[1] Baarak Allah, maljaʼi al-yiʼallim iideeni al-harib wa asaabʼi al-duwaas.
[2] Hu al-yarhamni wa hu bakaani al-gawi, hu maskani wa hu al-yinajjiini. Hu daragati wa maljaʼi wa hu al-khatta al-chaʼab tihti.
[3] Ya Allah ! Bani Adam, hu chunu wa maala tajʼalah ? Chunu al-insaan wa maala tifakkir foogah ?
[4] Al-insaan misil al-riih wa ayyaamah misil al-dull al-yufuut.
[5] Ya Allah ! Fill samaawaatak wa dalli, almas al-jibaal wa yidakhkhunu !
[6] Atlig al-barg wa chattit al-udwaan, rassil nachaachiibak wa atrudhum !
[7] Midd iideenak min foog, afzaʼni wa najjiini // min almi al-khariig. Afzaʼni min iideen al-ajaanib
[8] al-lisaanhum yuguul al-kidib wa iidhum al-zeene // malaane be khachch.
[9] Ya Rabb ! Nikhanni leek khine jadiid wa nadrub leek al-jigindiiye al-hubaalha achara.
[10] Leek inta al-tanti al-nasur le l-muluuk wa tinajji abdak Dawuud // min al-seef al-kaatil.
[11] Afzaʼni wa najjiini min iideen al-ajaanib al-lisaanhum yuguul al-kidib wa iidhum al-zeene // malaane be khachch.
[12] Khalli awlaadna yabgo misil bizre al-takbur fi chabaabha wa banaatna yabgan misil amad al-yijammulu beehum gasir.
[13] Khalli dabangaatna yamlo marra waahid be kulla cheyy wa khanamna yiziidu be aalaaf aywa, yiziidu fi kadaaditna // be acharaat al-aalaaf !
[14] Khalli bagarna yabgo sumaan wa ma fi khurma wa la derib al-yadkhul beyah al-adu wa ma fi korooraak fi chawaariʼna.
[15] Mabruuk le l-chaʼab al-ligo baraka misil di ! Aywa, mabruuk le l-chaʼab al-yaʼabudu Allah al-Rabb.