<Мәсәлә 28

[1] Р'әв дьк'әвә нәп'ак, бейи кӧ йәк пәй к'әвә, ле йе р'аст мина шера мьнәте нак'ьшиньн.

[2] Гава wәлат сәрһ'ьшк дьбә, гәләк сәрwер жи зедә дьбьн, ле бь сайа мәрьвәки аqьл у занә дьреж дьминә.

[3] Мәрьве мә'рьми кӧ тәнгасийе дьдә к'әсиба, мина тә'вийа баранейә кӧ зәвийе дьшо дьбә.

[4] Йед кӧ гӧһ надьнә qануне, пәсьне нәп'ака дьдьн, ле йед кӧ qануне хwәй дькьн, һьмбәри wан дьсәньн.

[5] Мәрьве хьраб һәqийе фә'м накьн, ле йе Хӧдан дьгәр'ьн, т'ам фә'м дькьн.

[6] Qәнщ ә бәләнгазе кӧ р'ийа хwәйә амьнда дьчә, нә кӧ дәwләтики хальфи.

[7] Йе qануне хwәй дькә кӧр'әки аqьл ә, ле йе дьбә һәвале п'ьр'хӧрә-п'уч', баве хwә дьдә шәрме.

[8] Йе кӧ һәбука хwә бь к'ар у сәләфа зедә дькә, әw бона йе кӧ дәст давежә к'әсиба т'оп дькә.

[9] Әwе кӧ т'ьлийа дькә гӧһе хwә кӧ qануне нәбьһе, дӧайе wи жи һ'әта зьвер ә.

[10] Әwе кӧ йе р'аст бәрбь р'ийа хьрабийе дьбә, әwе хwәха бьк'әвә ч'ә'ла хwәйә к'олайи. Ле йе беләк'ә wе хер-хwәшийе wар бьн.

[11] Мәрьве дәwләти ль бәр ч'ә'ве хwә сәрwахт к'ьфш дьбә, ле к'әсибе аqьл гьлийа же дьк'ьшинә.

[12] Гава р'аст әшq у ша дьбьн, р'умәта мәзьн ә, ле гава нәп'ак һ'ьр' дьбьн, мәрьв хwә вәдьшерьн.

[13] Әwе кӧ нәһәqийа хwә вәдьшерә хере набинә, ле йе кӧ хwә мӧкӧр' те у дьһелә, wе р'ә'ме бьбинә.

[14] Мәрьве һәр гав хwәдехоф, хwәзьли йә, ле йе дьле хwә дькә кәвьр, чәрха wи ч'әп дьбә.

[15] Нәп'аке кӧ сәрwерийа мьләте бәләнгаз дькә, мина шере мьр'ә-мьр'ә у һ'ьр'ч'е бьр'чи йә.

[16] Сәрwере сәрсах гәләки тәнгасийе дьдә, ле йе һәбука һ'әрам һ'ьз накә, ә'мьре хwә дьреж дькә.

[17] Мәрьве хуна инсен сәр стуйе wи, һ'әта гор'е дьр'әвә, бьра т'ӧ кәс wи нәгьрә.

[18] Мәрьве р'едайи беләк'ә, әwе һәр'ә безәдә, ле йе ль р'ийед харо-марда зу дьк'әвә.

[19] Йе ә'рде хwә бещәр дькә, wе нане хwә т'ер бьхwә, ле йе дьдә пәй тьште п'уч', дьбә һесир-к'әсибәк.

[20] Әw мәрьв амьн ә, хwәйе хер у бәрәк'әт ә, ле йе дьләзинә дәwләти бә, бе бәла наминә.

[21] Дӧр'утикьрьн нәбаш ә, ле мәрьв бона пари нан дькарә хwә гӧнәк'ар кә.

[22] Мәрьве ч'ә'вбьр'чи дькә кӧ дәwләти бә, ле ньзанә кӧ бәләнгазийе сәрда бе.

[23] Кьре мерьв бьдьнә р'уйе wи ахьри һе хер ә, нә кӧ бь зьмен һ'ьләк'арийе бькьн.

[24] Әwе кӧ дьзийа де у баве хwә дькә у дьбежә: «Әва нә гӧнә йә», әw һәвале дьз-qачаха йә.

[25] Хwәйе дьле тьма шер' т'әвр'а дькә, ле йе хwә дьсперә Хӧдан гӧл дьдә.

[26] Йе хwәда гӧман ә, әw ахмах ә, ле йе сәрwахтийеда дьжи wе азад бә.

[27] Алик'аре бәләнгаза әw набинә тә'ли-тәнгийа, ле әwе кӧ пьшт дьдә wи, әw ньфьр'а тинә ль сәр хwә.

[28] Гава нәп'ак һ'ьр' дьбьн, хәлq хwә вәдьшерә, ле гава әw дьк'әвьн, мәрьве р'аст зедә дьбьн.