<Мәсәлә 29

[1] Мәрьве ль бәр ширәта, гава сәрһ'ьшк дьминә дәрбәкер'а wе бьшке у ду-дәрман нәбинә.

[2] Гава йе р'аст зедә дьбьн, щьмә'т wанр'а ша дьбә, ле гава нәп'ак дьбә сәрwер, щьмә'т ахин зарә-зар дькә.

[3] Мәрьве сәрwахтийе һ'ьз дькә, әw баве хwә ша дькә, ле йе пәй qава дьчә, әw һәбука хwә п'уч' дькә.

[4] П'адшайе ль сәр р'астийе wәлат шен дькә, ле ч'ә'ве йе ль хәрщ ә, wәлат хьраб дькә.

[5] Йе һ'ьләк'арийе ль һәвале хwә дькә, әw т'ор'е давежә ль бәр ньге wи.

[6] Гӧнәк'арийа мәрьве хьрабда т'әлә һәйә, ле йе р'аст әшqе у шайеда йә.

[7] Мәрьве р'аст дьк'әвә һ'але дәстура бәләнгаза, ле йе хьраб һ'ьше wан нагьһижә һ'але wан.

[8] Мәрьвед пек'әни бажер т'әвиһәв дькьн, ле йе сәрwахт qәрәбальхе дьсәqьр'иньн.

[9] Гава сәрwахт т'әви ахмах бьк'әвә дәргәһ-диwане, һерс к'әвә йан бьк'әнә, йәкә п'анща wи данайнә.

[10] Мәрьвед qәт'ьл давежьнә к'амьла, ле йед р'аст һ'але wи дьпьрсьн.

[11] Ахмах һ'әму һерса хwә дьдә дәр, ле йе сәрwахт хwәда зәфт дькә.

[12] Сәрwере кӧ гӧһ дьдә готьнед дәрәw, һ'әму бәрдәстийед wи хьраб дәртен.

[13] Бәләнгаз у зордар р'асти һәв тен, Хӧданә ишьqе дьдә ч'ә'ве һәр дӧйа.

[14] П'адшайе кӧ бь р'астийе ль сәр ише бәләнгазада дьньһер'ә, к'ӧрсийа wийе һ'әта-һ'әтайе бьминә.

[15] Шьва ширәте сәрwахтийе дьдә, ле әwләде хwәсәрехwә һьшти р'ур'әшийа де йә.

[16] Гава нәп'ак зедә дьбьн, нәһәqи жи зедә дьбә, ле р'аст wе к'әтьна wан бьбиньн.

[17] Дьле кӧр'е хwә бешинә, әwе р'ьһ'әтийе бьдә тә у wе бьбә барьстанийа р'ӧһ'е тә.

[18] Бе ә'ламәтийа жорьн, мәри бесәри дьбә, ле йе qануне хwәй дькә, хwәзьли йә.

[19] Хӧлам бь готьна найе ширәткьрьне wәки фә'м дькә ле наqәдинә.

[20] Тә әw мәрьве кӧ готьна хwәда ләз дьк'әвә дитийә? Жь йе ахмах һе гӧман һәйә, нә кӧ жь wи.

[21] Йе кӧ бьч'уктийеда хӧламе хwә назьк хwәй кә, ахьрийеда әwе бьбә мират'хӧре wи.

[22] Мәрьве һерс шер' т'әвр'адькә у йе вәгӧр'ьпи гәлә гӧнә дькә.

[23] К'ӧбарийа мәрьв wи ньмьз дькә, ле йе мьлук хwәйир'умәт дьбә.

[24] Йе т'әви дьз ә, әw дьжмьне ә'мьре хwә йә, чьмки әw ньфьр'е дьбьһе, ле накә дәнги.

[25] Тьрса мерьв бона мерьв т'әлә йә, ле Хӧдан бона йе Wида гӧман сьт'ар ә.

[26] Гәләк дькьн кӧ р'уйе wан р'уйе сәрwер к'әвә, ле һәqийа мерьв жь Хӧдан ә.

[27] Йе р'аст жь йе нәр'аст зьвер ә, нәп'ак жи жь йе р'еда р'аст дьчьн зьвер ә.