[1] Ya nafsi, ahmudi Allah ! Ya kulla galbi, baarik usmah al-mukhaddas !
[2] Ya nafsi, ahmudi Allah wa ma tanse kulla kheerah !
[3] Hu yakhfir kulla khataaki wa yachfi kulla amraadki.
[4] Hu yafda hayaatki min al-moot wa yukhutt leeki taaj al-niʼma wa l-rahma.
[5] Wa yichabbiʼki be kheerah tuul umurki. Wa yigabbil leeki gudrat subaaki wa tabge misil al-sagur.
[6] Allah yisawwi al-adaala wa l-hagg le kulla l-mazluumiin.
[7] Hu arraf derbah le Muusa wa aʼmaalah le Bani Israaʼiil.
[8] Allah hu al-Rahmaan al-Rahiim wa l-Sabuur wa l-Muhibb.
[9] Hu ma yihaakim daayman wa ma yakhdab ila l-abad.
[10] Hu ma yiʼaamilna hasab zunuubna wa ma yijaaziina hasab khataana.
[11] Wa misil al-sama aali ziyaada min al-ard, rahmatah kabiire ziyaada le l-yakhaafo minnah.
[12] Wa misil al-sabaah baʼiid min al-kharib, hu yibaʼʼid minnina isyaanna.
[13] Wa misil al-abu yarham awlaadah, Allah yarham al-yakhaafo minnah.
[14] Achaan hu yaʼarif kikkeef hu khalagaana wa yaʼarif tamaam kadar aniina min al-turaab.
[15] Bani Adam ayyaamah misil al-gechch wa yinawwir misil zuhuur al-kadaade.
[16] Wakit al-riih tusuug, // humman yabgo ma fiihum wa l-bakaan al-gaʼado foogah kula // ma maʼruuf.
[17] Laakin rahmat Allah gaaʼide daayman wa ila l-abad fi l-naas al-yakhaafo minnah. Wa adaaltah le iyaal iyaalhum,
[18] humman al-yahfado muʼaahadatah wa yizzakkaro churuutah wa yitabbuguuhum.
[19] Allah sabbat archah fi l-samaawaat wa mamlakatah tahkim fi kulla cheyy.
[20] Ya malaaʼikat Allah, ahmudu Allah ! Intu furraas al-gaadriin al-tasmaʼo kalaamah wa titabbuguuh.
[21] Ya kulla khuwwaatah, ahmudu Allah ! Intu khaddaamiinah al-tisawwu al-hu yidoorah.
[22] Ya makhluugiinah fi kulla mamlakatah, ahmudu Allah ! Ya nafsi, ahmudi Allah !