[1] Khalli al-Rabb yugumm // wa udwaanah yichittu wa khusmaanah yajru giddaamah.
[2] Wa misil al-dukhkhaan yichattit, misil al-chamʼe tumuuʼ fi l-naar, al-aasiyiin yiddammaro // giddaam al-Rabb.
[3] Wa laakin al-saalihiin yafraho wa yinbastu giddaam al-Rabb wa farhaaniin ziyaada.
[4] Khannu le l-Rabb wa amdaho usmah ! Aftaho al-derib le l-raakib fi l-sahaab, usmah hu Allah, wa afraho giddaamah.
[5] Al-Ilaah al-gaaʼid // fi maskanah al-mukhaddas, hu abu al-ataama // wa muhaami al-araamil.
[6] Le l-naadum al-gaaʼid wiheedah, al-Rabb yisakkinah maʼa aayila wa le l-masaajiin, yamrughum min al-sijin wa yantiihum al-naja. Wa laakin le l-haraamiyiin, yisakkinhum fi ard jafaaf.
[7] Ya Rabb ! Maragt giddaam chaʼabak wa macheet fi l-sahara. Wagfa.
[8] Wa fi l-wakit da, al-ard rajafat wa l-samaawaat sabbo almi giddaam al-Rabb Ilaah jabal Siinaaʼ, giddaam al-Rabb Ilaah Bani Israaʼiil.
[9] Ya Rabb ! Inta nazzalt matara chadiide wa sabbatt chaʼabak // al-misil warasatak al-ma induhum gudra.
[10] Wa chaʼabak sakano fi baladak al-be kheerak inta sabbatt foogha al-miskiin, ya Rabb.
[11] Al-Rabb anta amur wa l-mubachchiraat bigan katiiraat misil deech.
[12] Al-muluuk wa l-askar jaro wa arrado wa l-awiin al-faddalan fi l-buyuut yilgaasaman al-khaniime.
[13] Hatta intu al-raagdiin fi l-zaraayib kula, waajib talgo kanz misil janaahe hamaam // mukhattayiin be fudda al-riichha asfar misil dahab.
[14] Wa wakit Allah al-Gaadir chattat al-muluuk, da bigi misil al-talaj al-naazil fi jabal Salmuun.
[15] Ya jibaal al-Rabb, jibaal Baachaan ! Ya jibaal al-ruuseeku katiiriin, // jibaal Baachaan !
[16] Ya jibaal al-ruuseeku katiiriin, maala tinhasdu fi l-jabal al-ajab al-Rabb le yaskun foogah ? Aywa, Allah yaskun foogah ila l-abad.
[17] Arabaat al-harib hana l-Rabb yinhasbu min ichriin alif // lahaddi aalaaf al-aalaaf wa hu ja maʼaahum min Siinaaʼ le bakaanah al-mukhaddas.
[18] Ya Allah al-Rabb ! Inta talaʼt fi l-aali wa karabt masaajiin wa chilt hadaaya min al-naas hatta min al-haraamiyiin kula wa sawweet maskanak // fi jabal Sahyuun.
[19] Baarak al-Rabb kulla yoom ! Hu yichiil masʼuuliiyitna wa hu Ilaahna al-yinajjiina. Wagfa.
[20] Ilaahna hu al-Ilaah al-yinajjiina, Allah al-Rabb bas yahfadna min al-moot.
[21] Laakin al-Rabb yaksir ruuse udwaanah wa ruuse al-induhum suuf al-aaychiin fi khataahum.
[22] Wa l-Rabb gaal : «Ana nijiib al-adu min Baachaan wa nijiibhum min ust al-bahar al-khariig.
[23] Wa be da, intu tifajjukhuuhum fi l-damm wa kulaabku kula yalgo hagguhum min al-adu.»
[24] Ya Rabb ! Al-naas chaafo jaytak wa di jayyit Ilaahi // fi l-bakaan al-mukhaddas wa hu maliki.
[25] Al-khannaayiin yamchu giddaam wa l-yadurbu al-musiikha yamchu wara maʼa l-banaat al-yadurban al-nagaagiir.
[26] Fi majmuuʼaat, ahmudu al-Rabb aywa, ahmudu Allah, // ya zurriiyit Israaʼiil !
[27] Hinaak gabiilat Banyaamiin al-sakhayre tuguudhum. Wa baʼadhum, kubaaraat gabiilat Yahuuza // maʼa askarhum wa kubaaraat gabiilat Zabuluun // wa kubaaraat gabiilat Naftaali.
[28] Ilaahak kharrar yantiik gudra. Ya Rabb ! Wassif leena gudurtak misil inta sawweetah leena zamaan.
[29] Fi beetak al-mukhaddas al-aali // fi Madiinat al-Khudus, al-muluuk yijiibu leek hadaaya.
[30] Gumm haddid al-tumsaah al-kaaris fi l-tibin wa door al-tiiraan wa haddid chuʼuub al-ajjaal al-yaʼabuduuhum wa yantuuhum hujaar fudda. Aywa, chattit al-chuʼuub al-yiriidu al-harib !
[31] Min Masir yaju naas kubaar wa min al-Habacha kamaan naasha yijiibu hadaaya be surʼa le l-Rabb.
[32] Ya mamaalik al-ard, khannu le l-Ilaah ! Aywa, amdaho al-Rabb ! Wagfa.
[33] Hu raakib fi l-samaawaat, al-samaawaat al-gaaʼidiin min zamaan. Daahu hissah ansamaʼ, hiss chadiid.
[34] Aʼarfu gudrat al-Rabb wa azamatah al-fi Israaʼiil wa gudurtah al-gaaʼide fi l-sahaab.
[35] Ya Rabb, inta al-tikhawwif min beetak al-mukhaddas. Ya Rabb Bani Israaʼiil, inta al-tanti gudra wa sulta le chaʼabak. Ahmudu al-Rabb !