[1] Najjiini min udwaani, ya Ilaahi ! Ahmiini min al-yugummu diddi !
[2] Najjiini min al-yisawwu al-zulum wa afzaʼni min kattaaliin al-dimam !
[3] Daahu humman karaso leyi, humman al-gawiyiin le yahjumuuni wa ana ma sawweet isyaan wa la zanib, ya Allah !
[4] Wa ma sawweet khata, al-be sababah yajru wa yijahhuzu le yahjumuuni. Gumm, wajjih aleyi wa chiifni !
[5] Ya Allah Ilaahi, inta al-Gaadir, // Ilaah Bani Israaʼiil ! Gumm, aakhib kulla l-umam ! Ma tarham waahid kula min al-khaayniin wa l-zaalimiin ! Wagfa.
[6] Humman yigabbulu fi l-achiiye wa yanbaho misil al-kulaab wa yihawwugu al-madiina.
[7] Daahu khuchuumhum malaaniin zabad wa lisneehum turaan misil al-suyuuf. Yaatu minhum al-yasmaʼ ?
[8] Wa inta, ya Allah, tadhak leehum wa tichchammat fi kulla l-umam.
[9] Ana niwajjih aleek inta gudurti, achaan inta al-Rabb // maskani al-gawi.
[10] Inta al-rahiim tamchi giddaami wa tichawwifni haziimat udwaani.
[11] Ma tidammirhum achaan be da, chaʼabi yansa. Wa khalli gudurtak tihizzuhum wa tidalliihum, ya Rabbina, ya daragatna.
[12] Wa min yikallumu, tasmaʼ al-zanib fi kalaamhum. Khalli istikbaarhum yabga leehum charak fi chaan laʼanathum wa kidibhum al-buguuluuh.
[13] Dammir ! Be khadab dammirhum wa ma tifaddil minhum cheyy ! Wa be da, yaʼarfu kadar al-Rabb maalik // fi zurriiyit Yaakhuub, fi kulla l-ard min tarafha le tarafha. Wagfa.
[14] Wa yigabbulu fi l-achiiye wa yanbaho misil al-kulaab wa yihawwugu al-madiina.
[15] Wa humman yiʼiiru le yifattuchu akil wa kan ma chibʼo, // tuul al-leel yasrakho.
[16] Ana nikhanni be gudurtak wa nafrah be rahmatak achaan inta maskani al-gawi wa maljaʼi fi yoom al-diige.
[17] Wa ana nikhanni beek, inta gudurti wa maskani al-gawi, inta Ilaahi wa Rabbi al-rahiim.