[1] Ya Allah ! Ana nikhanni be kheerak ila l-abad wa niʼarrif daayman sidkhak // min zurriiye le zurriiye.
[2] Achaan ana gult : // «Rahmatak mabniiye ila l-abad wa fi l-sama, sidkhak musabbat.»
[3] Wa inta gult : «Ana sawweet muʼaahada // maʼa hu al-ana azaltah wa halaft le Dawuud abdi // be l-kalaam da :
[4] ‹Nikhalli daayman waahid min iyaalak fi l-muluk wa nisabbit mulkak // min zurriiye le zurriiye.›» Wagfa.
[5] Ya Allah, khalli al-sama tachkur ajaaybak ! Aywa, yachkur sidkhak fi mujtamaʼ al-khudduusiin.
[6] Fi l-sama, yaatu misil Allah ? Wa fi ust al-ilaahaat, yaatu yichaabih Allah ?
[7] Hu Ilaah yirajjif // malammat al-khudduusiin wa yikhawwif // kulla l-muhawwigiinah.
[8] Ya Allah, al-Ilaah al-Gaadir ! Yaatu al-gawi mislak, ya Allah ? Wa sidkhak muhawwigak.
[9] Inta bas al-tahkim al-bahar wakit yihiij wa tihaddiih wakit yigawwim moojah.
[10] Inta katalt Rahab khuul al-bahar wa rihikt janaaztah wa chattat udwaanak be khuwwat iidak.
[11] Al-sama hintak wa l-ard kula hintak. Al-dunya wa kulla l-foogha, inta bas assastaha.
[12] Inta bas khalagt al-munchaakh wa l-wati. Wa jibaal Taabuur wa Harmuun yiʼiitu min al-farah be usmak.
[13] Leek inta al-duraaʼ al-gawi wa l-iid al-chadiide wa iidak al-zeene marfuuʼa.
[14] Al-hagg wa l-adaala, humman asaas mulkak. Al-kheer wa l-sidikh maachiin giddaamak.
[15] Mabruuk le l-chaʼab al-yaʼarfu kikkeef yachkuruuk wa yuruukhu fi nuur wijhak, ya Allah !
[16] Kulla yoom yinbastu be usmak wa be adaaltak, yugummu.
[17] Achaan inta bas charafhum wa gudrithum wa be ridaak inta, raasna yinrafiʼ.
[18] Allah, hu daragatna. Aywa, Khudduus Israaʼiil, // hu malikna.
[19] Wa khalaas, be ruʼya inta kallamt le muʼminiinak wa gult : «Ana saaʼadt waahid fahal aywa, darrajt sabi fi l-chaʼab.
[20] Ana ligiit abdi Dawuud wa masahtah be dihin al-khaass wa darrajtah.
[21] Iidi tukuun maʼaayah wa tigawwiih wa duraaʼi yisawwiih chadiid.
[22] «Al-adu ma yagdar yikhaffilah wa l-mujrim ma yiʼayyibah.
[23] Achaan ana narhak udwaanah giddaamah wa nadrub al-yakrahooh.
[24] «Wa sidkhi wa rahmati // yukuunu maʼaayah wa be usmi, yarfaʼ raasah.
[25] Nukhutt al-bahar tihit iidah wa l-buhuur tihit iidah al-zeene.
[26] Hu yinaadiini wa yuguul leyi : ‹Inta abuuyi wa inta Ilaahi wa jabali al-yinajjiini.›
[27] Ana nisawwiih wald al-bikir wa hu yukuun aali // min muluuk al-ard.
[28] Ana nahfad leyah rahmati ila l-abad wa muʼaahadati kula // tukuun leyah saabte.
[29] Wa nisabbit zurriiytah ila l-abad wa kursi mulkah umrah yabga tawiil misil umur al-sama.
[30] Kan iyaalah yaabo Tawraati wa ma yitaabuʼu gawaaniini,
[31] wa kan humman ma yihtarumu churuuti wa ma yahfado awaamiri,
[32] khalaas, ana niʼaakhibhum be asa fi chaan zunuubhum wa be daribiin fi chaan khataahum.
[33] Laakin be da kula, ana ma niwaggif rahmati minhum wa la nikhalli sidkhi.
[34] Wa ana ma nangud muʼaahadati wa la nikhayyir kalaami.
[35] Wa daahu marra waahide bas, ana halaft be khadaasti wa gult : ‹La ! Ana ma nukhuchch Dawuud.
[36] Zurriiytah tagood ila l-abad wa kursi mulkah yitawwil giddaami misil al-harraay
[37] wa misil al-gamar. Wa yukuun saabit ila l-abad wa chaahid amiin fi l-sama.›» Wagfa.
[38] Laakin inta, ya Rabb, abeet wa kiriht al-malik al-inta masahtah wa darrajtah wa gammeet diddah.
[39] Wa inta nagadt al-muʼaahada maʼa abdak wa rameet taajah fi l-turaab.
[40] Inta sawweet khuram fi kulla zaraayibah wa dammart mudunah al-gawiyiin.
[41] Wa kulla l-faaytiin nahabooh wa hu bigi iyyeere le jiiraanah.
[42] Wa inta rafaʼt al-iid al-zeene // hana udwaanah wa farraht kulla khusmaanah.
[43] Wa inta wajjaht diddah seefah halaalah wa ma saaʼadtah fi wakt al-harib.
[44] Inta waddart charafah wa rameet kursi mulkah fi l-turaab.
[45] Wa chayyabtah gabul siniinah wa dasseetah fi l-eeb. Wagfa.
[46] Le mata, ya Allah ? Taaba ma tiwajjih aleyi daayman ? Wa le mata tikhalli khadabak yahrig misil al-naar ?
[47] Fakkir fi hayaati al-mahduuda ! Inta khalagt al-naas le chunu ?
[48] Yaatu al-naadum al-ma yuduukh al-moot wa yanja min al-khabur ? Wagfa.
[49] Ya Rabb ! Ween rahmatak al-awwal, al-be sidkhak inta halaft beeha le Dawuud ?
[50] Ya Rabb ! Fakkir fi l-muʼyaar al-muwajjah le abiidak. Fakkir fi kulla l-chaʼab al-ana mukallaf beehum dool.
[51] Ya Allah ! Fakkir fi udwaanak al-ayyaro khatwaat al-malik al-inta masahtah wa darrajtah.
[52] Baarak Allah ila l-abad ! Aamiin ! Aamiin !