ila l-abad wa uyuunah yiraakhubu al-umam wa l-haraamiyiin ma yugummu diddah. Wagfa.
[8] Ya l-chaʼab ! Baaruku Ilaahna wa khalli hissuku yinsamiʼ be hamdah.
[9] Wa l-antaana al-haya ma yikhalli rijleena yittartaʼo.
[10] Achaan inta jarrabtina, ya Rabb, wa saffeetna misil yisaffu al-fudda.
[11] Wa inta rameetna fi l-charak wa khatteet himil tagiil fi duhuurna.
[12] Inta khalleet naas rikbo fi ruuseena wa dakhalna min diige le diige. Wa laakin inta maragtina wa khatteetna fi l-raaha.
[13] Ana nadkhul fi beetak // be dahaaya muharragiin wa nihaggig nazri leek
[14] al-beyah fakkeet khachmi wa kallamt be lisaani fi diigti.
[15] Wa nigaddim leek dahiiye muharraga, aywa, bahaayim sumaan misil tiiraan wa kubchaan wa tuyuus wa dukhkhaanhum yatlaʼ leek. Wagfa.
[16] Taʼaalu intu kulluku al-takhaafo min al-Rabb ! Asmaʼooni nihajji leeku be l-cheyy al-hu sawwaah leyi
[17] wakit naadeetah be khachmi wa hamadtah be lisaani.
[18] Wa kan ana naweet al-charr fi galbi, al-Rabb ma yasmaʼni.
[19] Laakin al-Rabb simiʼni wa hu khibil salaati.
[20] Baarak al-Rabb, hu al-ma baʼʼad salaati minnah wa la tarraf rahmatah minni !