[1] Adiil kan nachkuru Allah wa namdaho usmak, ya l-Aali !
[2] Be fajur, niballikh be rahmatak wa be achiiye, nikhabbir be sidkhak.
[3] Aywa, nachkurak be aala al-indaha achara habil wa be amsibeybe wa be hiss al-jigindiiye.
[4] Achaan inta farrahtini be amalak, ya Allah ! Wa be khidmit iidak, ana ragragt min al-farah !
[5] Ya Allah, aʼmaalak kubaar wa afkaarak ma induhum hadd !
[6] Al-mukhaffal ma yaʼarif cheyy wa l-matmuus ma yafham al-achya dool.
[7] Wa kan al-aasiyiin bazaro // misil gechch akhdar wa kan kulla l-fasliin nawwaro kula, khalaas fi l-nihaaya, yiddammaro ila l-abad.
[8] Wa laakin inta fi l-aʼaali. Ya Allah, inta gaaʼid ila l-abad !
[9] Achaan daahu udwaanak, ya Allah ! Daahu udwaanak // gaaʼidiin yiddammaro wa l-zaalimiin yichittu !
[10] Inta tarfaʼ raasi misil garin al-jaamuus wa masahtini be dihin muʼattar.
[11] Uyuuni yichiifu udwaani wa udneeyi yasmaʼo al-yugummu diddi le yahjumuuni.
[12] Al-saalih yutuul misil nakhal wa yiddaggag misil arz Lubnaan.
[13] Hu mumaggan fi beet Allah wa yikhaddir fi fadaayit Ilaahna.
[14] Hatta kan ajjaz kula, yalda fawaakih wa daayman indah gudra wa gaaʼid akhdar.
[15] Al-saalih yiballikh be adaalit Allah wa yuguul : «Hu jabal maljaʼi wa fiyah hu, fasaala ma fi.»