[1] Ya Allah ! Ana nihibbak, inta gudurti !
[2] Allah hu maljaʼi yahmiini wa yinajjiini. Ilaahi hu maljaʼi wa l-bakaan al-nillabbad foogah. Hu daragati wa l-gudra al-tinajjiini. Hu maskani al-gawi.
[3] Ana sarakht wa gult : // «Al-hamdulillah ! Allah najjaani min udwaani.»
[4] Guyuud al-moot karabooni wa seel al-halaak khawwafni.
[5] Guyuud al-haawiye hawwagooni wa churukka al-moot // gaaʼidiin giddaami.
[6] Fi l-diige, naadeet Allah aywa, sarakht le Ilaahi wa min beetah al-mukhaddas hu simiʼni, hu simiʼ hiss siraakhi.
[7] Al-ard anhazzat wa rajafat wa asaas al-jibaal anhazza // wa barjal achaan ma himlo khadab Allah al-chadiid.
[8] Min manaakhirah yatlaʼ dukhkhaan wa min khachmah // tamrug naar al-taakul al-indaha jamur al-yahrig.
[9] Allah falla al-samaawaat wa dalla maʼa sahaabaay dalma // tihit rijileenah.
[10] Hu rikib fi makhluug samaawi // wa taar wa be janaahe al-riih, haam.
[11] Wa allabbad fi dalaam al-muhawwig misil kheemtah wa da dalaam almi wa l-sahaab al-azrag al-chaayil.
[12] Giddaamah nuur chadiid al-yamrug minnah sahaab wa barad wa jamur al-yahrig.
[13] Fi l-sama, Allah dagdag. Hu al-Aali wa hissah ansamaʼ be barad wa jamur yahrig.
[14] Hu zarrag nachaachiibah le udwaani wa chattataahum be katarat al-barg al-chadiid wa hazamaahum.
[15] Min chiddit zaʼalak, ya Allah, wa min hamu riih al-jaaye minnak, gaʼar al-bahar baan wa asaas al-dunya ankachaf.
[16] Wa min foog, madda iidah rafaʼni wa min al-almi al-katiir, // maragaani.
[17] Najjaani min udwaani al-chudaad wa min khusmaani al-gawiyiin minni.
[18] Wa yoom al-masiibe wagaʼat foogi, humman hajamooni laakin Allah fazaʼni.
[19] Wa hu maragaani min al-khutuura // wa harraraani, hu najjaani achaan yiriidni.
[20] Allah yiʼaamilni hasab adaalti wa yikaafiini hasab salaamat iideeni.
[21] Achaan ana taabaʼt derib Allah wa ma isiit Ilaahi.
[22] Aywa, ana tabbagt kulla churuutah wa abadan ma tarraft min gawaaniinah.
[23] Ana bigiit naadum tamaam giddaamah wa hafadt nafsi min al-khata.
[24] Wa khalaas, Allah antaani ajur // hasab adaalti wa hasab salaamat iideeni // al-hu chaafha giddaamah.
[25] Ya Allah ! Inta saadikh // maʼa l-saadikhiin wa ma tuluum al-naas al-tamaamiin.
[26] Maʼa l-taahiriin, tukuun taahir wa maʼa l-uwuj, tukuun aʼwaj.
[27] Achaan inta bas al-tinajji al-mazluumiin wa tidalli raas al-mustakbiriin.
[28] Ya Allah ! Inta bas tiwalliʼ faanuusi. Allah Ilaahi yidawwi leyi fi l-dalaam.
[29] Ya Ilaahi ! Beek inta, nahjim duyuuch wa beek inta, nunutt daraadir al-hille.
[30] Al-Rabb, derbah adiil, kalaam Allah daayman kaamil. Hu daraga le l-naadum al-yaljaʼ leyah.
[31] Achaan la ilaah illa Allah wa la maljaʼ illa Ilaahna.
[32] Ilaahi yihazzimni be gudra wa yisawwi derbi adiil.
[33] Wa antaani rijle khafiifiin najri misil al-khazaal wa rafaʼni fi l-bakaan al-aali.
[34] Hu bas allamaani kikkeef nihaarib wa kikkeef iideeni yajbudu // nubbaal al-nahaas.
[35] Ya Allah ! Anteetni daragat najaatak wa be iidak al-gawiiye, saaʼadtini wa be musaaʼadatak, gawweetni.
[36] Wa sahhalt leyi derbi wa sabbatt rijileeni.
[37] Nitaarid udwaani wa nalhaghum wa ma nigabbil lahaddi nikammilhum.
[38] Nidammirhum wa yagaʼo fi l-ard wa nifajjikhhum.
[39] Wa gudra le l-harib, inta anteetni wa dangart udwaani giddaami.
[40] Wa fi iideeni, sallamtuhum wa le khusmaani, // ana dammartuhum.
[41] Yiʼiitu le l-fazaʼ wa ma fi munajji, yasʼalo Allah wa ma yurudd leehum.
[42] Ana rihiktuhum misil ajaaj le l-riih, misil tiinat al-chawaariʼ nuguchchuhum.
[43] Wa inta tinajjiini // min muʼaaradat al-chaʼab wa tukhuttini kabiir fi l-umam wa chaʼab al-ma naʼarifhum // yakhdumu leyi.
[44] Wa yukhuttu udneehum le yasmaʼooni wa l-ajaanib yimaskunu nufuushum leyi.
[45] Al-ajaanib kislo wa marago min maljaʼhum be rajifiin.
[46] Al-Hayy hu Allah wa baarak Allah maljaʼi ! Al-Aali hu Ilaah al-yinajjiini.
[47] Ilaahi hu al-yichiil leyi al-taar wa yisallim leyi al-chuʼuub // tihit sultiti.
[48] Wa yinajjiini min iid udwaani wa battaan yansurni fooghum wa yinajjiini min al-naas al-yisawwu al-unuf.
[49] Wa be sabab da, ya Allah, fi ust al-umam, nachkurak wa be khine, namdah usmak.
[50] Allah anta al-nasur le l-malik al-hu darrajah. Aywa, wassaf kheerah le l-naadum al-hu masahah, le Dawuud wa zurriiytah ila l-abad.