<Мәсәлә 2

[1] Лаwе мьн! Һәгәр тӧ готьнед мьн qәбул ки у т'әмийед мьн щәм хwә хwәй ки,

[2] ӧса кӧ гӧһ бьди сәрwахтийе у дьле хwә ль бәр билантийе вәки,

[3] һәгәр гази аqьл ки у дәнг бьди билантийе

[4] у тӧ wе бьгәр'и чаwа зив у пәйк'әви бьбини мина хьзне,

[5] те һьнге хофа Хӧдан фә'м бьки у хwәденаскьрьне бьзаньби.

[6] Чьмки Хӧдан ә йе сәрwахтийе дьдә, заньсти, биланти жи жь дәве Wи дәртен.

[7] Әw бона р'аста ачьхийе хwәй дькә, Әw мәрт'ал ә бона йед р'еда беләк'ә нә.

[8] Әw мьqатийе р'ийед р'астийе дькә у шьвәр'ийа амьнед Хwә хwәй дькә.

[9] Һьнге те р'астийе, qьраре, һәqийе, фә'м бьки у сәрда жи һәр шьвәр'ийед qәнщ.

[10] Гава сәрwахти бьк'әвә дьле тә у занәбун ль р'ӧһ'е тә хwәш бе,

[11] һьнге фьрасәте тә хwәй кә у аqьле мьqатийе ль тә бькә,

[12] wәки тә жь р'ийа хьраб у wан мәрьвед мьхәнәтә дәрәwин хьлаз кә,

[13] к'ижан кӧ жь р'ийа р'аст дәрк'әтьнә, кӧ р'ийед тә'ристанийеда һәр'ьн,

[14] к'ижан кӧ хьрабийед хwәр'а ша дьбьн у нәһәqийед хwәр'а дьр'әqьсьн,

[15] р'ийед к'ижана харо-маро нә у шьвәр'ийед хwәда дьхальфьн.

[16] Wәки тә жь к'ӧлфәта хәриб хьлаз кә, жь к'ӧлфәта нәр'едайә хwәйе заре һ'ьләк'ар,

[17] жь йа кӧ дәсте хwә жь һ'әлале щаһьлтийа хwә кьрийә у пәймана бәр Хwәдейе хwә бир кьрийә.

[18] Мала wе бәрбь мьрьне дьбә у шьвәр'ийед wе жи алийе мьрийада.

[19] Әwед кӧ хwә ль wе дьгьрьн, т'ӧ щар вәнагәр'ьн у иди нькарьн бенә ль сәр р'ийа жийине.

[20] Бона ве йәке тӧ р'ийа qәнщада һәр'ә у хwә ль шьвәр'ийед р'аста бьгьрә,

[21] чьмки р'асте бьжин ль сәр ә'рде у к'амьле ль сәр wе бьминьн,

[22] ле нәп'аке жь сәр р'уйе ә'рде ӧнда бьн һәр'ьн у к'ока беамьна wе бе һатьне.