[1] Achkuru Allah wa atru usmah ! Wa arrufu al-chuʼuub be aʼmaalah.
[2] Khannu leyah wa amdahooh wa fakkuru fi kulla ajaaybah.
[3] Anbastu achaan usmah al-mukhaddas wa khalli guluubku // yinmalu be farah, intu al-gaaʼidiin titaabuʼu Allah.
[4] Fattuchu Allah wa gudurtah wa wajjuhu aleyah daayman.
[5] Azzakkaro ajaaybah al-sawwaahum, aywa, ajaaybah wa gawaaniinah // al-amar beehum
[6] intu, ya zurriiyit Ibraahiim abdah wa intu, ya zurriiyit Yaakhuub // al-Allah azalaaku !
[7] Allah hu bas Ilaahna al-yahkim fi kulla l-ard.
[8] Hu yizzakkar daayman fi muʼaahadatah wa fi kalaamah al-amar beyah // le alif zurriiye.
[9] Wa di muʼaahadatah al-sawwaaha // maʼa Ibraahiim wa akkadha be haliife le Ishaakh.
[10] Hu sabbat chart le zurriiyit Yaakhuub wa sawwa muʼaahada daayme // maʼa Bani Israaʼiil.
[11] Wa gaal : «Ana nantiiku balad Kanʼaan wa da gisim al-talgooh warasa.»
[12] Wa fi l-zaman da, adad juduudna chiyya, humman chiyya marra waahid wa saakniin fi l-balad di // misil ajaanib.
[13] Humman raaykhiin min umma le umma wa min mamlaka le chaʼab aakhar.
[14] Laakin Allah ma khalla naadum yazlumhum wa aakhab muluuk fi chaanhum.
[15] Wa gaal : «Ma tilammusu al-naas al-ana masahtuhum wa darrajtuhum wa ma tisawwu al-fasaala le anbiyaayi.»
[16] Wa Allah jaab al-juuʼ fi l-balad wa gallal foogha al-maʼaach.
[17] Hu rassal giddaamhum naadum wa hu Yuusuf al-baaʼooh misil abid.
[18] Da hu al-gayyado rijileenah wa dasso leyah jinziir fi ragabatah
[19] lahaddi kalaamah al-gaalah alhaggag wa Allah kachafah wa ligiih saafi.
[20] Malik Masir anta amur le yatulguuh aywa, haakim al-chaʼab fakkaah.
[21] Hu sawwaah sayyid fi beetah wa haakim fi kulla maalah.
[22] Wa jabar masaaʼiilah // yasmaʼo kalaam Yuusuf wa Yuusuf allam kubaaraatah al-hikma.
[23] Wa be da, Bani Israaʼiil dakhalo fi Masir aywa, zurriiyit Yaakhuub sakano fi balad Haam.
[24] Wa Allah sawwa chaʼabah yaldo katiir wa sawwaahum chudaad // min khusmaanhum.
[25] Hu khayyar guluub khusmaanhum le yakraho chaʼabah wa yilʼaamaro didd abiidah.
[26] Baʼad da, rassal abdah Muusa wa Haaruun al-hu azalah.
[27] Wa humman sawwo alaamaat fi Masir aywa, sawwo ajaayib fi balad Haam.
[28] Hu rassal al-dalaam wa l-dalaam ja achaan Muusa wa Haaruun // ma iso kalaamah.
[29] Hu khayyar almiihum be damm wa katal huuthum.
[30] Wa baladhum anmalat be difdeʼ lahaddi fi lubb khuraf muluukhum.
[31] Wa Allah anta amur wa dubbaan amboojani wa ambaaʼuuda jo fi kulla baladhum.
[32] Hu nazzal fooghum matara hana barad wa naar ambalbaala fi baladhum.
[33] Hu dammar inabhum wa tiinhum wa kassar chadar baladhum.
[34] Hu anta amur wa saar al-leel wa jaraad aakhar jo be katara.
[35] Humman akalo kulla gechch baladhum wa akalo intaaj arduhum.
[36] Hu katal kulla awlaad al-bikir fi baladhum wa humman natiijat awwal gudrithum.
[37] Hu marag chaʼabah iideehum malaaniin be fudda wa dahab wa ma fi naadum attartaʼ // min gabaayilhum.
[38] Wa naas Masir firho be marigiinhum achaan al-khoof karabhum.
[39] Allah madda sahaabaay le yidaarighum wa naar le yidawwi leehum be leel.
[40] Wa fi talabhum, hu nazzal leehum al-salwa aywa, chabbaʼaahum be akil min al-sama.
[41] Hu fatah al-hajar wa almi saal wa jara fi l-ard al-jafaaf misil bahar.
[42] Hu yizzakkar fi waʼadah al-mukhaddas al-sawwaah maʼa abdah Ibraahiim.
[43] Hu marag chaʼabah be farah wa marag al-azzalaahum be zakhraat.
[44] Wa hu antaahum ard al-umam wa waraso al-natiija // hint khidmit chuʼuub aakhariin.
[45] Achaan yahfado gawaaniinah wa yitabbugu Tawraatah. Al-hamdulillah !