<Мәсәлә 12

[1] Йе ширәта һ'ьз дькә, әw заньстийе һ'ьз дькә, ле йе һьлатьне һ'ьз накә, әw беһ'ьш ә.

[2] Мәрьве qәнщ Хӧдан херхwазе wи йә, ле мәрьве мьхәнәт Әw диwана wи дькә.

[3] Мәрьв бь нәп'акийе бьнгәһ нагьрә, ле р'аwед р'аста т'ӧ щар наһ'әжьн.

[4] Жьна ә'сьл т'аще мере хwә йә, ле йа хwәйиqар мина кӧрме һәстуйе wи йә.

[5] Фькьред р'аста һәq-һ'әлал ьн, ле шеwьред нәп'ака мьхәнәти нә.

[6] Готьнед нәп'ака т'әләкед хунр'етьне нә, ле дәве р'аста мерьв хьлаз дькә.

[7] Нәп'ак дәвәр'у дьбьн у ӧнда дьбьн, ле малед р'аста qәwин дьминьн.

[8] Мәрьв wәкә фә'ме хwә хwәйиqәдьр ә, ле йе хwәйе дьле хьраб бер'умәт дьбә.

[9] Qәнщ ә бәрбьһер би у хwәйийе хӧламәки, нә кӧ п'айдар у мәрьве һ'әwще нан.

[10] Дьле йе р'аст сәр һ'әйwане wи дьшәwьтә, ле йед нәп'ак беисаф ьн.

[11] Йе ә'рде хwә бещәр дькә, wе нане хwә т'ер бьхwә, ле йе дьдә пәй тьште п'уч', әwа йәки беһ'ьш ә.

[12] Ч'ә'ве нәп'ака ль т'алане хьраба йә, ле р'аwе р'аста шьдийайи нә.

[13] Йе хьраб бь дәве хwә дьк'әвә егьр, ле р'асте жь тәнгасийе дәрк'әвә.

[14] Мәрьв бь бәре дәве хwә хер-хьзнева т'ер дьбә у wәкә кьред дәста әw п'ара хwә дьстинә.

[15] Р'ийа ахмах ль бәр ч'ә'ва р'аст ә, ле йе сәрwахт гӧһ дьдә ширәта.

[16] Ахмах пер'а-пер'а һерса хwә дьдә к'ьфше, ле йе аqьл шашийе вәдьшерә.

[17] Йе һәq хәбәр дьдә, р'астийе ә'лам дькә, ле шә'де дәрәw, хапандьне.

[18] Һьнәк бь хәбәра мина шур мерьв бьриндар дькьн, ле зьмане сәрwахта дәрмане дьла йә.

[19] Дәве р'астготи сәр йа хwә дьминә, ле зьмане дәрәwин дәм-дәми йә.

[20] Дьле фькьрхьрабада мьхәнәти нә, ле йе сәр ә'дьлайе дьфькьрьн wе ша бьн.

[21] Т'ӧ хьраби wе нәйе сәре р'аста, ле нәп'аке жь qәдә-бәла ч'ә'в вәнәкьн.

[22] Жь заре дәрәw Хӧдан зьвер ә, ле йе п'әргалә амьн Wи хwәш тен.

[23] Мәрьве аqьл занәбуна хwә вәдьшерә, ле дьле ахмаха, ахмахтийа wи ә'йан дькә.

[24] Дәсте мәрьве хирәт сәрwерийе дькә, ле хwәр'анәдити борщдар ә.

[25] Кӧл-дәрд дьле мерьв wи дьһ'әлинә, ле готьнәкә qәнщ wи ша дькә.

[26] Мәрьве р'аст р'е нишани һәвале хwә дькә, ле р'ийа нәп'ака wан дьхальфинә.

[27] Хwәр'анәдити неч'ира хwә нак'әлинә, ле мәрьве хирәт хwәйиһәбук ә.

[28] Шьвәр'ийа р'астийеда жийин һәйә у р'ийа wеда мьрьн т'ӧнә.