<Мәсәлә 21

[1] Дьле п'адше дәсте Хӧданда мина щәwед ава нә, к'ийалида кӧ дьхwазә, Wи алийида дадьгәр'инә.

[2] Р'ийа һәр мәрьви ль бәр ч'ә'ве wи р'аст к'ьфш дьбә, ле Хӧдан дьла дьдә ль сәр мезине.

[3] Ч'ә'ве Хӧданда р'асти у һәqи кьрьн, жь qӧрбандайине четьр ьн.

[4] Ч'ә'ве к'ӧбар, дьле бабах аwа гoти ч'ьра р'ийа нәп'ака, гӧнә йә.

[5] Т'ьвдира мәрьве хирәт ә'сә к'аре тинә, ле һәр кәсе ләз к'әти ә'сә зьраре тинә.

[6] Бь зьмане дәрәw хьзна qазьнщкьри, мина һӧлм-гӧлма кӧ дәрбаз дьбә, дькә т'әла мьрьне.

[7] Зордарийа нәп'ака wан р'адьqәтинә, чьмки әw нахwазьн пәй р'астийе бьн.

[8] Р'ийа мәрьве нәһәq харо-маро йә, ле йе бесущ р'аст дьчә.

[9] Qәнщ ә qӧлч'әкида ль сәр хени бьжин, нә кӧ т'әви жьна шәр'уд ханәкеда.

[10] Нәфса мәрьве хьраб хьрабийе дьхwазә, һәвале wи жи ч'ә'ве wида хере набинә.

[11] Гава пек'әни те щәзакьрьне, дьлсах сәрwахт дьбә у гава йе сәрwахт те ширәткьрьне, әw заньстийе дьстинә.

[12] Йе сәр р'астийе дина хwә дьдә мала нәп'ак у нәп'ак жь дәст хьрабийе сәр-сери те.

[13] К'и т'ьлийа дькә гӧһе хwә кӧ дәнге к'әсиб нәбьһе, әwе жи текә гази у дәнге wи нәйе бьһистьне.

[14] П'ешк'еша дьзива һерсе датинә, хәлата п'ашьледа, хәзәбе дьсәqьр'инә.

[15] Һәqикьрьн шабуна р'аста йә, ле бона йе нәһәq әw йәк мәрәз ә.

[16] Мәрьве кӧ жь р'ийа билантийе дадьгәр'ә, әw дьк'әвә нава щьвата хәйала.

[17] Йе к'ефе һ'ьз дькә, әwе к'әсибийе бьбинә, әwе шәраве у бәз һ'ьз дькә, wе дәwләте набинә.

[18] Бона йе р'аст, нәп'ак бәрва те дайин, бона һәqа жи, йе беамьн те дайине.

[19] Qәнщ ә мәри чол-бәстада бьжи, нә кӧ т'әви жьна шәр'уд у бәд.

[20] Мала сәрwахтда т'ьжи р'ун у хьзнә йә, ле йе беһ'ьш һәбука хwә qӧрта хwәда дькә.

[21] Йе нета wи ль сәр р'астийе у р'ә'ме йә, әwе ә'мьр, р'астийе у р'умәте бьбинә.

[22] Йе сәрwахт һьлдьк'ьшә бажаре мерхаса, кәла wанә кӧ әw теда гӧман ьн, һьлдьшинә.

[23] Йе дәве хwә у зьмане хwә дькарә, әw хwә жь qәдә-бәла хwәй дькә.

[24] Мәрьве хwәр'азийи, кӧ кьред wи бь к'ӧбарийе у бабахийе нә, наве wи: «Пек'әни» йә.

[25] Тәме бехирәт wи дькӧжә, чьмки дәсте wи хәбате нахwазә,

[26] һәр р'ож ч'ә'ве wи дәста йә, ле йе р'аст дьдә у бәр нак'әвә.

[27] Хӧдан жь qӧрбана нәп'ак зьвер ә, илаhи гава бь нета хьраб дьдә.

[28] Шә'де дәрәw wе ӧнда бә, ле йе гӧһа бьһисти шә'дәтийа wи дьминә.

[29] Мәрьве нәп'ак р'уйе хwә дьшьдинә, ле йе р'аст р'ийа хwә qәдим дькә.

[30] Т'ӧ сәрwахти, биланти у шеwьр т'ӧнә кӧ һьмбәри Хӧдан бьсәкьнә.

[31] Һәсп бона шер' те һазьркьрьне, ле сәрк'әтьн бь дәсте Хӧдан ә.