[1] Ya nafsi, ahmudi Allah ! Ya Allah Ilaahi, inta aziim // marra waahid ! Inta libist al-majd wa l-azama.
[2] Inta libist al-nuur misil khalag wa falleet al-samaawaat misil sitaar.
[3] Hu kawwan khuraf foog // min almi al-sama wa sawwa al-sahaab misil arabatah wa raakh fi janaahe al-riih.
[4] Wa min al-riih, sawwa murassaliinah wa min al-naar al-tahrig, // sawwa khaddaamiinah.
[5] Hu sabbat al-ard fi asaasha wa hi abadan ma tinhazza.
[6] Wa kasaaha be l-buhuur misil khalag wa l-almi lihig lahaddi l-jibaal.
[7] Ya Rabb ! Min tahdiidak, al-almi jara wa min hissak al-misil raʼad, // al-almi barjal.
[8] Hu talaʼ fi l-jibaal wa nazal fi l-wudyaan wa macha ale l-bakaan // al-inta assastah leyah.
[9] Inta khatteet leyah huduud ma yufuuthum wa battaan ma yigabbil // yikhatti al-ard.
[10] Min uyuun almi, inta sawweet buhuur al-jaro ambeenaat al-jibaal.
[11] Humman yazgu kulla haywaanaat al-kadaade wa hamiir al-kadaade kula yarwo.
[12] Jambuhum yaskunu tuyuur al-sama wa fi lubb al-chadar, yikhannu.
[13] Min al-sama foog, inta tazgi al-jibaal wa l-ard tinmali // be natiijat khidimtak.
[14] Inta tigawwim gechch le l-bahaayim wa nabaataat al-yahrithum Bani Adam le yalga maʼaachah min al-ard.
[15] Wa dool khamar al-yifarrih // galib Bani Adam wa dihin al-yinawwir wijhah wa akil al-yantiih gudra.
[16] Wa chadar Allah yarwa, aywa, al-arz al-mumaggan fi Lubnaan.
[17] Da l-bakaan al-yaskunu foogah al-tuyuur wa l-kunji yabni uchchah // fi chadar al-sarwi.
[18] Wa l-jibaal al-aaliyiin humman le khazaal al-hajar wa l-hujaar maljaʼ le tees al-hajar.
[19] Inta sawweet al-gamar // le yihaddid al-aʼyaad wa l-harraay hi taʼarif // wakit waguuʼha.
[20] Inta kawwant al-dalaam wa jibt al-leel al-yilharrako foogah kulla haywaanaat al-khaaba.
[21] Al-diidaan yikirru le yalgo fariisithum wa yifattuchu akilhum minnak inta, ya Rabb !
[22] Fi taluuʼ al-harraay, humman yufuutu wa yamchu yarugdu fi bakaanaathum.
[23] Wa l-insaan yamrug wa yamchi amalah wa yisawwi khidimtah // lahaddi l-achiiye.
[24] Ya Allah ! Aʼmaalak katiiriin ! Be hikma, inta sawweethum kulluhum wa l-ard malaane be makhluugiinak.
[25] Daahu al-bahar kabiir wa wasiiʼ min kulli jiihe. Wa l-haywaanaat yilharrako foogah, kubaar wa dugaag be katara.
[26] Wa fi l-bahar da, al-sufun yamchu wa yaju wa Luyaataan al-khuul al-inta khalagtah yalʼab foogah.
[27] Wa kulluhum khaattiin achamhum foogak le tantiihum maʼaachhum fi waktah.
[28] Inta tantiihum wa humman yilaggutuuh. Inta taftah iidak wa humman yachbaʼo be l-kheer.
[29] Laakin wakit ma tiwajjih aleehum, humman yinbahtu. Wakit tichiil minhum al-ruuh, yumuutu wa yigabbulu fi l-turaab.
[30] Wa wakit tirassil ruuhak, takhlighum wa tijaddid al-haya fi l-ard.
[31] Khalli majd Allah yagood ila l-abad wa khalli Allah yafrah be aʼmaalah.
[32] Hu yanzur al-ard bas wa hi tarjif. Hu yalmas al-jibaal wa humman yidakhkhunu.
[33] Ana nikhanni le Allah muddit hayaati wa namdah Ilaahi tuul umri.
[34] Khalli khineeyi da yabga leyah halu wa ana nafrah be Allah.
[35] Wa khalli al-muznibiin yikammulu min al-ard wa l-aasiyiin yabgo ma fiihum. Ya nafsi ! Ahmudi Allah ! Al-hamdulillah !