<Мәсәлә 31

[1] Әв ьн готьнед Ләмуел п'адша, әw ширәтед кӧ дийа wи дабунә wи:

[2] Чь бежьмә тә лаwe мьн? Чь бежьмә тә кӧр'е навдьле мьн? Чь бежьмә тә кӧр'е ад-qьраред мьн?

[3] Qәwата хwә нәдә жьна, нә жи бьдә әwед кӧ п'адша жорда тиньн.

[4] Ль п'адша нак'әвә Ләмуело! ль п'адша нак'әвә, кӧ шәраве вәхwә у мир-бәга кӧ дьхwазьн авще вәхwьн.

[5] Нәбә кӧ вәхwьн qануне бир бькьн у һәqе беч'арә бьт'әр'ьбиньн.

[6] Авще бьдьнә йе ль бәр р'ӧһ' у шәраве бьдьнә йе хwәй дәрд-кӧл.

[7] Бьра әw вәхwьн т'ӧнәбуна хwә бир бькьн у мә'рьмийа хwә иди нәкьн бира хwә.

[8] Дәве хwә вәкә бона йе бе зар-зьман у бона пьштгьртьна йе бек'омәк.

[9] Дәве хwә вәкә у бь р'астийе һ'акьмтийе бькә у сәр ише фәqир у бәләнгазда бьньһер'ә.

[10] Ки дькарә к'ӧлфәта ә'сьл бьбинә? Qимәте wе жь лал-дӧр' жортьр ә.

[11] Дьле малхе wе wеда гӧман ә у әw т'ӧ кемасийе набинә.

[12] Т'әмамийа ә'мьре хwәда әwе qәнщийе wир'а бькә, нә кӧ хьрабийе.

[13] Һьри у к'ьтане п'әйда дькә, бь дьл у щан бь дәсте хwә хәбат дькә.

[14] Әw мина гәмийа т'ӧщарәте, кӧ нане wе жь щийе дур те.

[15] Әw һе шәвда зу р'адьбә, нәфәред хwә нан-ав дькә у шьхӧл дьдә ль бәр щарийа.

[16] Дина хwә дьдә ә'рдәки у дьк'ьр'ә, бь к'әда дәсте хwә тьрийа датинә.

[17] Әw пьшта хwә дьшьдинә, зәндада qәwат дьбә.

[18] Әw к'ьфш дькә к'ьр'ин-фьротан жер'а qәнщ ә у шәве жи ч'ьра wе венасе.

[19] Дәст давежә әw т'әшийа хwә, бь к'әфа дест дьзьвьр'инә.

[20] Дәст давежә әw к'әсиба у дәст дьрежи бәләнгаз дькә.

[21] Бона нәфәра әw жь бәрфе натьрсә, чьмки нәфәрә дӧ дәст к'ьнщә хwәкьри нә.

[22] Әw р'убәра хwәр'а че дькә, к'ьнщед wе жь к'ьтане хас у ширк ә.

[23] Малхе wе нав у дәнг ә нав дәргәһада, гава нава р'успийед wәлатда р'удьни.

[24] Әw к'ьнщед к'ьтани че дькә дьфьрошә у пьштәка дьдә базьргана.

[25] Qәwат у хwәйир'умәт ьн к'ьнщед wе у ахьрийа wе, wе хер-хwәши бә.

[26] Әw дәве хwә бь сәрwахтийе вәдькә, ль сәр зьмане wе һинкьрьна амьн һәйә.

[27] Әw мьqатийе мала хwә дькә у нане хwәр'анәдитийе әw нахwә.

[28] Зар'ед wе р'адьбьн хwәзийа хwә wе тиньн у малхе wе жи пәсьне wе дьдә:

[29] «Гәләк qизед ә'сьл һәбунә, ле тӧ буйи ль сәр wанр'а».

[30] Дәрәw ә дәлалти у п'уч' ә бәдәwәти, к'ӧлфәта жь Хӧдан дьтьрсә әwә хwәзити.

[31] Жь бәре дәсте wе бьдьнә wе, дәргәһада wе кьред wе пәсьне wе бьдьн .