Мәсәлә 22
[1] Наве qәнщ жь һәбука п'ьр' qәнщтьр ә, qәдьр жь зер' у зив четьр ә.
[2] К'әсиб у дәwләти р'асти һәв тен, әw һәр дӧ жи Хӧдан хӧльqандьнә.
[3] Йе аqьл хьрабийе кӧ дьбинә һ'әвза хwә дькә, ле йе дьлсах пешда дьчьн у зьраре дьбинә.
[4] Бәре мьлуктийе у хофа Хӧдан һәбук, qәдьр у жийин ьн.
[5] Р'ийа мәрьве нәр'астда стьри у т'әлә нә, йе нәфса хwә хwәй дькә, әw жь wан дур ә.
[6] Зар'отийеда р'ийа р'аст һин бькә, гава әw кал бә, иди әwе жь wе нәк'әвә.
[7] Дәwләти к'әсиба бьндәст дькә, дәйндар дьбә хӧламе дәйндайи.
[8] Йе хьрабийе дьр'әшинә, wе тәнгасийе бьдьру у шьва һерса wи wе бьшке.
[9] Дӧайе ль мәр'д бе кьрьне, чьмки әw нане хwә бәлайи к'әсиба дькә.
[10] Бәри пек'әни дә, шәр'е дур к'әвә, qалмә-qалм у беһӧрмәткьрьне бьсәqьр'ьн.
[11] Йе дьле паqьж һ'ьз дькә, гӧл-нур жь дев дьбарә у п'адша ль wи пьсмам ә.
[12] Ч'ә'ве Хӧдан заньстийе хwәй дькьн, ле готьнед йе qәлпи-мьхәнәт wеран дькә.
[13] Хwәр'анәдити дьбежә: «Шер дәрва һәйә! К'учада әзе бемә кӧштьне».
[14] Дәве ч'ә'вдәра ч'ә'ла к'ур ә, йе һерса Хӧдан сәр, wьрда дьк'әвә.
[15] Ахмахти дьле зар'ева гьредайи йә, ле шьва ширәте wе йәке жь wи дур дьхә.
[16] Йе кӧ к'әсиб дешинә, кӧ әw хwәха дәwләти бә, йан жи йе дьдә дәwләти, әw һәр дӧйе жи бьк'әвьнә т'ӧнәбуне. s
[17] Гӧһ бьдә у готьнед сәрwахта бьбьһе у дьле хwә бьдә заньстийа мьн.
[18] Һәгәр тӧ ван дьле хwәда хwәй ки, әве тә ша кьн у ль сәр заре тә бьминьн.
[19] Аwа әв йәк, мьн иро тӧ дайи һ'әсандьне, wәки гӧмана тә ль сәр Хӧдан бә.
[20] Гәло мьн бона тә си шеwьр у ширәт нә ньвисинә?
[21] Wәки фә'мина готьнед р'астә амьн тә һин кьм, кӧ щаба йед жь тә дьпьрсьн тӧ р'аст бьди.
[22] К'әсиб т'алан нәкә, кӧ әw бәләнгаз ә у зоре ль йе беч'арәйи ль бәр диwане нәкә,
[23] чьмки Хӧдан пьштоване wан ә, Әwе жи ә'мьре йе кӧ әw шеландьнә бьшелинә.
[24] Т'әви мәрьве һерс һәвалтийе нәкә, у т'әви мәрьве зу qӧлоз дьбә р'е нәчә,
[25] нәбә кӧ тӧ р'е-дьрбед wи һин би у нәфса тә бьк'әвә т'әле.
[26] Жь бәр дәйнва нәбә wәк'ил мина әwе кӧ дәст дьдә,
[27] гава т'ӧнәбә тӧ бәрва бьди, чьма ньвина бьн тә бьбьн?
[28] Нишана синоре кал-бавед тә данинә, жь щи нәһ'әжинә.
[29] Тә әw мәрьве шьхӧлк'аре хwә дитийә? Әw ль бәр п'адша дьсәкьнә, нә кӧ ль бәр мәрьве бекер дьсәнә.