<Мәсәлә 4

[1] Әwләдно! Гӧһ бьдьнә ширәтед баве у дина хwә бьдьне, wәки аqьл һун һин бьн.

[2] Чьмки әзе дәрсед qәнщ бьдьмә wә, пьшта хwә нәдьнә һун һинкьрьна мьн.

[3] Чахе кӧ әз кӧр'е баве хwә бум, дәлалийе дийа хwәйи тайе т'әне бум,

[4] әwи әз һин дькьрьм у дьгот: «Бьра дьле тә пәй готьнед мьн бә, т'әмийед мьн хwәй кә у те бьжийи.

[5] Сәрwахтийе бьстинә, аqьл бьстинә, ве йәке бир нәкә у жь готьнед дәве мьн данәгәр'ә.

[6] Сәрwахтийе бәр'нәдә у әwе тә хwәй кә, тӧ wе һ'ьз бькә, әwе пьштоване тә бә.

[7] Сәри сәрwахти йә, сәрwахтийе бьстинә у бьра аqьл ль бәр дьле тәда жь һ'әму һәбука тә ширьнтьр бә.

[8] Тӧ qимәте wе бьзаньбә, әwе тә бьльнд кә, һәгәр тӧ wе һ'әмез ки, әwе qәдьре тә бьгьрә.

[9] Әwе к'офийа р'әwш-к'әрәме бьдә сәре тә, пе т'аще бәдәwи р'успитийе тә хәлат кә».

[10] Бьбьһе, лаwе мьн, готьнед мьн бькә сәре хwә у салед ә'мьре тәйе дьреж бьн.

[11] Әз р'ийа сәрwахтийе нишани тә дькьм, шьвәр'ийед р'астийеда әзе тә бьбьм.

[12] Гава тӧ р'е һәр'и, тьште нәк'әвә бәр ньге тә у гава тӧ бьр'әви те нәшьмьти нәк'әви.

[13] Ширәте мьн qәwин бьгьрә у дәсте хwә жь wе нәкә, тӧ wе хwәй кә, чьмки әw ә ә'мьре тә.

[14] Нәдә сәр р'ийа нәп'ака у р'ийа хьрабада нәгәр'ә,

[15] һ'әвза хwә жь wе бькә, wе р'ейеда нәчә, же дур к'әвә wеда һәр'ә.

[16] Чьмки әвана һ'әта хьрабийе нәкьн, әw нькарьн р'азен, хәw ч'ә'ве wан нак'әвә һ'әта кӧ йәки нәшьмьтиньн нәвежьн.

[17] Әвана нане хьрабийе дьхwьн у шәрава зордарийе вәдьхwьн.

[18] Ле бәле р'ийа р'аста мина р'онайийа бәрбанге йә, кӧ һеди-һеди дәрте, һ'әта кӧ т'әмамийа р'оже р'онайи дьбә.

[19] Р'ийа нәһәqа чаwа шәвәр'әшеда кӧ әw ньзаньн wе чь п'әли к'әвьн.

[20] Лаwе мьн! Дина хwә бьдә хәбәред мьн у гӧһе хwә бьдә сәр готьнед мьн,

[21] бьра әвана жь бәр ч'ә'ве тә нәчьн, дьле хwәда тӧ ван хwәй кә.

[22] Чьмки әвана ә'мьр ьн бона әwе кӧ дьбинә у дәрман ьн бона һ'әму нәфса wи.

[23] Жь һәр тьшти зедәтьр мьqати дьле хwә бә, чьмки канийа ә'мьр жь wи дәрте.

[24] Дәве дәрәwин жь хwә дур хә, заре һ'ьләк'ар дури тә бә.

[25] Бьра ч'ә'вед тә р'астә-р'аст бьньһер'ьн у дина бьжангед тә ль пешийа тә бьн.

[26] Шьвәр'ийа гавед хwә ә'нәнә кә у һ'әму р'ийед тә шьдийайи бьн.

[27] Р'аст у ч'әп нәхальфә, жь хьрабийе ньге хwә дур хә.