<Мәсәлә 10

[1] Мәсәлед Сьлеман: Кӧр'е сәрwахт баве хwә ша дькә, ле кӧр'е ахмах к'әдәра дийа хwә йә.

[2] К'ара хьзнед нәп'акийе т'ӧнә, ле р'асти жь мьрьне хьлаз дькә.

[3] Хӧдан наһелә кӧ йе р'аст бьр'чи бьминә, ле һ'уфә-һ'уфа нәп'ака ч'ә'ве wанда дьһелә.

[4] Дәсте хwәр'анәдитийа мерьв бәләнгаз дькә, ле дәсте йе хирәт дәwләти дькә.

[5] Әwе кӧ һавине дьдә ль сәр һәв, кӧр'е билан ә, кӧр'е кӧ дәма нандьруне р'адьзе, әw qара баве йә.

[6] Дӧа сәр сәре р'аста һәйә, ле дәве нәһәqада зордари вәшарти йә.

[7] Дӧа сәр биранина наве р'аста йә, ле наве нәп'ака дьр'ьзә дьчә.

[8] Йе хwәйе дьле сәрwахт, әw т'әмийа qәбул дькә, ле йе хwәйе заре ахмах wе сәрсери бе.

[9] Йе кӧ р'ийа хwәда беләк'ә йә, әw бехоф дьчә, ле йе кӧ р'ийа хwә дьт'әр'ьбинә, әw нәдити наминә.

[10] Йе кӧ бь ч'ә'ва дькә, дьбә сәбәбе хьрабийе у йе зьмане хwә нькарә, wе сәрсери бе.

[11] Дәве йе р'аст канийа жийине йә, ле дәве нәһәqада зордари вәшарти йә.

[12] К'ин-бох шер' т'әвр'адькә, ле һ'ьзкьрьн һәр хьрабийе дьньхемә.

[13] Сәрwахти ль сәр заре билана йә, ле шьвдар бона пьшта беһ'ьша йә.

[14] Йед сәрwахт занәбуне т'оп дькьн, ле дәве беһ'ьш незики qәда-бәла йә.

[15] Һәбука дәwләтийа бона wан, чаwа бажарәки зор ә, ле п'әришанийа фәqира бәләнгазийа wан ә.

[16] К'әда р'аста жийин ә, qазьнщкьрьна нәп'ака гӧнә.

[17] Ширәтхwәйкьри нава р'ийа жийинеда йә, ле йе һьлатьне qәбул накә дьхальфә.

[18] К'и к'ине вәдьшерә әw дәрәwи нә у к'и хәйбе дькә әw беһ'ьш ә.

[19] Зә'фхәбәрданеда гӧнә һәнә, ле йе зьмане хwә дькарә әw аqьл ә.

[20] Зьмане мәрьве р'аст зиве бьжарти йә, ле дьле нәп'ака нә т'ӧ тьшт ә.

[21] Дәве р'аста гәләка т'ер дькьн, ле ахмах жь дәст беһ'ьшийе дьмьрьн.

[22] Дӧайе Хӧдан һәбуке дьдә у к'әдәре сәрда зедә накә.

[23] Хьрабикьрьн бона ахмаха сәйрәнг ә, сәрwахти жи ль мере билан хwәш ә.

[24] Нәп'ак жь чь дьтьрсә те сәре wи, ле хwәстьна йед р'аст тенә сери.

[25] Бобәлиск р'адьбә нәп'ак ӧнда дьбә, ле йе р'аст сәр һ'име һ'әта-һ'әтайе йә.

[26] Чаwа сьркә бона дьрана у ду жи бона ч'ә'ва, ӧса жи хwәр'анәдити, бона йе кӧ wи дьшинә.

[27] Хофа Хӧдан ә'мьре мәрьв дьреж дькә, ле салед нәп'ака wе кем бьн.

[28] Гӧмана р'аста шабун ә, ле мьразе нәп'ака wе ч'ә'ве wанда бьминә.

[29] Р'ийа Хӧдан сура дор беләк'а йә, ле бона нәһәqа wеранкьрьн ә.

[30] Р'асте т'ӧ щар нәльк'ӧмә, ле нәп'аке ль сәр дьне нәминьн.

[31] Дәве йе р'аст сәрwахтийе дәртинә, ле зьмане мьхәнәт wе бе бьр'ине.

[32] Заред р'аста тьштед мә'рифәт заньн, ле дәве нәп'ака мьхәнәтийе.