Мәсәлә 8
[1] Сәрwахти гази дькә у биланти дькә дәнги!
[2] Әw ль һеланед жорьн дәве р'ийа у нава шьвәр'ийада дьсәкьнә.
[3] Әw ль бәр дәргәһе кӧ дьк'әвьнә бажер, ль бәр дәрийе к'ижанир'а дәрбаз дьбьн дькә гази:
[4] «Әз гази wә дькьм гәли мәрьва у дәнг дьдьмә әwләдед инсен!
[5] Гәли беһ'ьша, сәрwахтийе һин бьн, гәли ахмаха һ'ьш бькьнә сәре хwә.
[6] Бьбьһен, чьмки әзе тьштед маqули бежьм у дәве хwә вәкьм бона тьштед р'аст.
[7] Дәве мьне р'астийе бежә, чьмки нәп'аки, заре мьнр'а һ'әрами йә.
[8] Һ'әму готьнед дәве мьн бь р'астийе нә, нава wанда тьштед qәлп у хар т'ӧнәнә.
[9] Әвана һ'әму фә'мдаринә бона йе аqьл у әвана р'аст ьн бона йед заньсти стандьнә.
[10] Дәрсе мьн һьлдьн, нә кӧ зив, заньстийе, нә кӧ зер'е хас.
[11] Чьмки сәрwахти жь лал у дӧр'а четьр ә у һәр тьштед дьле мерьвда бьһа, wәкә wе набә.
[12] Әз, сәрwахти, фьрасәтеда дьминьм, фә'мина занәбуне ә'йан дькьм.
[13] Хофа Хwәде хьраби жәнандьн ә, к'ӧбари, бабахи у р'ийа хьраб ӧса жи заре мьхәнәт бәр ч'ә'ве мьн р'әш ьн.
[14] Шеwьр шеwьра мьн ә, фьрасәт фьрасәта мьн ә, әз ьм биланти, qәwат qәwата мьн ә.
[15] Пе мьн п'адша п'адшатийе дькьн, мир qьраред р'астийе дьдьн.
[16] Пе мьн сәрwер сәрwерийе дькьн, ӧса жи ә'сьлзадә у һ'әму һ'акьмед р'аст.
[17] Әз һ'ьзкьрийе хwә һ'ьз дькьм, йед бь дьл мьн дьгәр'ьн мьн дьбиньн.
[18] Дәwләт у р'умәт щәм мьн ьн, хьзна нәп'уч' у чәрха р'аст.
[19] Бәре мьн жь зер' четьр ә, жь зер'е зәр жи, фәйда мьн жи жь зиве жьбарә.
[20] Әз р'ийа р'астийеда дьгәр'ьм у нава шьвәр'ийед һәqийеда,
[21] wәки һәбуке бьдьмә һ'ьзкьрийед хwә у хьзьндангед wан әз дагьрьм.
[22] Дәма дәстпекьрьна шьхӧле Хӧдан, әз щәм Wи бум, һе бәри кьрьнед Wийә пеш.
[23] Әз һе бәри һәр-һәйе һатьмә qәдимкьрьне, сәре серида, бәри пешдаһатьна дьнйайе.
[24] Әз бәри бебьнийа бумә, һе бәри канийед авед гӧр'.
[25] Һе ч'ийа-бани щи-wар нәбуйи, бәри гьра әз бумә.
[26] Гава Әwи һе нә ә'рд, нә дәшт ә'фьрандьбу у нә жи һе аха дьнйайе,
[27] гава Әwи ә'зман че дькьрьн әз ль wьр бум. Гава ль сәр р'уйе ава бебьни гьловәр'и к'ьшанд,
[28] гава Әwи ә'зманада ә'wр дьданә сәкьнандьне, канийед бебьнийа qайим-qәдим дькьрьн,
[29] гава синоре бә'ре дани кӧ ав фәрмана Wи дәрнәк'әвә, гава һ'име дьне давит,
[30] һьнге әз ль щәм Wи чирәдәст бум. Әз шабуна Wийә һәр р'ож бум, һәр т'ьм ль бәр Wи ша дьбум,
[31] әз бь һәр тьштед дьнйа Wида ша дьбум у әшqа мьн әwләдед инсен бу.
[32] У ньһа, гәли зар'а, гӧһдарийа мьн бькьн. Хwәзи ль wан, йед кӧ р'е-дьрбед мьн хwәй дькьн!
[33] Гӧһ бьдьнә ширәта һуне сәрwахт бьн, пьшт гӧһе хwәва wан нәвежьн.
[34] Хwәзи ль wи мәрьви кӧ мьн дьбьһе, һәр р'ож ч'ә'ве wи ль сәр дәргәһе мьн ә у дина wи ль дәрийед мьн ә.
[35] Чьмки к'е әз дитьмә, жийин дитийә у жь Хӧдан wе к'әрәме бьстинә,
[36] ле йе кӧ мьн жь дәсте хwә бькә, әw зьраре дьдә нәфса хwә у һ'әмуйед кӧ дьжәньнә мьн, әw мьрьне һ'ьз дькьн».