[1] Al-hamdulillah ! Achkuru Allah achaan hu rahiim wa rahmatah daayme ila l-abad.
[2] Ma fi al-yagdar yihajji // be kulla aʼmaal Allah ! Ma fi al-hissah yinsamiʼ // be kulla chukrah !
[3] Mabruuk le l-yahfado gawaaniinah wa yitabbugu adaaltah fi kulla wakit.
[4] Ya Allah ! Inta al-radyaan le chaʼabak, // fakkir foogi wa be najaatak, saaʼidni.
[5] Wa be da, nichiif kheer al-naas // al-inta azaltuhum wa ninbasit be farah ummatak wa nafrah maʼa chaʼabak // al-humman warasatak.
[6] Aniina aznabna misil juduudna wa sawweena khata wa sawweena charr.
[7] Wa juduudna fi Masir ma fihmo cheyy // fi ajaaybak wa ma azzakkaro rahmatak al-kabiire. Wa gammo iso fi khachum al-bahar aywa, da fi l-bahar al-Ahmar.
[8] Wa laakin Allah najjaahum // fi chaan usmah le yiʼarrifhum gudurtah.
[9] Hu haddad al-bahar al-Ahmar wa l-bahar yibis. Hu gaadaahum fi ust al-bahar al-khariig misil gaadaahum fi l-sahara.
[10] Hu najjaahum min iid al-kirhoohum wa fadaahum min udwaanhum.
[11] Almi khatta khusmaanhum wa waahid kula minhum ma faddal.
[12] Wa juduudna aamano be kalaamah wa khanno be hamdah.
[13] Laakin ajala ke, humman niso aʼmaalah wa ma rijo wasiiytah.
[14] Fi l-sahara, jaham al-laham karabhum aywa, fi l-khala // humman jarrabo al-Rabb.
[15] Khalaas, hu antaahum al-cheyy al-talabooh wa laakin rassal leehum marad // le yibattilhum.
[16] Fi l-fariig, humman hasado Muusa wa Haaruun al-raajil // al-Allah khassasah.
[17] Wa l-ard anfatahat wa zaratat Dataan wa dafanat naas Abiraam.
[18] Wa l-naar haragat naashum aywa, ambalbaala akalat al-aasiyiin.
[19] Fi jabal Huuriib, juduudna sawwo leehum ijil wa sajado giddaam sanam al-hadiid.
[20] Wa baddalo majd Allah // be timsaal hana toor aywa, be haywaan al-yaakul gechch !
[21] Humman niso al-Ilaah al-najjaahum, hu al-sawwa aʼmaal kubaar fi Masir
[22] wa ajaayib fi balad Haam. Wa fi khachum al-bahar al-Ahmar, sawwa aʼmaal al-bikhawwufu.
[23] Allah kharrar yikammilhum wa laakin Muusa al-hu azalah wagaf fi khachum al-khurma giddaamah le yigabbil khadabah al-mudammir.
[24] Humman abo al-balad al-samha wa ma aamano be kalaamah.
[25] Gaawalo fi lubb khiyamhum wa ma simʼo kalaam Allah.
[26] Wa hu rafaʼ iidah didduhum le yidammirhum fi l-sahara
[27] wa le yidammir zurriiyithum // fi lubb al-umam aywa, yichattithum fi l-buldaan.
[28] Baʼad da, humman macho wara // ilaah Baʼal fi jabal Faʼuur wa akalo sadakhat al-maytiin.
[29] Humman khaddabo Allah be aʼmaalhum wa waba nazal fi usuthum.
[30] Wa Fiinhaas gamma wa hakam wa l-waba wagaf.
[31] Khalaas, jaʼalah naadum saalih min zurriiye le zurriiye wa ila l-abad.
[32] Humman khaddabo Allah // jamb almi Mariiba wa da jaab ikhaab fi raas Muusa
[33] achaan humman atmarrado diddah wa Muusa hajja kalaam bala fikir.
[34] Humman ma dammaro al-chuʼuub al-Allah amaraahum be damaarhum.
[35] Humman alkhalbato maʼa l-umam wa alʼallamo fiʼilhum.
[36] Wa abado asnaamhum al-bigo leehum amkajjaama.
[37] Wa gaddamo awlaadhum wa banaathum dahaaya le l-chawaatiin.
[38] Humman daffago damm al-bari, damm awlaadhum wa banaathum al-gaddamoohum dahiiye // le asnaam al-Kanʼaaniyiin. Wa l-balad annajjasat be l-damm.
[39] Humman annajjaso be fiʼilhum, aywa, be amalhum achcharmato.
[40] Khalaas, Allah khidib khadab chadiid didd chaʼabah. Aywa, jaʼal misil muharramiin chaʼabah al-humman warasatah.
[41] Hu sallamaahum fi iideen al-umam wa l-yakrahoohum hakamo fooghum.
[42] Udwaanhum zalamoohum wa humman anhazamo giddaamhum.
[43] Iddat marraat, Allah najjaahum wa laakin humman iso be choorithum wa gaʼado daayman fi l-khata.
[44] Hu simiʼ chakwithum wa chaaf diigithum.
[45] Hu fakkar fi muʼaahadatah maʼaahum wa be rahmatah al-kabiire, hu hanna fooghum.
[46] Hu sawwa kulla l-naas al-karaboohum yihinnu fooghum.
[47] Ya Allah Ilaahna, najjiina wa ajmaʼna min ust al-umam ! Wa be da, nahmudu usmak al-mukhaddas wa nimajjuduuk wa nachkuruuk.
[48] Baarak Allah Ilaah Bani Israaʼiil min zamaan wa ila l-abad. Wa kulla l-chaʼab yuguulu : «Aamiin ! Al-hamdulillah !»