<Мәсәлә 7

[1] Лаwе мьн! Готьнед мьн хwәй кә у т'әмийед мьн чаwа хьзнә вәшерә.

[2] Т'әмийед мьн хwәй кә кӧ ә'мьр ки у һәр готьнәкә мьн мина р'онайа ч'ә'ве хwә.

[3] Т'ьлийед хwәва wан гьредә, ль сәр т'әхте дьле хwә бьньвисә.

[4] Сәрwахтийер'а бежә: «Тӧ хушка мьн и!» у билантийе нав кә: «Пьсмаме мьн»,

[5] кӧ тә хwәй кьн жь жьна хәриб, жь жьна хәлqейә зархwәш.

[6] Щарәке мьн мала хwәда п'әнщәрер'а дина хwә дайе,

[7] ва йә нава щаһьлед сахьке дьле хwәда, ч'ә'ве мьн хортәки бефә'м к'әт,

[8] кӧ к'учеда незики ә'нишке хwә ль р'ийа мала wе гьрт,

[9] евар бу, р'о чубу ава, шәв бу, тә'ри к'әтьбу ә'рде

[10] у ва жьнәкә к'ьнще qава ле, бь дьле qанщьхи дәрк'әтә пешийа wи,

[11] әw йәкә шәр'удә бәд бу ньге wе мала wеда нәдьман.

[12] Тә һәw дьдит дәрва бу, һәw мәйданада у һәр qӧлч'әкида хwә дьтәланд.

[13] Әwе әw хорт гьрт р'амуса у бе шәрма р'у готә wи:

[14] «Мьн дийарийа һәләqәтийе дайә, созе хwә иро анийә сери,

[15] ләма әз дәрк'әтьмә пешийа тә, кӧ р'уйе тә бьбиньм, ва мьн тӧ дити.

[16] Мьн щи-ньвина хwә пе сьпич'ала мьсьрейә р'әнг-р'әнги хәмьландийә.

[17] Мьн ньвина хwә зьмьр, уд у дарчин кьрийә.

[18] Wәрә әме хwәр'а бьк'әвьнә к'еф-һ'әнәка һ'әта сьбе, бь шабуне т'әв дәрбаз кьн.

[19] Чьмки мере мьн нә ль малә, р'екә дурда әwа чуйә,

[20] к'иське п'әра хwәр'а бьрийә, хьлазийа мәһе әwе бе мале».

[21] Пе зархwәшийа хwә әw кьрә машоqе хwә у заре хwәйи хwәш, сәр хwә бәнги кьр.

[22] Һьнге әwи зу да пәй wе чу, чаwа га кӧ дьчә qәсабхане у мина һ'әйwанәкә капстукьри,

[23] һ'әта кӧ тир щәгәра wи бьгьрә, чаwа кӧ ч'ьвик хwә т'әлер'а дьгьһинә у ньзанә кӧ әw р'ӧһ'ьстине wе йә.

[24] Дә ньһа гәли әwләда, дәнге мьн бьбьһен у гӧһ бьдьнә готьнед дәве мьн.

[25] Бьра дьле тә бәрбь р'ийа wе нәзьвьр'ә у шьвәр'ийед wеда нәхальфә.

[26] Чьмки гәләк бь дәсте wе бьриндар бунә у гәләкә мерхас бь дәсте wе һатьнә кӧштьне.

[27] Мала wе р'ийа дийаре мьрийада йә, йа кӧ дьбә жер щи-wаре мьрийа.