<Мәсәлә 25

[1] Әв ьн әw мәсәлед Сьлеман, к'ижан кӧ мәрьвед Һьзqийа п'адше Щьһудайе жь бәр һьлданә:

[2] Кьред Хwәдейә вәшарти р'умәта wи йә, ле р'умәта п'адше кьр ә'йанкьрьн ә.

[3] Чаwа бьльндайа ә'змен у к'урайа ә'рде, ӧса жи дьле п'адше найе ә'нәнәкьрьне.

[4] Т'орта зив же бьqәтинә, әwе зивкәрр'а дәрданәке дәрк'әвә,

[5] нәп'ак жи жь п'адше бьqәтинә, т'әхте wийе бь р'астийе qәдим бә.

[6] Ль бәр п'адше п'айе хwә нәдә, ль щийе гьрәгьра нәсәкьнә,

[7] qәнщ ә кӧ тәр'а бежьн: «К'әрәм кә ве жоре», нә кӧ ль бәр гьрәгьра тә ньмьз кьн.

[8] Бь дитьна ч'ә'ва, зу нәк'әвә нава шәр' у дә'wа, wәки һәвале тә, тә нәдә шәрме у ньзаньби ахьрийе те чь бьки.

[9] Пьрсед хwә т'әви һәвале хwә сафи кә, ле сӧр'а хәлqер'а вәнәкә,

[10] wәки йе бьбьһе тә беһӧрмәт нәкә у әw наве хьраб ль сәр тә нәминә.

[11] Готьнәкә щида мина сева зер'ин ә ль сәр зив qашкьри.

[12] Ширәта йе сәрwахт, бона йе гӧһдар, мина гӧһар у хьшьре зер'ин ә.

[13] Чаwа сьр'а бәрфе дәма нандьруне, ӧса жи qасьде амьн бона шандийе хwә, әw ськ'ане дьдә нәфса хwәйийе хwә.

[14] Йе п'ешк'еш соз дьдә у накә, әw мина байе у ә'wре бе баран ә.

[15] Бь сәбьре дьле мир у бәга нәрм дьбә у заре ширьн һәстуйа һурдәхwәши дькә.

[16] Гава тә һьнгьв дит, wәкә мә'де хwә бьхwә, нәбә кӧ тӧ же т'ер би у паше вәр'әши.

[17] Һәр гав нәчә мала щинар, кӧ әw жь тә т'ер нәбә у паше әw жь тә ащьз бә.

[18] Йе шә'дәтийа дәрәw һьмбәри һәвале хwә дьдә, әw мина р'ьм, шур у тире тужкьри йә.

[19] Гӧмана ль сәр мәрьве бе амьн, р'ожа тәнгасийеда мина дьране шкәсти у ньге кӧләк ә.

[20] Ль бәр мәрьве дьлшкәсти, стьран готьн, мина чаwа йәк р'ожа сар к'ьнще хwә бехә, йан жи чаwа хwе текьнә ль сәр бьрине.

[21] Һәгәр дьжмьне тә бьр'чи йә, нен бьде у һәгәр т'и йә, аве бьде,

[22] чьмки тӧ бь ве йәке пьриске егьр сәр сәре wи т'оп дьки у Хӧдане ль тә вәгәр'инә.

[23] Байе бакӧре баране тинә, заре мьхәнәт жи р'уйе мә'дәкьри.

[24] Qәнщ ә qӧлч'әкида ль сәр хени бьжин, нә кӧ т'әви жьна шәр'уд ханәкеда.

[25] Мьзгинийа жь wәлатәки дур мина чаwа ава сарә бона зарe ч'ьла.

[26] Мәрьве р'аст кӧ ль бәр нәп'ак ньмьз дьбә, әw мина канийа хьтьми у селава шелу йә.

[27] Чаwа гәләк һьнгьв-хwарьн нәqәнщ ә, ӧса жи йе ль пәй наве хwә к'әти нә нав ә.

[28] Мәрьве кӧ нәфса хwә нькарә, әw мина бажарәки хьрабәйи бесур ә.